Geguritan Satriya Tiga

GEGURITAN SATRIYA TIGA

 

 

1.   awighnam ikang purwa ri carana hyang bhatara damuh amwit nuhun lugra dohaken satulah carik sarwa pataka nasini kula sunu awet tuwuh malih sugih derman bagya mangkana juga inapti jagat landuh saking swecan siwa brahma.

 

2.     pamurwane nganggit gita sogata nemu madura suka menga medangsanga panglong roras sasih sasti geni tasik dwara siji linekas kalaning dalu arsa manglampahang katha tatwaning satriya trini sane kasub ring sawarih sang apandya.

 

3.     damuh nunas pangampura ri pwekang gita rineka alpa rasa makweh singsal membuh sami tuna becik amada-mada sang kawi lupa jati awak punggung tawah ring basa basita kunang-kunang narung sasi kangin kauh damuh paling tan parowang.

 

4.     hanane ring wilwatikta linggih sri sang naranatha inabih de bala wadwa jaksa miwah para yayi arya kenceng sang apatih tumut jajeneng puniku malih sang raja brahmana sami pradnyan miwah siddhi ne mamucuk sira sang brahma wisesa.

 

5.     atha ri subha diwasa pahum sanak padha sanak amawos arsane natha kang arep turuneng bali mapan telas ratun bali tan hana sendi ring bangsul yeka aptine sang natha tinakon ring para yayi ucap prabhu paran sandikane kita.

 

6.     sahur alus sami banban anglurah prakanca mangga patihe saturut lampah bala sadaya mangiring jawat wadu jawat laki sama sutindih ring ratu norana wani amiwal tuhu yukti dreda bhakti arsan prabhu kaya punika linampah.

 

7.     raris sang natha atanya ring sira brahma wisesa uduh kaka empu brahma paran sandikane mangkin mapan sira urip wesi sira maka kakang ingsun maka urip sarwa sarat maka kasaktiyan mami sira empu angawe kerta ring jagat.

 

8.     sumahur sang empu brahma anagingin ujar natha ujar tulya gula drawa angadeg sang brahma sakti amawos pacang mangiring ri sajebag lampah henu dyapi jawuh dyapi panas empunta tatan akirig lakar kukuh gurit wesi ujar pisan.

 

9.     malih atakon sang natha mangke ring raja brahmana ujar alus dahat plapan singgih kaka resi muni paran sandikane mangkin apan sira siwan ingsun umilwa ka balidwipa maka pangiyangan mami maring bangsul sira anyudha nirmala.

 

10.  sumahur raja brahmana sang prabhu aywa wikalpa tuhu kami tan atungkas nora madwi ujar kami yan kita turun ka bali ingsun brahmana pukulun tumut ngiring inganika asanding ring siyang latri mangda tulus anyeneng ka balidwipa.

 

11.  mano bagya pwa sang natha wireh prasama umangga lah cakup cakup kang bala nama siwaya astuti nyakup sama manganjali anjali sari ning cakup tan katamana panulah mangkana pwekang inapti sami anut wreta geger rinenga.

 

12.  tan kocapan malih ika sang natha mantukeng rajya laju makasami bubar mantuk sakeng ikang gosti anganti subha ning wahi dina tumedun ka bangsul prapta kalaning kartika respati tur nemu legi guru turun maring pananggal ping dasa.

 

13.  balane nabuh tengeran sarwi anteng ngupin sangka malih nabuh bende gubar garjita ngiring sang gusti pascat saha para yayi angadeg sumeken sampun satak seket kwehing bala jangkep saha para mantri mwah pangulu henengang ring wilatikta.

 

14.  wuwusen mangke ring hawan tutug ring sapta rahina praptane ring jamberana ring kakisik nusa bali kangelan sami arari asayub ring soring taru ri tengah ikang kanana wadwa paling amrih margi tan tinemu ne katon janggala leba.

 

15.  laut sami merih toya prayane adyus masoca ri sampun puput masucyan tengeranne tan wismerti tinabuh tinimpal bedil ghurnita saling masahur angraramen maring dalan gumuruhe natan sipi sapuniku lampah sri sang naranatha.

 

16.  hana tigang andakara margane twara katonan kewala alas durgama ring jamberana ya kari murang murang wulak walik soka citta ne sang prabhu mojareng sanak sadaya tidem kocem ring wadani sri sang prabhu tulya sundih kirang lenga ‖

 

17.  nguda reko nora katon hana dalan pragat mabodang-bading ri tengahing wana rasa metu manah uyang anghel pwa angapti margi twara kalintang alase ngawe wedi.

 

18.  alas wayah kija jani ngalih mamban bungeng manah tan sipi mangenehang jalan kenken abet pang samapta amrih margi mangda gelis raja brahmana konen amerih margi ‖

 

19.  raja brahmana atangya nurut paminta bhupati praya amrih kang dadalan lamakane siddha nulus umedal saking kanana ya sang resi mangke umojar ring natha.

 

20.  uduh sira sang anatha tonton kawisayan mami sira umeneng kewala ingsun pacang ngawe henu anglekas sandi upaya yoga siddhi ne pacang mamutul alas.

 

21.  raris ida ngatep pada kelem ring yoga samadhi saking gelar pangastawa metu geni saking purus dumilah angarab-arab ikang geni dasa paneleng adohnya.

 

22.  ageng murub kang jwalana taru sami sander api kageseng patra-patranya nanging pokok kantun utuh tuah donnya sane ilang ngawe margi tan puput kadi sumaya ‖

 

23.  uduh kaka adi ke kene dadinya durung katon pamargi nguda kaka bobab ngucap siddha ngawe dalan nanging ujar tan pabhukti indayang cingak sing bhina cara nguni.

 

24.  sang brahmana mojar ring sang naranatha sun nunas pangaksami telas pangupaya dadya nirdon lampah natha mangke ingsun wawu meling brahma wisesa sira ta pintani.

 

25.  dalem mojar maring sira empu brahma singgih sang brahma sakti nguda nira lupa kaka maka saktin natha sareng tumedun ka bali ingsun aminta kaka magawe margi.

 

26.  empu wesi umatur ring sang narendra lami ingsun anganti natha mapangarah ring suba peteng lampahta wawu meling kaping kami duh sang narendra sun mangke nerus margi ‖

 

27.  ra empu brahma wisesa angadeg sang urip wesi laju angreh kasaktiyan ngagem sarwa aji putus jeroning guhya dharana amrastuti aji dharma kapandeyan.

 

28.  anjapa sira ring purwa ring kidul tutug lumaris sawusnya japa mascima tur ring utara pamutus kalanturang maring madya brahma sakti megeng bayu saprahasa.

 

29.  rika manjapa ping sanga ndah umijil kala geni saking cangkem karna soca tumut irung silit purus ngamijilang geni pascat kala geni nganteg-nganteg ring ambara.

 

30.  muntab bahnine ring tawang maduluran mijil wesi kalih mijil ikang waja ring digdesa pwa mapadu awor wesi lawan waja nunggal yukti umawak dadi sanjata.

 

31.  tri sakti pwekang sanjata maka panganjuring margi punika anggen sarana kapartama paksi kuntul ne kalih ngaran inaka kaping trini iku sanjata bhargawa.

 

32.  sama tan hana angawa anglalayang bhawisyati yeka angrampak angrebas awasana taru runtuh pakatumpuk sama tumbang kala geni raris amangan punika.

 

33.  gelis kedas nikang wana taru-tarune kabhasmi antyan molihing pamargan maring genahe tinuju galang tan hana durgama sang nrepati dahat tusta manahnira ‖

 

34.  uduh kaka sira empu pande urip wesi sakti kascaryan ingsun lumihat pakaryane urip wesi siddha magawe dadalan amutul alas iriki.

 

35.  sinah precaya pwa ingsun maring kaka urip wesi weruhing tattwa mottama yeka indik kawit wesi malih kawitanne kadga ngamertaning sarat kaki.

 

36.  para wadwa tumut matur mojar angob makasami sang apatih kenceng juga tan malupa para yayi padha ngucap kabhinawa angon ring sang brahma sakti.

 

37.  sang prabhu angucap arum singgih kaka brahma sakti yan samangka karyan kaka yukti weruh maring aji lah karyanen pwa pamurna anggen dalan sunyajati.

 

38.  kala ning ingsun umantuk miwah anggen para yayi arya kenceng lan brahmana yeka juga wadwa sami kapandeyan mangda natas kala mantuk sunya jati.

 

39.  pande aji sakti nyahur ri pangucap sri bhupati singgih sri sang naranatha hana kapandeyan kami mijil saking sang hyang brahma apuspata brahma gati.

 

40.  sang hyang pasupati iku sira maka pucak iki kang mottama ngawe hawan maka srana merih margi hawan ka batur kamulan pangentas panatas yeki.

 

41.  hanane ong maring tungtung wang kara ring madyanyeki tumut angkara ring bungkah sang prabhu wenang akeni panatase suddhamala ika ngaran sastranyeki.

 

42.  malih wangkara ring tungtung madyane ungkara yukti yan ring bungkahe ongkara trinawa ngaran pwa yeki sang brahmana kang mawenang abhusana kala amwit.

 

43.  yan angkara maring tuntung ring madya ongkara jati nanging tan pamesi bungkah sang wesya sane akeni ika mangaran trisula anggen srana para yayi.

 

44.  malih hana tan patuntung iku ngaran kembang tuwi wantah ongkara ring bungkah pangkara madya angiring bhargawa taler kawenang sang sudra sane makeni.

 

45.  kangkara hana ring tuntung madyane ongkara jati tur ring bungkahe pangkara sang empu pande akeni sang empu padha kawenang ring sarwa panganggen sami.

 

46.  yeku ne kaanggen tuhu anggen natas dalan mati blakas pangentas arannya pinih ayun yan mamargi amegatang raga dwesa apang mulih jati hening ‖

 

47.  susakti sarining sarat saking brahma gati muwah makarya sakancan hawan kasiwi manusa sami kang ngaran dalem palinggih indik tingkahe ngewangun wangunan sanggar kahyangan mesi padagingan sami mangda weruh padha madudwan lampahnya.

 

48.  nihan indik padagingan sang ratu ne mahottama gagawan sang wiswakarma madyane mesi kuwali uttamane tumbak keris raja brahmana puniku rangkep gagawan swakarma nanging utamane kwali keto tuhu indik ratu lan brahmana.

 

49.  malih sang sudra kocapan taler matios lampahnya sarangkepnyane ya tuah gagawan manusa yukti tan wenang anganggen keris tumbak taler tan kapurun mangkin yan sang empu pandya wantah marapetan besi kaya iku pamargi utama dahat ‖

 

50.  narendra malih umojar tuhu luwih aji wesi kang magawe parikrama hana pwa pawekas ingsun maring sang raja brahmana kaka yeki angadeg patirtan natha.

 

51.  nanging ingeten prayatna melahang angambil prami santana sang kapandeyan tan wenang ambil puniku sahanan yayi sadaya sang bhupati taler nora kawenangan.

 

52.  apa marmitan mangkana reh tan weruh kawit wesi lagi juga kawit kadga mangda tan kena kawastu dening sira sang hyang brahma cendek urip yan anglurug tatwa nika.

 

53.  yan hana anak sang pandya raris mijil kembar buncing tan wenang kinonkon kesah wenang tileh maring kuwu aja winaweng pempatan swaran mami maring sang empu apandya.

 

54.  yan sira anangun yajnya dadi tan angangge bawi lingga taler nenten munggah dewa-dewi tan katurut taler tan masanggah surya sanggah suci ika sane kawenangan.

 

55.  hana malih kramanira delaha ya sira pati wenang ring kala gotongan taler ring semut sadulur ika wenang kaambahang pande sakti angawe punang dadalan ‖

 

56.  tan ucapang bebaosan sampun sumungkem ring natha pawarahe karesepang rawuheng sang para yayi kang sadaya amisinggih nguni-nguni brahma empu kalih sang raja brahmana  saturut ring narapati mangda hayu sami nganutin sasana.

 

57.  wus mangkana katatwannya lumaris sami umangkat angiring sang dalem lungha lungane mangwetan raris anemu toya masuci ri sampun natha adiyus malih enak tang twasnira luwah ika kaparabin dening prabhu angaran tukad baliyan.

 

58.  delaha yan hana janma hala ujare ingkana malih mentas tan masiram kasapa de narapati mogi tan hayu ring margi ri sampun wus ya mamastu malih anglampah mangwetan mangkana lampah ring bali ida prabhu tedune sampun raharja ‖

 

59.  puput kang satwa binabad saking sewala inanggit kabaos satriya tiga ring warih pandene kasub kapikolih maring kirtya winaca laris tinulis lagas gati engsap dewek tuna sastra.

 

60.  tityang pande tan paguna lintang nispradnyan tan kadi prapen tityang tusing ngelah makarya landep tan weruh karyan galuh taler padha menang munyi nanging twara nyandang gega.

 

61.  prapen di hati magenah api nala cintyamani bayune dadi ububan papalu ring manah kukuh sepite solah kosala culik api pamineh apang wiweka ‖

 

62.  brahmane matumpuk tiga ring wuku pegat tirisan pon paniron laba menga purna sasangka saptami warsane nora masalin jurang ring kulon lan kidul bayabya bherawirajya ring katurikup pradesi himper dalu sahayan pande nyamapta.

 

63.  ksama swamam santabya ring sang ledang sudi ngwaca reh damuh kalintang pangkah damuh pargata tan sipi saksat kadga tan parahi damuh ring tambet kalebu moghi wenten sane olas kapining damuh nirbuddhi nenten surud damuh nunas ring hyang brahma.