Semayapati ring Ratnakara

SEMAYAPATI RING RATNAKARA

 

Semayapati ring Ratnakara. Desain cover olih @kakereb_art

1) ring ginada sembah tityang ratu sang hyang saraswati lédang ratu mamurnayang katambetan damuh jugul pangkah tityang ngapus tembang bilih mangkin manyarengin wimbakara.

2) idepang segara wéra sastra luih tan patepi matemahan damuh marma twara nawang ngawit nyumu tityang entipan ring kaang mogi-mogi sastra sida anggén nglukat.

3) kala mangkin sasih cétra nuju kliwon maring tambir malih kajeng dadi jaya anggara mepet urukung puniku dadi diwasa damuh ngawit mangapus dadi satua.

4) beneng mangkin dina melah nepék patirtan hyang sakti kapuji hyang ratnakara kahyangan ida ring siyut ida mapica amerta saha ngurip sajebag jana lokika.

5) déwék tityang yén idepang kadi jukung tengah tasik tan pakantih tan pabidak tengah pasih srayang-sruyung bas ja twara wénten gradab lalis mati timbang dadi pangébek rat.

6) cutetnyané satwan tityang wénten sang ical ring pasih anak truna nanging ngendal ditu ya maan sesuluh duk dadi kutun segara mara méling tingkahé nuturang awak.

7) kocapan di dauh sowan ada anak lintang sugih sodagar i ketut yasa ni nyoman kérti ané luh umah gedé maluaran nanging sepi wiréh tan pabuah basang.

8) molas tiban masomahan twara masih ngelah cening dokteré telah iderang kemu mai nyauh atur masih durung polih cihna sebet hati nirdon sakancan utsaha.

9) dané guru raris ngucap nguda cening ideh paling cening ajak bapa ngayah amangku turun temurun ring kahyangan ning segara drika sidi jalan ditu nunas ica.

10) boya sida cening nulak sangkan suba kéto tami sagét mani bapa pejah cening nganti dadi mangku sagét puan cening pejah pyanak cening lakar ngelanturang ayah.

11) dané ketut mangresepang tumuli ngaturang bakti soma manis ring purnama ka pura ya kala dalu luh muani saling dandan mapejati dané ketut ngawekasang.

12) ratu bhatara saswunan sané malinggih iriki ratu sakti ring segara aksi sembah tityang ratu bas kamomo tityang nunas swéca ugi ratu micayang sentana.

13) yéning metu pyanak lanang putih bagus kenyung manis sinah ajak tityang ngayah jawat panes jawat gentuh jawat seger jawat sungkan nénten mari ipun ajak tityang ngayah.

14) punika lungsurang tityang tuah ring ratu hyang sakti pradé jakti lekad lanang tityang sadya pacang ngetut pacang maturan ring pura bakti jelih sarin timunné negepang.

15) kocap dané ketut yasa taler dané ni luh kerti mangkin sampun di pomahan nuju jinem raris turu sagét bangun endag surya ni luh kerti nuturang polih ipian.

16) bli bagus dingehang tiang ibi peteng tyang mangipi nanging buka saja pesan reko tiang menék prau neked di tengah segara tiang paling laut kasapu ban ombak.

17) tepuk tiang wénten ulam awaknya gedé ten sipi ento raris nyaup tiang to ya madan ulam agung cara ortan lingsir pidan yén sing pelih antuk tiang manarkayang.

18) kondén suud ipyan tiang ulamé mapica manik warnanyané putih nyentak jemak tiang lantas suun sambil majalan di kaang tajeg ai ada lantas anak nyadang.

19) anak lanang lingsir nika masidakep ngaba jaring mabaju ya lungsir barak wastra poléng dadi kampuh tur maudeng kepak dara aji jaring manik tiangé juanga.

20) i kaki raris pablesat tiang sing bareng malaib malah balik ngemulihan suba kéto tiang bangun mara marasa to ipyan kénkén beli mirib ento cihna apa.

21) ketut yasa laut ngucap uduh iluh kudyang beli beli seken twara nawang ganjih pesan ipyan iluh tenga kaon tenga melah sukat jani jalan kenehé ulengang.

22) lantas suba duang bulan mrasa enek ni luh kerti semeng bangun utah-utah awak panes buka ukud nyakitang basang lan bangkyang ulun ati tebek-tebek karasayang.

23) ketut yasa bareng susah manolih somahé sakit ni luh kerti manuturang uduh beli tiang uyun suud dibi ngipi mlayar tulung beli ka dokter tiang atehang.

24) jani di dokteré suba dokter ngurah semu manis pak tut lakar dadi bapa bu luh lakar dadi ibu kendel pesan ketut yasa yéh di pipi ngetél ningehang punika.

25) galahé gelis mamarga bawakang satuané jani wanengé sampun kalampah raris lekad raré bagus putih ngeplo tan pacéda alis lentik paras pangus kadi smara.

26) kocap raré wau mijil ngepes ngeling duké lekad kasangkol dé bapannyané jeroné sayangang bapa swasti jero mangkin prapta mogi stata lantang tuwuh numitis manadi jadma.

27) jero pacang kaadanin gedé segara nugraha sarat keneh nora ngampés dumun manunas sentana malarapan ban semaya yasan panglingsir katugtug ring ratu hyanging segara.

28) roras dina sampun mangkin kulawargané sayaga luas manakonang raré nunasang ring baas jinah sira mantuk pawayangan mangda patut ban manyambut sang panglingsir ngidih daar.

29) ring dasaranné nunasin dané sadeg sampun odah magenah ring désa kalér sadegé saged kaloktah sidi mandi bétél tingal akéh panangkilan kemu kanti ngantré kapetengan.

30) ketut yasa kakaukin sawatara galah solas sareng kutus menék balé genah sadegé manyanjan banten taler kaunggahang canang pangraos matumpuk roko abongkos lan sedah.

31) dupa barak telung katih karegep sadeg amuja katimpalin pujan sonténg jangih swaran sang ngawekas nuur nguntap parab déwa kaselag ban gending limbur gelis nadi wus punika.

32) dané sadeg mojar aris uduh pérmas néné teka dingehang raos nirané putran cening anak melah ané mulih wong bendéga teleb ring sastra wus putus seneng ngambek kawisésan.

33) mabusana twah mamutih kéto tindaknyané pidan anak sakti sayuktiné mulih ngalih cening yasa teka ulyan cening nunas lekadé di wuku dukut buda manis dedinannya.

34) punika ujar dé istri kulawarga ngematutang raos sadeg ngéténg-ngéténg saha mapitékét muah ambeké gedé kocapan aluh naké cerik ngambul ia lanji sada langsag.

35) raris wénten warah malih baos lelingsir manjadma wekasan pang ngayah méndét pét wali pura segara yén lima bisa makebat wus mangresep ndang nding ndung puput raré menék truna.

36) tan kocapan sang nunasin wus budal saking mamasar gelisang lampah kalané i gedé mangkin tuturang sampun slaé ya mawayah para luh-luhé manyumbung lanang bagus tur yuwana.

37) patindak gedé segara yukti kadi baos riin ambeké nora katimbang pelih bedik nyekel hati apa tagih pang isinin sing taén manolih tuun buka pasih pangedotnya yadyapin magaleng pipis twara cukup panodaning bambang bias.

38) kademenan gedé tan sah luas ngulaleng malali twara taén jenek nguda nglén ulat tusing tyaksi telah eluhé lemesin manis munyiné mangrayu mangadokang kasugihan muah goba bani tanding inan rurung ia tusing taén jumah.

39) daweg masané punika guru mangku pun ten kari ketut yasa nyaluk ayah nglampah winten ékajati prajuruné sami ngaksi genep saha para mangku sajebag kahyangan tiga taler maksan sareng sami kulawandu sareng mangupasaksiang.

40) tan critayang wongé prapta réh purané nampek pasih ombak magebyur karenga kadi meled ngupasaksi swaran ombak dahat ilis kadi rasayang mabandung lawan genta sang pandita maklenting dahating ening daweg muput widhi widana punika.

41) pamarginé nénten kirang kapuja pedanda istri mangku anyar kasobyahang majeng krama sané nangkil jro bendésa ngadeg raris kasandingin dané ketut parab anyar kategesang ida dané sareng sami guru ketut mapangkus mangku segara.

42) gedé negak lod piasan patuh masih kawarahin dé nira ratu pedanda cening sarengang mangabih gurun cening buka jani suba kedas dadi mangku ngayah ring pura segara baktiné asebit sari apang kukuh cihna sradané utama.

43) semuné gedé segara sagét mangenduk prejani mrasa tekén déwék likad bas tusing nyidang makelid diastun nora lega hati di ajeng wiku misanggup matur déwék syaga ngayah reramané liwat tusti anggut-anggut mrasa pyanak ngidep warah.

44) yan kudang masa kalangkar janji tuah ja di munyi i gedé tileh ja ngendal bilang peteng di pasisi silur luh saling lemesin ngelekasang smara dudu kaimbuhin déwék punyah buka kéto sai-sai tusing ikun ajak ngayah tusing elas.

45) sedek rauh ring purnama dané mangku mituturin cening gedé panak bapa pang kénkénang bapa ngorin ngudyang cening tusing nyadin suba liu nak manutur abesik twara resepang dong dingehang buka jani cening bagus boya bapa lakar maksa.

46) mapan jani dina melah purnamané nemu manis becik anggén mapeningan syagayang cening mabersih makeramas tur masalin baju ané kedas saluk suud kéto lan ka pura sarengin bapa mangresik apang puput manut sakadi swadharma.

47) kasarengin krama désa masih bareng mareresik kéwala tuah di jaba ngelanturang ka pasisi nuduk sarwa luu plastik macégcégan dini ditu makacakan mageburan ngaé kumél di pasisi ento patut cerik kelih ngerunguang.

48) gedé segara laména ningeh tutur kasak-kisik kakas-kékés uap-uap tan pasaut ya magedi sambilang mabekel pancing munyin montoré magerung palesé magandong di tas to bekel gedé magedi gas kailut makliéng pesu ka jalan.

49) dané mangku ngusud tangkah jron hatiné kairis sakit tangkah karasayang lwir matatu tan pagetih suba liwat molas menit kulkul banjaré maklentung panumaya sampun galah pacang ngayah ka pasisi krama tedun banjaré teka pabriak.

50) galahé sampun jam sia duang jam sampun mamargi mareresik kapuputang sampun manut kadi apti krama mulih sakabesik di pura taler wus puput padang di gedong butbuta toya anyaré kaséhin bilang bucu masih galang pakuranyab.

51) ujarang gedé di marga nau maring dagang kopi dagangé di dajan sowan nembé gedé teka mai patiojog ngalih pasih apang joh uling pagubug mulané ya pangendutan di warungé sing makisid ya mapaku mangorta neked ka sanja.

52) ada raris né nakonang jero niki saking napi tetumbénan panggih tiang i gedé nyaut mamunyi mula tumbén tiang mai tiang uling sowan dauh anaké malih negesang ngaba pales jero mriki ten ja weruh anak mancing mriki kapah.

53) driki segarané lanang ombaké tegeh tan sipi jeroné apang waspada genahé sengka yén mancing malih mangda kaplapanin tusing dadi caah-cauh tapak batisé prayatna apang ten ombaké maid akéh lumut alih celahé di kaang.

54) i gedé nyaurin lantas kenyemnya mésem nimpalin eda beli sumandéa tiang nak lekad di pasih pasih ija gén tyang bani kéto gedé mredo tutur maancitan ling tegakan lantas ya tuun ka pasih nuju enjung ditu majujuk tan porat.

55) ditu ya matungked bangkyang saha ngerasayang angin duk surya séndéh ngawanang i gedé nabdabang pancing masang barén katap-kitip cepéd sampara ka banyu pancing ulung di tengahan lantas gedé nganti-nganti yén bé nyegut lakar siaga kedenga.

56) makelo ya mangantosang pancingé rasa ngamahin iwaké depina ngajar aliha celah ngedengin béné karasayang nitdit talin pancinganné ngangsuh kedang-kedeng tan rérénan nglawan pancing angkih-angkih to kabantus limané kanti bikulan.

57) sapanengan saling lawan i gedé sing mapikolih laut déwékné manguman ulyan ya kélangan pancing palaibang iwak ngesir manantang ya kauk-kauk tan dumadé ring segara toyané masepak gelis ngriem nglimun rauh cihna durmanggala

58) ring segara baya agung janten prapta langité warnanin tatit segara masepak di tengahnya medal téja sapaneleng sawang ngendih dinginné nyambal bias ampuhang angin.

59) kamemegan i gedé kekeh tan molah mara ngeh pasihé sepi déwékné didian mageluran boya bisa caket manyangket di bibih apaliatan dedeté buka tarib.

60) tan alama saking tengahing sepakan magrudug swarané ngrincing ada kapal mas malayar ngambang di wiyat to maswara kencrang-kencring sakadi gongsyang kadulurin gong béri.

61) jong kencana di duur i gedé ngambang i gedé bedik sing ngrisik rasa déwék murca lantas wénten anak lanang sampun lingsir boknya putih ngadeg di kapal di duur tolah-tolih.

62) gegelisan kaki tua ngradab kiwa pramangkin nurunang jaring halus kadi sutra jaringé nyaup nugraha katadah menék ka langit munggah ring kapal i gedé jangkut jaring.

63) sengal-sengal i gedé lusuh nengkayak batisé kasangkreb dingin bulun kalong serab aduh ija jani icang sumeken icang mangipi klangen bas liwat asa mara di pasih.

64) kaki tua mangucap munyiné serak dong cai enu ngacingin tingkahé maboya dini jakti nora supta cai ajak kaki jani menék di kapal lakar nglayarin pasih.

65) macengehan i gedé manyigit awak lengenné telah kasigit karasayang ngaap né sigita kanti barak sekén icang sing mangipi kenehnya dangsah kaki bungker manolih.

66) cening sayang bagus campah nanging getap cai kal ajak ka puri ring teleng segara ngaran puri ratnakara sang katong dot nemu cai réh cai mutang apang inget nawurin.

67) makesiab i gedé macueng nongklang tan panolih ngalih tepi manuju buritan lantas mangentungang awak keneh pang ulung di pasih wus ngutang awak ulung di kapal malih.

68) ngulang-ulang ngentungang awak ping tiga patuh ka kapal mawali sing sanggup makiba i gedé makaik nyebak i kaki tuah mabalih gedé magaang manyembah ring i kaki.

69) ampurayang kaki tulung lébang tityang kaki icén tityang mulih balik dauh sowan reraman tityangé jumah apang ten paling ngalihin pianak tunggal tyang tusing ngelah adi.

70) kaki ngucap cai bas lebian satwa tusing perlu ngemogbogin iring dogén gelah cuteté cai prayatna i kaki manuduh raris uduh puhawang sigra ko ngarung tasik.

71) raris mangkat kapalé ngawit malayar mawali tengah jeladi manyusurin toya sawang pelung kakatonan bayuné pakeh ngesirsir banyu masepak sampun maatep malih.

72) sayan liwat langité galang apadang dudu kadi sedeng wengi galang tan pasurya toyan lawana dumilah saking samping ketis-ketis ngenyudang arsa lwir mapica pabersih.

73) toya jimbar tusing ada désa ngenah palayaré ngaja kangin i gedé préksanan sing nawang kija abana iteh majujuk pedidi mabalih ombak nyaruang jerih hati.

74) ngeh déwéknya di kapalé dahat umyang kasesekin olih munyi ada kedék ngakak ada ngeling maselselan maya-maya ada kaik tan pajlema gedé ngadén memedi.

75) kaki tua manuju gedé umara muané mahias kenyir cai jani syaga imang neked ring jeroan umatur cai plapanin da ngawag-ngawag bebikasé ginanti.

76) kocapan kapalé agung mangkin naneng ring jeladi manggaré raris kakutang toyané menék prejani kadi rasa keni sunglap kapalé manjing ka tasik.

77) gedé untag-antig gelu nepuk toya tegeh ngenjik kadéna kapalé bencah kaludan di tengah pasih sinah tuara madaya di muncuk cunguh ngemasin.

78) munyin pasihé magrudug kadi pacang mubar gumi i gedé nekepin mata tusing bani nolih samping di suba gerehé ilang i gedé mangedat paling.

79) karasa guminé suung soléh manyaputin hati awakné rinasa kambang di arepné liwat pai mara gedé jani nawang déwék di dasaring tasik.

80) déwéknya sumingkin bingung adi bisa déwék dini buin ja tusing bebekan lantas ya nylehseh ngelangi kancit ya kacadang tampak mabungut kasangkét pancing.

81) i tampak mangidih tulung jero sang adué pancing ambil pancingé diolas bibih titiangé sakit i gedé ngejoh mablesat nepuk bé bisa mamunyi.

82) drika ring dasaring banyu jimbaré tan kadi-kadi tan kaweruh paran-paran tan keni kauh lan kangin maliha kelod lan kaja i gedé manyibak sepi.

83) sayan doh wénten bé layur cakalang malih tenggiri malih tamban mapuliran yéka pangisining tasik tan mari iwak kacangan saha sulih buntut kuning.

84) taler aju tutuk munju i pogot neher ngimpasin sembilang mengkeb di luang duur ipun iwak ricik grita mangipukin bias tan katon olih lemading.

85) i gedé amurang laku malih matemu i kaki suba wangsitin prayatna nguda cai joh magedi jalan tututin manira ajaka nangkil ka puri.

86) i gedé nutut di ungkur ri kala kaki ngelangi kantun di dasaring toya saking doh matéja rawit sayan nampek sayan sinang tur kapangguh wénten kori.

87) koriné masepuh tatur mahias antuk cawiri murdanyané kresnadana masusun-susun malapis tur kahias pinggan sutra matémplék di témbok kori.

88) prabané dahat ulangun yukti jeroan wong luwih kakemit olih gebagan saksana nyembah ring kaki raris kabungkahang lawang ngranjing nuju ancak saji.

89) nataré linggah kadulu batu-batu sami rukmi kerikilé nawa ratna bungkalanné masih manik mabejug tur makacakan pastika padrewén haji.

90) i kaki ngojog manguntur i gedé polos nututin panjaké akéh gumanyah nanging makasami nyamping sapangrauh kaki tua sané nangkil sareng kalih.

91) sang kaki laju umatur sabda alus nyakup asti nguningang sapanangkilan panjaké sareng manyiwi singgih maha pangempuan sané mangkin durus mijil.

92) klentung-klentung gendonganné nguci manyambut sang katong praya ida tedun ring panjaké ring manguntur pacang napak mangkin reprep meneng sami subakti ring ratu.

93) sumar harum pudak lan kasturi wanginé makesyor ganda patĕh kadi ring daraté lengleng bungeng asing mangungasin ring natar makilit suganda wong agung.

94) ida metu pariwara ngiring sami wadon-wadon tan pacéda ngiringang gustiné maka ratu sang maraga istri kadi mas masangling rupa listuhayu.

95) manik banyu nakan ida putih wangkong ida maros siratmaya kadi don mimbané ngemu madu baos ida manis simsim ring tarjini kuacanya bludru.

96) wastra pelung senteng ida gringsing teteledan kaot lungsir permas wastran ida ngrényéb jagasatru pinggel ida ngendih roma kadi mangsi mapusung kekupu.

97) sang aratu pascat maring niti solah ida reko kadi sang hyang ratih ring guminé stata nyuluh ri kalaning wengi nénten wénten tanding kotamaning wibuh.

98) jakti sampun yén tengah jeladi wibawa tan paro kadi sang hyang jalapati reké ring arnawa ida ngamertanin dadi sangu urip pangweruh mangalun.

99) ratu ayu né mangkin malinggih i kaki matédoh manguningang saprakaranyané singgih ratu titiang mawali sampun mapikolih kadi arsan ratu.

100) ratu dumun manitahang gelis mangarungin pulo ngruruh srana nangkebin mesehé wantah penyu kadi mas sinangling tundun mrajah sasi mangda penyu buntut.

101) gedé bingung tusing ngerti orti panangkilan angob matolihan nuju ka déwékné ada laut anak kisi-kisi pastika jayanti réh ba maan penyu.

102) ratu ayu mangandika raris sinah acé kasob mula paman andelan nirané ratu ayu raris manakénin cai penyu mami misadya ko nulung

103) kaki nulud i gedé kawélin adi cai kolok dong saurin andikan idané gedé nyaur tityang nora uning tityang nénten manggih dija wénten penyu

104) ratu ayu ida ica ngikik gedé tuah bengong nolih panjak konyang bareng kedék sapandurat sang ratu nauhin parekanné kalih pang ngalihang suluh.

105) raris sampun parekanné linjik gedé tuah ngoyong tusing nawang lakar nglampah kénkén tan makelo dampinganga cermin i gedé maekin awakné masuluh.

106) wus masuluh i gedé ngerejing awaknya makesyong suba tatas awak ipun séjé mula patut rupané masalin mangkin nora jadmi ya marupa penyu.

107) uduh ratu tityang nunas sisip tityang raré belog dados tityang nampi buka kéné tityang nunas mangdané mawali mangda lédang ugi sinomya ring ayun.

108) ratu ayu mapawarah cai ajak gelah dini wiréh jagat kabrebehan béngbéngang kupingé jani nira pacang muter indik apanga cai sing takut jani cai dasar toya nira prabhanéka sandhi dadi ratu ring nagara ratnakara.

109) nagaran ingsun raharja mulané di dasar tasik rauh pangéndaning titah ada dusta ngusak-asik nagih ngrusak linggih mami ya manantang dadi satru reko jlema uling darat laut umolih kasaktin sané dumun ia pecak wong bendéga.

110) satwané atitakala ia mayoga sesai majapa muah dharana tuah nginem toyan pasih lan majemuh ring kikisik asing kambang to kapupul wantah to dogén tadaha sapunika nora mari roras tahun ya matapa nénten obah.

111) hyang bhatara raris swéca tekén ya né madan lenting sinah pacang kanugraha kadagingin manut apti apa pacang tunas cening sinah bapa mapisanggup i lenting raris manunas mawisésa prama sakti tuuh batu salanggeng kocak segara.

112) kadagingin pinunasnya nanging nénten purna sami wénten sané katanggehang nénten ya kapica urip sané langgeng kadi tasik pinunasé kapaurup cening nénten lakar bhrasta tekéning jadma ring gumi tirah gunung saha soroh catur warna.

113) déwa muah bhuta kala lan pakaryan pandé wesi mwah sajroning madanta twara kal sida maténin cening lakar sakti mandi sarwa gering pacang tampu ento panugrahan bapa nanging cening apang milih jalan lampus ané kénkén kaedotang.

114) i lenting raris manunas yéning delaha ya mati apang bakat mati tawah mangda mati tatak jaring dugasé mangadu jurit kasengkalén penyu buntut kéto ya ngalih dalihan sumangdané langgeng urip sapuniku dayané ngekes angkihan.

115) suba misi panunasnya lega hatinya tan kadi kemu mai ngebug tangkah para wongé nyembah bakti désané telah pugpugin gelis manahnya magebug ngandisang segara wéra masadana olih jurit biang-biung prasama watek sumedang.

116) segara telas karusak olih musuhé durbudi mrasa sampun mawisésa nanging tetep ya maperih apang mangelidin pati srana pejahé karuruh penyu ring sajebag jagat kapunduhang olih lenting to karimpung kapejahin tur katadah.

117) ento kawit kadadénnya mapuara cai dini manindihin ratnakara i gedé mangucap raris nunasang pacang mapamit duh ratu tityang ten purun punapiang antuk tityang pacang nandingin i sakti tityang punggung dikapan pacang prasida.

118) dados tityang katitahang tityang nénten saking driki tityang saking dauh sowan lewihan ja tityang mati katimbang katemah juti kelak-kelik dadi penyu boya tityang mangkin lancang manut tityang ratu sakti nénten urung ratu sida ngwales musuh.

119) panangkilan sami kesyab patihé nengéng prajani sang ayu neher ngandika nira tan wenang majurit manut bisamané riin yéning wénten ratu putus manyeneng ring ratnakara bilih yening mraga istri nénten patut lunga ka tengah palagan.

120) yén ingsun paksa malaga sinah musuhé kalilih nanging jagaté pralaya punika sané kelidin wisyané pacang nyarinin ombaké lakar amubur sakancaning lemahpada pacang rusak lan karigrig tur kasapu jantos putung tan pasésa.

121) cai gedé da sangsaya manira praya ngicénin cai kabekelin sastra bisa anggon bekel jurit malih dadi sangu urip sinah cai sing malalung sastrané anggén busana manian yén cai mati boya cepuk nanging sastra tatindihnya.

122) runguang tutur manira sané patut rangsuk cai aksobhya mungguh ring mata lanturang antuk samadi ratna sambhawa ring kuping amitabhané ring irung mogha siddhi cangkem sira wérocana pusuh yukti ento rangsuk pancéndriya dadi jnana.

123) untek cai tasik minyak peluh cai tasik asin warihé segara cuka empehan asem ring daging tasik tebu ngaran getih pehan anyaré ring sumsum paesé segara tawah sapta samudra puniki tutur-tutur aywa ta kita malupa.

124) pascat tasik jero jaba regepang ento sesai aywa nunanin prayatna rahasya temen puniki wantah busana sang yogi duk ngruruh margané butul nunggal ring sang hyang wisésa puniki panganggén becik yéning kahyun astagina dapet juga.

125) i gedé sing inget genah suba bas kaliwat paling nguda bisa ada perang tur nagara dasar banyu malih ngortang kawisésan né sayukti tahun kuda niki kocap.

126) ya inguh manogog bega mangkin sampun las ring hati mulih boya lakar sida katimbang matiné ngapung luung mati nangkep yuda manindihin nagara ring ratnakara.

127) puput mawarah punika ratu ayu ngregep mangkin uleng saha ngranasika amusti ngatepang suku tan suwé angelar mudra saha sruti kabaos wisnu panjara.

128) raris medal téja ngabar awak penyu kasaputin laut prejani ngedénang sayan kembang sapuniku gedénan tekén janggolan panjak sami nadyang gedé bebengongan.

129) tan swé sama gegesonan galahé sampun cumawis yéning manut ring subaya margan siat dauh telu kapilih dina purnama kocap riin nika sampun kacumpuang.

130) kaki tua bangun nrajang sambilanga nanggar keris panjaké sareng masuryak sami ngiring sahur manuk sampun ngagen ka ranangga ngamélanin teguh puri ratnakara.

131) kaki tua masiluman rupa kakya perang kaki panjak sami mangiringang prasama juga masilum dadi iwak maéndahan agung alit balané nabdabang gelar.

132) gelaré masupit udang kakya perang sénapati kakya putih gelar kiwa gelar tengen kakya tutul pai saksat ngaba tumbak bé tenggiri marérod kalawan kakap.

133) sampun sami padha tyaga cumpu masemayapati manindihin ratnakara saking musuhé mangebug liwatang pamargin gelar saking puri nuju ka karang palagan.

134) gelar sesek mawurahan ring dasar toyané pingit sangka ring joh ngenampekang wénten né teka mabejug tuara lénan bala samar wadwan lenting bareng manengsek ring rana.

135) jrangkong muah soca tunggal basang bedél magagitik lawéyan mananggar pedang pepengkah lan basang gatul ngaba kléwang katon mangan wayan lenting makulambi sarwa petak.

136) pangawin gegemelannya malih kerisé kasungklit yéning becik manlektekang pitung dasa ya matuwuh monto yan sing pelih narka kumis putih jénggot samah warna kapas.

137) i gedé tan pati ningal nanging yan ia ngiwasin asané pedas ring goba kadi rasa sai tepuk ija sai tepuk icang anak mwani magoba cara nénénan.

138) i lenting kenehnya jengah ri sampun musuh katolih sagét madué bedawang nghing netep mamunyi ngacuh cai watek ratnakara sandang pilih manungkul apa pralina.

139) mumpung icang enu lega serahang puriné sami sing kéh éman ring angkihan katimbang déwék mamuyung awak mati puri ilang pilih besik angkihanné sekeb jumah.

140) kakya perang laut mojar bas mamunyah munyin cai da buin nglantangang orta jalan dini saling pagut mara ja madan ksatriya dyapin mati ganjarannya wisnuloka.

141) sang kalih saling manguman suba saling pasengitin tan sah perangé mamarga kacihnayang swaran sunggu bala samaré masuryak gelar kalih matemu saling tangkebang.

142) dasar segara majurag perangé rames tan sipi ada nyepeg ada nyingat ada mupuh ada nyegut saling maruket-ruketan tan makirig padha nglekasang upaya.

143) pada ngalih gegelikan watek bé kasepeg mati bala samar akéh pejah makacakan antem batu ada bé sétsét tur sigar angudili toya putek sawang barak.

144) bangkéné ngambang masahsah toya usak mabo alid watek wira pada lina kakya perang dané kantu bedél basang mati tigas kakya putih awaknya pegat dadua.

145) i pepengkah lan lawéyan makadua masih mati perangé pada jayanya kelés cadik kakya tutul balané twara masisa wantah kari i lenting lawan bedawang.

146) i lenting nguber bedawang bedawang becat ngelangi i lenting dahat makesyab sayuwakti penyu buntut ané uber ngemenékang raséng hati sida adur manangkebang.

147) ih bedawang tan paguna cai méla ratnakara suba lilih gelah suba menang cai dogén né masisa melah suba buka jani barengin gelah kal baang genah luih.

148) tan pasangkan bayun i gedéné rosa minab suba titah widhi wanén tan pahalang i gedé marasa galak bisa manglayang ka langit ia manrejang i lenting kapatitis.

149) sagét mesat i lenting maklieng ilang bisa pragata makelid ngadeg duur toya mrasa déwék kena tantang i lenting praya ngwalesin maseru pregas ci sing nawang nyén kai.

150) surya ngentak i lenting ngeréhang mantra dot ngédéngang awak sakti kaang dadi saang toyan jladi dadi minyak saking temahé i lenting laut mangucap apiné di hatin kai.

151) geni maya karegepang maring jnana saking cunguh pesu api kasimbuh ka toya raris manglalah sagrehan tan sah dadi tasik geni mangabar-abar kukus selem makilit.

152) nepak dada lenting kedék kakak-kakak i penyu buntut mamunyi mirib ci sing nawang segara ring jaba tunggal lawan segara né alit di tengah awak taler madaging tasik.

153) tan alama i gedé milu ngregepang makélingin aji singid pawisik sang ratna indik hyang sapta samudra padem géniné ring tasik mangjati mula toyané waluy hening.

154) panes bara di awak lenting karasa kadi katunu ban api sing bisa nahenang awaknya paling manguyang laut macebur ka pasih sing malaradan i lenting kaak-kiik.

155) i bedawang ngucap lenting kena sapa dadi minyak ikang getih galih dadi saang sumsumé kasusup rasa di nadiné wisya mandi jeroning awak ling tengah tunjel api.

156) gela-gela i lenting nunas ampura sinah kéné jalan mati dapet dadi karma ia jani manunasang uduh jero penyu sakti matiang tityang nanging matatak jaring.

157) sagét medal wénten ta jaring mapentang twara ada nak mangisi ngalih luan wétan sambilan nahen sangsara i lenting las nyambut pati nyakupang tangan raris ya manauhin.

158) né pawekas anggon sentana wekasan gelah salah nglekas margi bas ngulurin indrya mogi lekad malih pisan singsalé nénten nututin mangjanma swasta molih gantiné luih.

159) sasentanané inghulun samaliha mangda éling subakti ring pamugeran genahé ditu maka wit taler ring pura segara genah sun manyraya nguni.

160) sukat mangkin apang nugtug sasentanan tityang yukti mogi ngayahin bhatara mogi ya semayapati dadi juru sapuh tatas nebusin tityangé cinging.

161) punika sarin sengauk semayan tityangé iki pinaka paguruyagan taler tabuh gentuh suci katur ring sang hyang segara sané sampun rusak mami.

162) raris tityang taler sanggup ri kala bénjang numadi maméndét lakar ayahang ring ajeng bhatara pasi punika lenting mangucap ucapnya maruntut tangis.

163) raris i penyu manglamuk lenting ulung uling langit payu ya mati matatak tekén jaring duur tasik awak lemes tan pajiwa ia mati tan pagetih.

164) kancit jawuhé manurun kadi rasa langit tusti i gedé laut nlektekang prejani makleteg méling patuh sakadi muanya kahanan mua sang mati.

165) saksat i gedé masuluh mirib kéné ya yén lingsir tur kantun magoba jlema sadurung jani masalin manganggon goba bedawang makada déwéknya kingking.

166) jani bayun gedé ngenduk sawa baktana ka sisi kébekan kasambut kadang dingeh tityang besen beli sinah pacang kalaksanang kéto ucap ané istri.

167) i gedé matulak nglantur mawali ka dasar tasik malih kapangguh i tampak ané dumun sangkét pancing jero tityang madiolas diolas ambil tang pancing.

168) i gedé suba sing takut masarana antuk bibih pancing ento kakelésang laut i tampak mamunyi inggih jero matur suksma mangkin tityang nénten sakit.

169) i gedé raris masaut jani tiang kal matari yuktiné titiang dija adi ja soléh kapanggih soroh bé bisa mangucap ada puri dasar tasik.

170) malih ada nak magebug seken-seken anak sakti ia né matiang tiang buin sada di pasisi anaké mabaju lawas makamen ya sarwa buik.

171) to makada tiang bingung yéning orang tiang ngipi kéwala seken rasayang i tampak manyaut gelis sinah niki ratnakara mula akéh wongé sakti.

172) apang uning indik tahun niki tahun pitung bangsit nanggu pitung dasa dua jeroné ampunang paling jero ring saka atita mriki sangkan tuduh widhi.

173) sampunang jeroné sungsut puput niki jero swasti wiréh jagat sampun kerta jro pacang énak mawali kocap karma nemu gelang utang sampun katawurin jalan mangkin jero mantuk gelisang manuju puri tityang pacang mangiringang pamarginé nénten mari sampun prapta ring jabayan bakatanga mangmung sepi.

174) raris nuju ka manguntur akéh watek iwak mati wénten ngambang wénten nylempang rasa mati tan patangkis kahananné melad prana hredaya tulya kapatik.

175) dyapin menang rasa lacur subayané kaingetin sadurung luas maperang mangiket semayapati raris ia manabdabang déwék lakar mélapati.

176) tan dwa ngeling gedé penyu yéh panon pesu akikit dén gelis dadi mustika warna jenar mangentérin raris mustikané mlesat musna saking tungtung aksi.

177) bé mati sami mawungu i gedé angob manolih ratu ayu raris medal minab wau sareng pati ida raris mawacana mangkin jeroné wong luih.

178) suud jero dadi penyu dis mangkin jeroné mulih prama suksma atur gelah yasanta ageng siniwi wus ngaméla ratnakara saturunta mogi sugih.

179) ombaké keras magebur gedé kababang prejani masadah betén ketapang laut ia nolih jriji suba cara jati mula mua lantas kausudin.

180) ngipi kéh cang mara bangun orang ngipi asa tusing nguda ja kanti lepégan sing ada bisa nyautin ditu ia mapangenan wantah tresnané ngesengin.

181) suba liwat engseb ai kocapan gedé nugraha nu nengkul di pasisiné korak-korék ngambar bias nyaruang sepi matembang sambilang mabalih yuyu iseng liwat grayang-grayang.

182) asué ramé wong prapti tekané pada padampyak ajak kutus ya majéjér mangiwasin anak negak panuluné joh marawat lantas ada anak nyengguh né okan mangku segara.

183) i gedé kadandan mulih kaabih salantang marga pabaliha kén banjaré cerik kelih tua bajang enggang engep mangantenang wiréh ya suba aminggu ilang tusing bakat jumah.

184) guruné nyagjag prejani sing bisa ngengkebang liang kéto masih éménnyané mangelut sambil sigsigan i gedé lantas nlatarang rasayang boya aminggu tiang ditu arahina.

185) ia ngorta pilih-pilih ya ajaka ka jeroan ditu tengah segarané mepek olih uparengga amonto dogén ya ngorta tusing ja misi manutur maperang kalawan dusta.

186) ia lantas mikélingin ida dané krama banjar ngiring jaga segarané dugas tiang kaengkebang tityang kabesenin nyaga mangdané sampunang campur tur malaksana mangawag.

187) mangkin gedé sampun éling nindih nyaga ratnakara rahayu tan wénten séjé rauh warsa nyalin warsa i gedé sing bani léngah ayah sampun puput katur punika dados kajatyan.

188) kocap gedé sampun lingsir ayahé juga tan pegat nyabran ring dina redité kaki gedé ka segara makayun sami katapak ngawit ring segara siyut bin aminggu pasih tyosan.

189) nuju kauh ya ring lebih bin aminggu ka cucukan laut maring mascétiné tan lali ngaturang canang ngelantur pasih salukat ring kuramas bin awuku nglantur ring segara gadang.

190) ring saba redité manis tur érjéruk kalanturang muah ka rangkan lanturé sanding rangkan ngaran pabyan nuju manis tumpek kandang marginé raris ka kubur gumiciké méh panguntat.

191) yéning cucuné nakonin kaki gedé manegesang kaki seneng nuju panté maka cara masliahan sapisan masih malajah bareng ajak cucu-cucu pang wruh nyayangang segara.

192) nuju redité ring langkir kaki gedé ka segara nanging jani luas néwék ring mascéti nika kocap i kaki mabalih ombak kanti suryané sumurup enu masih kelangenan.

193) inggih puput satwa niki bas kalajok antuk tityang malémbat midehan reké basa tur satwané séngglad bas ja akéh kantun kirang twara patut mungguh pupuh singsalé dadiang payas.

194) dugas tityang ngardi gurit kadi nyantos pasih asat sakadi ngampel tasiké sinah nirdon kapuara napi malih basa matah bakat sanget tityang nyungsung kanti purun mriki tohang.

195) sampun puput tityang ngurit maring banjar lohakara ring pondok tityangé nénggél apan kalingkungin jurang ring tepi siring kanggéang pradésanya katulikup ring kabupatén gianyar.

196) tanggal nem kadasa lingsir sogata paing menala maulu lan basah gedé siwa sakti lan manusa wuku ringgit ingkel mina gurit niki swasti puput bhuta tasik sang-atunggal.

197) ong sembah hyang pasapani sarwa papa winasanam paripurna tad astuté ratna sambhawa nugraham lod prabha sandhi wijaya sastra wibhuh prama caksur sagara kretih utungga.