Prasuling ring Hamelin

᭛᭐᭛ᬧ᭄ᬭᬲᬸᬮᬶᬂᬭᬶᬂᬳᬫᭂᬮᬶᬦ᭄᭛᭐᭛

Prasuling ring Hamĕlin

 

᭛ᬅᬯᬶᬖ᭄ᬦᬫᬲ᭄ᬢᬸᬦᬫᭀᬲᬶᬤ᭄ᬥᬀ᭛᭐᭛  

Oṁ Awighnamastu namo siddhaṃ

 

᭑᭞       ᬲᬶᬗ᭄ᬕᬶᬄᬳ᭄ᬬᬂᬧᬰᬸᬦᬵᬣᬲᬂᬯᬭᬪᬝᬵᬭᬧᬶᬦᬸᬚᬶᬭᬶᬢᭂᬗᬄᬦᬶᬓᬶᬂᬢᬸᬮᬶᬲ᭄᭞

ᬢᬦ᭄ᬮ᭄ᬬᬦ᭄ᬢ᭄ᬯᬦ᭄ᬓᬸᬫᬯᬾᬄᬲᬤᬵᬭᬳᬬᬸᬭᬶᬂᬪᬸᬯᬦᬫᬢᭂᬫᬳᬦ᭄ᬚᬸᬕᬵᬩᬸᬗᬄ᭞

ᬲᬃᬯᬧ᭄ᬭᬵᬡᬶᬳᬶᬢᬵᬯᬲᬵᬦᬭᬶᬫᭂᬦᬾᬬᬭᬯᬸᬳᬭᬶᬚᭂᬫᬄᬦ᭄ᬤᬢᬦ᭄ᬲᬸᬭᬸᬤ᭄᭞

ᬦ᭄ᬤᬄᬲᬦ᭄ᬢᬩ᭄ᬬᬲᬳᬵᬬᬦᬶᬂᬭᬢᬸᬘᬸᬫᬡ᭄ᬝᬓᬫᬦᬶᬭᬸᬭᬶᬲᬂᬓᬯᬷᬰ᭄ᬯᬭ᭛

1.           Singgih Hyang Paṡunātha sang wara bhaṭāra pinuji ri tĕngah niking tulis,

Tan lyan twanku maweh sadā rahayu ring bhuwana matĕmahan jugābungah,

Sarwa prāṇi hitāwasāna ri mĕne ya rawuha ri jĕmah ndatan surud,

Ndah santabya Sahāya ning Ratu cumaṇṭaka maniru ri sang kawīṡwara.

 

᭒᭞       ᬤᭂᬦᬶᬂᬫᬹᬥᬫᬦᬳ᭄ᬓᬸᬫᬗ᭄ᬓ᭄ᬬᬫᬗᬶᬓᭂᬢ᭄ᬘᬭᬶᬢᬚᬸᬭᬸᬲᬸᬮᬶᬂᬲᬓᬾᬂᬚᬺᬫᬦ᭄᭞

ᬬᬾᬓᬵᬦᬵᬫᬲᬶᬧᬶᬤ᭄ᬧᬶᬧᭂᬃᬳᬶᬦᬸᬘᬧᬦ᭄ᬢᭂᬓᬧᬶᬭᬧᬭᬲᬚ᭄ᬚᬦᬾᬂᬓᬸᬮᭀᬦ᭄᭞

ᬳᬵᬓ᭄ᬬᬵᬦᬾᬓᬶᬯᬶᬦᬶᬫ᭄ᬩᬭᬶᬂᬓᬯᬶᬦᬗᬶᬂᬳᬥᬫᬢᬭᬢᭂᬫᬄᬦ᭄ᬬᬤᬾᬫᬫᬶ᭞

ᬭᬾᬄᬤᬸᬲ᭄ᬧ᭄ᬭᬚ᭄ᬜᬲᬶᬤᬵᬰᬳᬷᬦᬕᬸᬡᬢᬸᬮ᭄ᬬᬕᭂᬦᬶᬲᬓᬸᬓᬸᬦᬂᬮᬭᬤ᭄ᬧᭂᬢᭂᬂ᭛᭐᭛

2.     De ning mūdha manahku mangkya mangikĕt carita juru suling sakeng Jrĕman,

Yekānāma Si Pid Pipĕr inucapan tĕkapira para sajjaneng kulon,

Ākyāneki winimba ring kawi nanging adhamatara tĕmahnya de mami,

Reh dusprajña Si Dāṡa hīnaguṇa tulya gĕni sakukunang larad pĕtĕng.

 

᭑᭞       ᬳᬦᬢᬓᬣᬵᬫᬭᬶᬂᬓᬸᬝᬗᬭᬦ᭄ᬳᬫᭂᬮᬶᬦ᭄ᬢᬸᬘᬧᭂᬦ᭄᭞

ᬫᬦᭂᬫᬸᬭᬶᬦᭂᬫ᭄ᬳᬢᬓ᭄‌ᬯ᭄ᬯᬮᬸᬧᬸᬮᬸᬄᬘᬤᬸᬯᬃᬱᬦᬶᬓᬶ᭞

ᬓᬸᬝᬳᬫᭂᬮᬶᬦ᭄ᬓᬪᬖ᭄ᬦᬪᬬᬫᬹᬱᬶᬓᬲᬗ᭄ᬳᬓᬮ᭞

ᬢᭂᬓᬓᬤᬶᬯᬄᬫᬳᭀᬤᬥᬶᬥᬢᭂᬂᬫᬕᬸᬮᬸᬂᬕᬸᬮᬸᬗᬦ᭄᭛

1.     Hana ta kathā maring kuṭa ngaran Hamĕlin tucapĕn,

Manĕmu ri nĕm atak wwalu puluh cadu warṣaniki,

Kuṭa Hamĕlin kabhagna bhaya mūṣika sangha kala,

Tĕka kadi wah mahodadhi dhatĕng magulung-gulungan .

 

᭒᭞       ᬕᬺᬳᬮᬕᬶᬭᬶᬂᬫᬳᬵᬰᬦᬫᬮᬶᬄᬭᬶᬢᭂᬕᬮ᭄ᬓᬭᬸᬲᬓ᭄᭞

ᬚᬸᬕᬭᬶᬢᭂᬧᬲ᭄ᬢᭂᬧᬲ᭄ᬚᬸᬕᬕᬸᬩᬸᬕ᭄ᬲᬫᬶᬢᬦ᭄ᬮᬶᬦᬸᬧᬸᬢ᭄᭞

ᬲᬫᬲᬸᬧᭂᬦᬸᬄᬢᬶᬓᬸᬲ᭄ᬫᬲᬯᬸᬭᬦ᭄ᬳᬦᬕᭃᬂᬳᬦᬮᬶᬢ᭄᭞

ᬲᬥᭂᬧᬦᬶᬓᬂᬳᬯᬦ᭄ᬳᬦᬢᬶᬓᬸᬲ᭄ᬦ᭄ᬬᬕᬶᬭᬂᬫᬭᬸᬩᬸᬂ᭛

2.     Grĕha lagi ring mahāṡana malih ri tĕgal karusak,

Juga ri tĕpas-tĕpas juga gubug sami tan linuput,

Sama supĕnuh tikus masawuran hana göng hana lit,

Saḍĕpa nikang hawan hana tikusnya girang marubung.

 

᭓᭞       ᬩᬚᬸᬢᭂᬦᬸᬦᬦ᭄ᬫᬮᬶᬄᬓᬯᬘᬯᬲ᭄ᬢ᭄ᬭᬭᬸᬲᬓ᭄ᬩᬶᬦᬸᬩᬓ᭄᭞

ᬳᬭᬓᬓᬩᬾᬄᬢᭂᬮᬲ᭄ᬯᬶᬦᬯᬫᬹᬱᬶᬓᬦᭀᬭᬓᬭᬶ᭞

ᬧᬶᬰᬶᬢᬫᬲᬾᬲᬓᬾᬯᬮᬩᬮᬸᬂᬦ᭄ᬬᬢᬢᬦ᭄ᬧᬶᬦᬗᬦ᭄᭞

ᬧᬥᬫᬕᬶᬭᬂᬬᬯᬸᬲ᭄ᬤᬤᬶᬫᬮᬶᬂᬳᬗᬫᬾᬢ᭄ᬧᬗᬦᬦ᭄᭛

3.     Baju tĕnunan malih kawaca wastra rusak binubak,

Haraka kabeh tĕlas winawa mūṣika nora kari ,

Piṡita masesa kewala balungnya tatan pinangan,

Padha magirang ya wus dadi maling angamet panganan.

 

᭔᭞         ᬫᬸᬦᬶᬯᬢᭂᬓᬶᬂᬢᬶᬓᬸᬲ᭄ᬳᬶᬓᬫᬭᭀᬭᬯᬲᭂᬓ᭄ᬭᬶᬓᬸᬧᬶᬂ᭞

ᬓᬤᬶᬫᬗᬶᬤᬸᬂᬲᬤᬸᬓ᭄ᬕᬶᬕᬶᬕᬶᬕᬶᬦ᭄ᬬᬳᬸᬫᭀᬦ᭄ᬬᬕᭂᬭᬶᬢ᭄᭞

ᬢᬳᬶᬢᬳᬶᬦᬶᬂᬢᬶᬓᬸᬲ᭄ᬓᬤᬶᬯᬸᬓᬶᬃᬭᬶᬲᬫᬦ᭄ᬢᬧᬤᬸ᭞

ᬫᬮᬗᬸᬫᬮᬶᬄᬳᬸᬬᬸᬄᬓᬤᬶᬲᬭᬶᬢ᭄ᬫᬗᭂᬩᭂᬓ᭄ᬳᬲᭂᬗᬶᬃ᭛

4.     Muni watĕk-ing tikus ika marorawa sĕk ri kuping,

Kadi mangidung saduk gigi-giginya umonyagĕrit,

Tahi-tahi ning tikus kadi wukir ri samanta padu,

Malangu malih uyuh kadi sarit mangĕbĕk asĕngir .

 

᭕᭞        ᬤᬸᬓᬮᬭᬚᬦ᭄ᬫᬤᬾᬲᬫᬳᬋᬧ᭄ᬧᬫᬸᬦᬄᬫᬭᬡ᭞

ᬲᬧᬗᬸᬧᬤᬶᬦ᭄ᬬᬢᬦ᭄ᬳᬦᬓᬲᬶᬤ᭄ᬥ᭄ᬬᬧᬭᬵᬚᬬᬬ᭞

ᬬᬍᬯᬶᬳᬰᬓ᭄ᬢᬶᬦᬶᬂᬧᬭᬢᬶᬓᬸᬲ᭄‌ᬳᬢᬶᬪᬷᬱᬡᬬ᭞

ᬲᬓᬤᬶᬪᬝᬵᬵᬭᬥᬃᬫᬫᬗᬸᬢᬸᬲ᭄ᬦ᭄ᬬᬫᬦᬷᬃᬡᬚᬕᬢ᭄᭛

5.     Duka lara janma de sama harĕp pamunah maraṇa,

Sapangupadinya tan hana kasiddhya parājaya ya,

Ya lĕwiha ṡakti ning para tikus atibhīṣaṇa ya,

Sakadi Bhaṭāra Dharma mangutusnya manīrṇa jagat .

 

᭖᭞        ᬢᬸᬚᬭᬫᭂᬦᬾᬩᬗᬸᬦ᭄ᬭᬳᬶᬦᬯᭀᬂᬳᬫᭂᬮᬶᬦ᭄ᬫᬧᬸᬧᬸᬮ᭄᭞

ᬮᬓᬶᬩᬶᬚᬭᬵᬲᬶᬦᭀᬫ᭄ᬫᬫᭂᬧᭂᬓᬶᬂᬩᬘᬶᬗᬄᬳᬫᭂᬮᬶᬦ᭄᭞

ᬧᬥᬬᬲᬭᭀᬱᬢᬦ᭄ᬳᬸᬧᬰᬫᬾᬂᬕᬮᬓᬶᬂᬢᬶᬢᬶᬓᬸᬲ᭄᭞

ᬭᬳᬶᬫᬸᬓᬓᬵᬩᬗᬦ᭄ᬫᬲᭂᬭᬸᬢᬸᬮ᭄ᬬᬕᬚᬄᬫᬗᬾᬤᬦ᭄᭛

6.     Tujara mĕne bangun rahina wong Hamĕlin mapupul,

Lakibi jarā sinom mamĕpĕk-ing bacingah Hamĕlin,

Padha ya saroṣa tan upaṡameng galak-ing titikus,

Rahi muka kābangan masĕru tulya gajah mangedan .

 

᭗᭞       ᬲᬫᬶᬫᬲᬸᬭᬓ᭄ᬲᬸᬭᬓ᭄ᬕ᭄ᬬᬫᬦᬕᬶᬄᬲᬗᬶᬲᬂᬦᬺᬧᬢᬶ᭞

ᬦᬺᬧᬢᬶᬲᬶᬭᬵᬫᭂᬤᬮ᭄ᬮᬚᬸᬫᬦᬗ᭄ᬓᭂᬧᬶᬯᬃᬕᬓᬸᬝ᭞

ᬳᬚᬢᬲᬶᬭᬵᬕᬮᬓ᭄ᬬᬬᬶᬓᬓᬗ᭄ᬓᬸᬫᭂᬦᭂᬂᬲᬤᬬ᭞

ᬧᬸᬦᬶᬓᬸᬯᬸᬚᬃᬲᬶᬭᬂᬦᬺᬧᬢᬶᬢᬦ᭄‌ᬤ᭄ᬯᬋᬋᬧ᭄ᬲᬤᬬ᭛

7.     Sami masurak-surak gya managih sangi sang nrĕpati,

Nrĕpati sirāmĕdal laju manangkĕpi warga kuṭa,

Aja ta sirāgalak yayi kakangku mĕnĕng sadaya,

Puniku ujar sirang nrĕpati tan dwa rĕrĕp sadaya.

᭘᭞       ᬮᬚᬸᬫᬗᬸᬘᬧ᭄ᬩᬮᬦ᭄ᬬᬫᬢᬓᭀᬦ᭄ᬧᬸᬦᬧᬧ᭄ᬯᬫᭂᬦᬾ᭞

ᬓᬸᬝᬭᬶᬦᬸᬲᬓ᭄ᬢᬶᬓᬸᬲ᭄ᬳᬭᬢᭂᬮᬲ᭄ᬓᬓᬸᬢᬶᬮ᭄ᬲᬶᬦᬬᬩ᭄᭞

ᬩᬮᬫᬮᬧᬵᬫᬮᬶᬄᬓᭂᬦᬶᬕᭂᬭᬶᬂᬫᬯᬘᬹᬃᬡᬭᬲ᭞

ᬧ᭄ᬭᬚᬦᬫᬮᬶᬄᬫᬸᬘᬧ᭄ᬫᬋᬗᬸᬢᬸᬮ᭄ᬬᬲᬫᭀᬂᬫᬕᬮᬓ᭄᭛᭐᭛

8.     Laju mangucap balanya matakon punapa pwa mĕne,

Kuṭa rinusak tikus hara tĕlas kakutil sinayab,

Bala malapā malih kĕni gĕring mawa cūrṇarasa,

Prajana malih mucap marĕngu tulya samong magalak.

᭑᭞       ᬫᬗ᭄ᬓᬶᬦ᭄ᬓ᭄ᬭᭀᬥᬯᬢᭂᬓ᭄ᬩᬮᬾᬓᬸᬲᬯᬶᬭᬾᬄᬲᬂᬦᬵᬣᬢᬦ᭄ᬯ᭄ᬭᬸᬄᬮᬓᬸ᭞

ᬳᬕ᭄ᬬᬵᬲᬂᬦᬺᬧᬰᬩ᭄ᬤᬫᬗ᭄ᬯᬍᬲᬲᭀᬚᬃᬲᬂᬕᭂᬍᬂᬭᬶᬂᬫᬦᬄ᭞

ᬢᬦ᭄ᬮᭀᬮ᭄ᬬᬧ᭄ᬯᬳᬶᬗᭀᬂᬫᬭᬶᬂᬲ᭄ᬫᬳᬬᬗᬹᬦᬶᬦ᭄ᬤᬸᬓ᭄ᬥᬢᭂᬂᬤᬸᬃᬦᬬ᭞

ᬲᬗ᭄ᬓᬾᬂᬫᬹᬱᬶᬓᬓᬱ᭄ᬝᬫᬗ᭄ᬤᬫᬢᭂᬫᬄᬫᭀᬓ᭄ᬢᬧ᭄ᬭᬬᬵᬢᬾᬂᬲᬭᬵᬢ᭄᭛

1.     Mangkin krodha watĕk baleku sawireh sang nātha tan wruh laku,

Agyā sang nrĕpa ṡabda mangwalĕsa sojar sang gĕlĕng ring manah,

Tan lolya pwa ingong maring samaya ngūnin duk dhatĕng durnaya,

Sangkeng mūṣika kaṣṭa mangdama tĕmah mokta prayāteng sarāt .

 

᭒᭞       ᬯ᭄ᬯᬦ᭄ᬢᭂᬦ᭄‌ᬲᭀᬪᬬᬦᬶᬂᬳᬸᬮᬸᬦ᭄ᬭᬶᬲᬧᬲᬂᬰᬓ᭄ᬢᬶᬧ᭄ᬭᬲᬶᬤ᭄ᬥᬫ᭄ᬬᬲ᭞

ᬬᬦ᭄ᬲᬶᬤ᭄ᬥᬧ᭄ᬯᬬᬫᬗᬼᬩᬸᬃᬫᬭᬡᬭᬶᬂᬓᭀᬝᬵᬵᬢᬶᬲᬫ᭄ᬧᬹᬃᬡᬬ᭞

ᬯ᭄ᬯᬦ᭄ᬢᭂᬦ᭄‌ᬳᬃᬣᬧᬶᬭᬓ᭄ᬧᬯᬾᬄᬓᬸᬭᬶᬬᬕᬸᬮ᭄ᬤᭂᬦ᭄ᬲᬾᬯᬸᬢᬦ᭄ᬮᭀᬂᬳᬶᬓ᭞

ᬬᬦ᭄ᬲᬶᬤ᭄ᬥᬓᬤᬶᬫᬗ᭄ᬓᬦᬾᬓᬤᬤᬶᬓᬾᬗᭂᬢᬧ᭄ᬭᬢᬶᬚ᭄ᬜᬵᬫᬫᬶ᭛

2.     Wwantĕn sobhaya ning hulun ri sapa sang ṡakti prasiddha myasa,

Yan siddha pwa ya manglĕbur maraṇa ring koṭātisampūrṇa ya,

Wwantĕn artha pirak pawehku ri ya guldĕn sewu tan long ika,

Yan siddha kadi mangkaneka dadi kengĕta pratijñā mami .

 

᭓᭞       ᬭᬶᬂᬭᬸᬦ᭄ᬢᬸᬂᬧᬚᬚᬃᬳᬶᬓᬂᬩᬮᬯᬬᬧ᭄ᬯᬯ᭄ᬯᬂᬮᬦᬂᬓᭀᬚᬭᬦ᭄᭞

ᬯᬲ᭄ᬢ᭄ᬭᬦ᭄ᬬᬾᬓᬭᬫᬾᬫᬯᬃᬡᬤᬤᬸᬭᬓ᭄ᬢᬵᬓᬵᬭᬲᬫ᭄ᬧᬶᬃᬓᬸᬦᬶᬂ᭞

ᬫᭀᬭᬸᬩ᭄ᬓᬜ᭄ᬘᬸᬕᬭᬶᬂᬕᬶᬕᬶᬃᬦ᭄ᬬᬫᬲᬯᬂᬲᬶᬦ᭄ᬤᬹᬭᬢᬗ᭄ᬓᬾᬩ᭄ᬧᬯᬮ᭄᭞

ᬮᬸᬫ᭄ᬭᬵᬜ᭄ᬚ᭄ᬭᬄᬭᬘᬡᬦ᭄ᬬᬢᬸᬮ᭄ᬬᬓᬤᬶᬓᭂᬫ᭄ᬩᬂᬲᭀᬓᬯᭀᬃᬲᬸᬫ᭄ᬪᬬ᭛

3.     Ring wuntut pajajar ikang bala waya pwa wwang lanang kojaran,

Wastranyeka rame mawarṇa dadu raktākāra sampir kuning,

Morub kañcuga ring gigirnya masawang sindūra tangkĕb pawal,

Lumrāñjrah racaṇanya tulya kadi kĕmbang soka wor sumbha ya .

 

᭔᭞         ᬭᬹᬫ᭄ᬦᬶᬂᬭᬹᬧᬧᬗᬸᬲ᭄ᬫᬮᬶᬄᬳᬤᭂᬕᬚᬗ᭄ᬓᬸᬂᬲᭀᬘᬦᬾᬢᬵᬭᬓ᭞

ᬓᭂᬫ᭄ᬩᬂᬭᬵᬚᬲᬮᬵᬢᬶᬢᬸᬮ᭄ᬬᬫᬗᬶᬲᭂᬧ᭄ᬓᬂᬲᬃᬓᬭᬦᬃᬫᬤᬵ᭞

ᬮᬸᬜ᭄ᬘᬶᬧ᭄ᬦᬶᬂᬪ᭄ᬭᬸᬓᬸᬢᬶᬦ᭄ᬬᬢᬸᬮ᭄ᬬᬢᬚᬶᬮᬾᬦ᭄ᬳᬸᬦ᭄ᬢᬸᬦ᭄ᬬᬫᬰ᭄ᬭᬷᬕᬤᬶᬂ᭞

ᬢᬸᬃᬢᭀᬧᭀᬗᭂᬦ᭄ᬬᬫᬶᬭᬄᬓᬢᭀᬦ᭄ᬲᬓᬤᬶᬩᬂᬯᬾᬢᬦ᭄ᬢᬶᬦᭂᬫ᭄ᬧᬸᬄᬥᬦᬸ᭛

4.     Rūm ning rūpa pangus malih adĕg-ajangkung socane tāraka,

Kĕmbang rājasa lāti tulya mangisĕp kang sarkara narmadā,

Luñcip ning bhru kutinya tulya taji len huntunya maṡrīgading,

Tur topongnya mirah katon sakadi bang wetan tinĕmpuh dhanu .

 

᭕᭞        ᬫᬗ᭄ᬭᬧ᭄ᬲᬂᬚᬮᬸᬭᬶᬂᬢᭂᬗᬄᬩᬮᬲᭂᬲᭂᬓ᭄ᬫᭀᬚᬃᬲᬶᬧᬸᬂᬭᬶᬂᬳᬋᬧ᭄᭞

ᬳᬾᬗ᭄ᬯᬂᬯ᭄ᬭᬸᬄᬘᬭᬫᬗ᭄ᬮᬭᬤ᭄ᬫᬭᬡᬲᬗ᭄ᬓᬾᬂᬫᬹᬲᬶᬓᬫᬗ᭄ᬭᬸᬲᬸᬄ᭞

ᬦ᭄ᬤᬦ᭄‌ᬯ᭄ᬯᬂᬓᭀᬝᬲᬫᬹᬳᬯᬶᬲ᭄ᬫᬬᬭᬶᬯᬸᬲ᭄‌ᬯ᭄ᬯᬂᬭᬶᬂᬳᬋᬧ᭄‌ᬳᬩ᭄ᬭᬯᬶᬢ᭄᭞

ᬢᬦ᭄‌ᬯ᭄ᬯᭀᬬᬯ᭄ᬭᬸᬳᬲᬂᬓᬓᬸᬂᬓᬸᬫᬯᬘᬂᬩᬵᬂᬓᬂᬧᬋᬂᬭᬶᬂᬳᬬᬸᬦ᭄᭛

5.     Mangrap sang jalu ring tĕngah bala sĕsĕk mojar si pung ring arĕp,

He ngwang wruh cara manglarad maraṇa sangkeng mūṣika mangrusuh,

Ndan wwang koṭa samūha wismaya ri wus wwang ring arĕp abrawit,

Tan wwoya wruha sang kakung kumawaca ng bāng kang parĕng ring ayun.

 

᭖᭞        ᬫᭀᬚᬃᬲᬂᬳᬸᬮᬸᬓᭀᬝᬳᬾᬄᬲ᭄ᬬᬧᬓᬶᬢᬾᬓᬶᬯ᭄ᬯᬂᬮᬦᬂᬭᬶᬂᬳᬋᬧ᭄᭞

ᬯᬶᬲ᭄ᬢᬵᬭᬵᬓ᭄ᬦᬭᬶᬗᭀᬂᬳᬸᬚᬃᬤᬸᬕᬤᬸᬕᬵᬬ᭄ᬯᬤ᭄ᬯᬵᬧᬭᬾᬂᬕᭀᬧᬶᬢ᭞

ᬘᬾᬢ᭄ᬫᭀᬘᬧ᭄ᬲᬶᬮᬦᬂᬲᬳᬸᬃᬍᬕᬶᬭᬶᬲᬂᬓᭀᬝᬳᬾᬦ᭄ᬤ᭄ᬭᬕᭂᬫ᭄ᬧᬸᬂᬢᬶᬓᬸᬲ᭄᭞

ᬲᬶᬗ᭄ᬕᬶᬄᬲᬂᬳᬫᭂᬮᬶᬦ᭄ᬧᬢᬶᬯ᭄ᬭᬸᬳᬦᬭᬶᬂᬗ᭄ᬯᬂᬧᬶᬤ᭄ᬧᬶᬧᭂᬃᬢᬦ᭄‌ᬳᬮᬾᬦ᭄᭛

6.     Mojar sang hulukoṭa eh syapa kiteki wwang lanang ring arĕp,

Wistārākna ri ngong ujar duga-dugāywa dwāpareng gopita,

Cet mocap si lanang sahur lĕgi ri sang koṭendra gĕmpung tikus,

Singgih Sang Hamĕlinpati wruhana ring ngwang Pid Pipĕr tan alen .

᭗᭞       ᬓᬵᬃᬬᬾᬗ᭄ᬯᬂᬧ᭄ᬭᬲᬸᬮᬶᬂᬦᬶᬫᬶᬢ᭄ᬢᬦᬶᬳᬸᬮᬸᬦ᭄ᬫᬗ᭄ᬓᬾᬳᬦᬾᬭᬶᬓ᭄ᬬᬢᬄ᭞

ᬫᬗᬺᬗ᭄ᬯᬧ᭄ᬯᬳᬸᬮᬸᬦ᭄ᬬᬦᬶᬂᬳᬫᭂᬮᬶᬦ᭄ᬫᬗ᭄ᬤᭀᬦ᭄ᬧᬹᬃᬡᬦᬶᬂᬫᬹᬱᬶᬓ᭞

ᬕ᭄ᬮᬶᬲ᭄ᬧᬶᬤ᭄ᬧᬶᬧᭂᬳᭂᬃᬕ᭄ᬬᬫᬗ᭄ᬯᬶᬚᬶᬮᬓᭂᬦ᭄ᬲᭀᬮᬶᬂᬲᬓᬾᬂᬓᬜ᭄ᬘᬸᬕ᭞

ᬳᬪ᭄ᬭᬵᬧᬶᬗ᭄ᬕᬮᬯᬾᬡᬸᬦᬶᬂᬯᬚᬸᬲᭂᬧᬂᬮ᭄ᬯᬶᬃᬪᬵᬦᬸᬢᬸᬗ᭄ᬕᬂᬓᬸᬮᭀᬦ᭄᭛

7.     Kāryengwang prasuling nimitta ni hulun mangke hanerikyatah,

Mangrĕngwa pwa hulun yaning Hamĕlin mangdon pūrṇa ning mūṣika,

Ndan Pid Pipĕhĕr gya mangwijilakĕn soling sakeng kañcuga,

Abhrā pinggala weṇu ning Waju Sĕpang lwir bhānu tunggang kulon .

 

᭘᭞       ᬓᬵᬰ᭄ᬘᬃᬬᬦ᭄ᬲᬫᬫᬗ᭄ᬤᭂᬎᬭᬶᬲᬶᬧᬶᬧᭂᬃᬲᭂᬫ᭄ᬯᬦ᭄ᬤᬳᬢ᭄ᬕᬃᬯᬶᬢ᭞

ᬮᬹᬤ᭄ᬫᭀᬚᬃᬳᬸᬮᬸᬓᭀᬝᬭᬶᬂᬲᬶᬮᬓᬶᬲᬫ᭄ᬧᬶᬃᬧᬷᬢᬢᬦ᭄ᬮᭀᬦ᭄ᬫᭂᬦᬾ᭞

ᬮᬄᬬᬦ᭄ᬫᬗ᭄ᬓᬦᬰᬷᬖ᭄ᬭᬯᬾᬄᬧᬦᭂᬗᭂᬭᬦ᭄ᬭᬶᬂᬗ᭄ᬯᬂᬳᬚᬵᬕᭃᬂᬢᬸᬢᬸᬓ᭄᭞

ᬳᬵᬧᬦ᭄ᬬᬦ᭄ᬫᬩᭂᬦᭂᬃᬳᬸᬘᬧ᭄ᬢᬳᬦᬯᬾᬯᬾᬄᬲᬾᬯᬸᬕᬸᬮ᭄ᬤᭂᬦ᭄ᬓᬢᬸᬃ᭛

8.     Kāṡcaryan sama mangdĕlö ri Si Pipĕr sĕmwan dahat garwita,

Lūd mojar hulukoṭa ring si laki sampir pīta tan lon mĕne,

Lah yan mangkana ṡīghra weh panĕngĕran ring ngwang ajāgöng tutuk,

Āpan yan mabĕnĕr ucapta hana weweh sewu guldĕn katur .

 

᭙᭞       ᬬᬦ᭄ᬬᬸᬓ᭄ᬢᬶᬧ᭄ᬯᬳᬸᬚᬃᬢᬭᬶᬂᬫᬫᬶᬲᬬᬸᬓ᭄ᬢ᭄ᬬᬗ᭄ᬯᬂᬚᬸᬕᬫ᭄ᬭᬶᬄᬓᬶᬢ᭞

ᬬᬦ᭄ᬩᭀᬩᬩ᭄ᬧ᭄ᬯᬳᬸᬚᬃᬢᬭᬶᬂᬫᬫᬶᬍᬯᬶᬄᬤᭀᬳᬵᬓ᭄ᬦᬥᬾᬯᬾᬓ᭄ᬓᬶᬢ᭞ 

ᬓᭀᬝᬗ᭄ᬓᬸᬯᬸᬲ᭄ᬭᬶᬦᭂᬚᭂᬓ᭄ᬢᬶᬓᬸᬲ᭄ᬳᬚᬢᬶᬦᬫ᭄ᬩᭂᬄᬤᬾᬳᬸᬘᬧ᭄ᬕᬸᬬ᭄ᬯᬦᬦ᭄᭞

ᬦᬵᬢᬸᬂᬢᬸᬂᬧᬗᬸᬚᬃᬫᬭᬶᬂᬲᬶᬯᬚᬸᬩᬵᬂᬳᭀᬮᬶᬄᬲᬶᬪᬹᬧᬵᬮᬓ᭛

9.     Yan yukti pwa ujarta ring mami sayuktya ngwang juga mrih kita

Yan bobab pwa ujarta ring mami lĕwih dohākna ḍewek kita

Koṭangku wus rinĕjĕk tikus aja tinambeh de ucap guywanan

Nā tungtung pangujar maring Si Waju Bāng olih si bhupālaka

 

᭑᭞       ᬲᬯᬸᬲ᭄ᬩ᭄ᬭᬫᬶᬮᬫᭀᬚᬭᬾᬂᬲᬶᬯᬚᬸᬩᬵᬂᬮᬸᬫᬚᬸᬢᬶᬦᬸᬮᬸᬧᬦ᭄‌ᬳᬶᬓᬂᬲᬸᬮᬶᬂ᭞

ᬳᬮᬶᬦ᭄ᬤᬶᬫᬸᬦᬶᬓᬂᬲᬸᬮᬶᬂᬳᬗᬭᬗᬶᬦ᭄ᬓᬸᬝᬕᬸᬭᬯᬫᬥᬸᬰ᭄ᬯᬭᬾᬂᬯᬶᬬᬢ᭄᭞

ᬓᬬᭀᬦ᭄ᬘᬫᬭᬢᬶᬦ᭄ᬬᬸᬧᬦ᭄‌ᬳᬦᬶᬮᬢᬸᬮ᭄ᬬᬫᬗᬶᬕᭂᬮᬫᬢᬹᬢ᭄ᬲᬸᬮᬶᬂᬥ᭄ᬯᬦᬶ᭞

ᬚᬮᬓ᭄ᬕᬡᬧᬋᬂᬳᬸᬫᭂᬃᬕᬫᬶᬦᭂᬳᭂᬃᬧᬥᬬᬫᬧᬸᬮᬶᬗᬦ᭄ᬭᬶᬤᬶᬗ᭄ᬫᬸᬓ᭛

1.         Sawus bramila mojareng si waju bāng lumaju tinulupan ikang suling,

Alindi muni kang suling angarangin kuṭa gurawa madhu ṡwareng wiyat,

Kayon camara tinyupan anila tulya mangigĕla matūt suling dhwani,

Jalak gaṇa parĕng umĕrgami nĕhĕr padha ya mapulingan ri dingmuka .

 

᭒᭞       ᬯᭂᬕᬂᬲᬫᬶᬢᬢᬦ᭄ᬯᬸᬭᬸᬂᬚᬸᬕᬧᬋᬂᬳᬫᬶᬭᬸᬗᬸᬭᬶᬧᬸᬧᬸᬄᬦᬶᬓᬂᬲᬸᬮᬶᬂ᭞

ᬦ᭄ᬤᬢᬦ᭄ᬳᬦᬯᬦᭂᬄᬢᬶᬓᬸᬲ᭄ᬦ᭄ᬬᬲᬫᬶᬢᬸᬮ᭄ᬬᬓᭂᬦᬕᬸᬦᬲᬓᬶᬂᬚᬭᬦ᭄ᬕᬸᬬᬂ᭞

ᬫᬦᬸᬄᬲᬯᬢᭂᬓᬶᬂᬢᬶᬓᬸᬲ᭄ᬫᭂᬢᬸᬲᬓᬶᬂᬲᬧᬤᬸᬧᬤᬸᬕᬸᬫᭀᬧᬶᬢᬤᬗᬹ᭞

ᬢᭂᬮᬲ᭄ᬧᬲᬶᬗᬶᬤᬦ᭄ᬦ᭄ᬬᬰᬹᬦ᭄ᬬᬢᬶᬦᬶᬮᬃᬫᬕᬡᬘᬭᬢᭂᬓᬧ᭄ᬯᭂᬕᬂᬲᬫᬶ᭛

2.           Wĕgang sami tatan wurung juga parĕng amirungu ri pupuh nikang suling,

Ndatan hana wanĕh tikusnya sami tulya kĕna guṇa saking jaran guyang,

Manuh sawatĕk-ing tikus mĕtu saking sapadu-padu gumopita dangū,

Tĕlas pasingidannya ṡūnya tinilar magaṇacara tĕkap wĕgang sami .

 

᭓᭞       ᬤᬮᬦ᭄ᬓᬸᬝᬧᭂᬦᬸᬄᬢᭂᬓᬧ᭄ᬧᬭᬢᬶᬓᬸᬲ᭄ᬫᬮᬓᬸᬓᬤᬶᬳᬧᬸᬬ᭄ᬢᬸᬭᬸᬦ᭄ᬕᬸᬦᬸᬂ᭞

ᬲᬫᬹᬳᬫᬢᬸᬫᬂᬢᬸᬫᬂᬮᬓᬶᬮᬯᬦ᭄ᬩᬶᬦᬶᬚᬸᬕᬲᬶᬢᬶᬓᬸᬲ᭄ᬘᬶᬓᬸᬮᬶᬓ᭄ᬘᬶᬮᬶᬓ᭄ᬘᬶᬮᬶᬓ᭄᭞

ᬲᬫᬹᬳᬓᭂᬦᬧᬦ᭄ᬤᬯᬸᬢ᭄ᬲᬓᬭᬶᬫᭀᬦᬶᬍᬕᬶᬲᬶᬯᬚᬸᬩᬵᬂᬧᬲᬂᬕᬸᬡ᭞

ᬩᬭᬶᬲ᭄ᬮᬓᬸᬦᬶᬭᬾᬓᬮᬹᬤ᭄ᬫᬦᬸᬚᬸᬢᬷᬃᬣᬯᬲᬤᬶᬦᬸᬮᬸᬭᬦ᭄ᬯᬢᭂᬓ᭄ᬢᬶᬓᬸᬲ᭄᭛

3.           Dalan kuṭa pĕnuh tĕkap para tikus malaku kadi apuy turun gunung,

Samūha matumang-tumang laki lawan bini juga si tikus cilik-cilik,

Samūha kĕna pandawut saka ri moni lĕgi si waju bāng pasang guṇa,

Baris lakunireka lūd manuju tīrtha Wasa dinuluran watĕk tikus .

 

᭔᭞         ᬢᭂᬓᬾᬓᬮᬶᬯᬲᭂᬃᬢᬶᬓᬸᬲ᭄ᬦ᭄ᬬᬲᬫᬶᬰᬶᬖ᭄ᬭᬬᬫᬫᭂᬕᬢᬓᭂᬦ᭄ᬢᬶᬓᬂᬲᬸᬗᬾ᭞

ᬳᬸᬫᬶᬮ᭄ᬯᬮᬓᬸᬲᬂᬧᬶᬧᭂᬃᬓᬭᬡᬲᭀᬮᬶᬗᬦᬶᬭᬢᬸᬳᬸᬢᬦ᭄ᬧᭂᬕᬢ᭄ᬧᭂᬕᬢ᭄᭞

ᬭᬶᬯᬸᬲ᭄ᬧᬭᬢᬶᬓᬸᬲ᭄ᬳᬦᬾᬂᬢᭂᬗᬳᬶᬓᬂᬓᬮᬶᬢᭂᬓᬫᬗᬮᬸᬦ᭄ᬦᬶᬓᬂᬩᬜᬸ᭞

ᬢᭂᬮᬲ᭄ᬧ᭄ᬯᬓᬲᬧᬸᬄᬯᬢᭂᬓ᭄ᬭᬶᬧᬸᬓᬸᬮᬧ᭄ᬭᬲᬫᬬᬓᬳᬜᬸᬢ᭄ᬫᬭᬶᬂᬯᬲᭂᬃ᭛

4.           Tĕke Kali Wasĕr tikusnya sami ṡīghra ya mamĕgatakĕn tikang sunge,

Umilwa laku Sang Pipĕr karaṇa solinganira tuhu tan pĕgat-pĕgat,

Ri wus para tikus haneng tĕngah-ikang kali tĕka mangalun nikang bañu,

Tĕlas pwa kasapuh watĕk ripukula prasama ya kahañut maring Wasĕr .

 

᭕᭞        ᬕᬶᬭᬂᬢ᭄ᬯᬲᬶᬭᬲᬂᬧᬶᬧᭂᬃᬭᬶᬓᬧᭂᬚᬄᬧᬭᬭᬶᬧᬸᬓᬢᬥᬄᬯᬭᬶᬄᬕᬮᬓ᭄᭞

ᬦᭂᬳᭂᬃᬫᬮᬓᬸᬫᬦ᭄ᬢᬸᬓᬾᬂᬓᬸᬝᬲᬶᬦᬫ᭄ᬩᬶᬫᬲᭂᬫᬸᬧᬭᬶᬢᬸᬱ᭄ᬝᬢᬦ᭄ᬧᬶᬭ᭞

ᬕᬶᬭᬂᬬᬫᬫᭂᬲᭂᬲ᭄ᬮᬭᬶᬲ᭄ᬬᬫᬗᬶᬤᬸᬂᬭᬶᬳᭂᬦᬸᬲᬸᬫᬬᬦᬶᬂᬮᬮᬂᬯᬶᬮᬶᬲ᭄᭞

ᬦᭂᬳᭂᬃᬢᭂᬓᬲᬶᬭᬵᬕᬭᬶᬂᬢᭂᬧᬶᬲᬶᬭᬶᬂᬲᬶᬦᬧᬓᬸᬓᬸᬧᬸᬮᬾᬦ᭄ᬚᬮᬓ᭄ᬫᬜᬃ᭛

5.           Girang twasira Sang Pipĕr ri kapĕjah para ripu kataḍah warih galak,

Nĕhĕr malaku mantukeng kuṭa sinambi masĕmu parituṣṭa tan pira,

Girang ya mamĕsĕs laris ya mangidung ri hĕnu sumaya ning lalang wilis,

Nĕhĕr tĕka Si Rāga ring tĕpi siring sinapa kukupu len jalak mañar .

 

᭖᭞        ᬓᬰᬾᬱᬬᬢᬶᬓᬸᬲ᭄ᬫᬮᬶᬢ᭄ᬲᬯᬶᬚᬶᬢᬦ᭄‌ᬳᬗᭂᬫᬲᬶᬧᬢᬶᬫᬸᬗ᭄ᬕᬸᬭᬶᬂᬢᬶᬭᬄ᭞

ᬲᬯᬾᬢ᭄ᬦᬶᬲᬶᬢᬶᬓᬸᬲ᭄ᬫᬭᬶᬂᬯᬸᬭᬶᬮᬓᬸᬦ᭄ᬬᬬᬬᬓᬲᬸᬯᬬᬦ᭄ᬢᬸᬫᬹᬢ᭄ᬓᬮᬾᬦ᭄᭞

ᬭᬶᬲᭀᬃᬘᬫᬭᬫᬹᬱᬶᬓᬾᬓᬫᬦᬗᬶᬲ᭄ᬧ᭄ᬯᬬᬫᬫᬢᬦᬶᬯᬵᬦ᭄ᬥᬯᬵᬦ᭄ᬢᬓ᭞

ᬓᬲᭀᬧ᭄ᬬᬢᬶᬦᬶᬮᬃᬢᭂᬓᬧ᭄ᬲᬓᬸᬮᬕᭀᬢ᭄ᬭᬦ᭄ᬬᬓᬤᬶᬲᬶᬭᬭᬵᬢᬶᬩᬾᬂᬍᬫᬄ᭛᭐᭛

6.           Kaṡeṣa ya tikus malit sawiji tan angĕmasi pati munggu ring tirah,

Sawet ni si tikus maring wuri lakunya yaya kasuwayan tumūt kalen,

Ri sor camara mūṣikeka manangis pwa ya mamatani wāndhawāntaka,

Kasop ya tinilar tĕkap sakulagotranya kadi sirarā tibeng lĕmah .

 

᭑᭞       ᬢᬦ᭄ᬳᬸᬘᬧᭂᬦ᭄ᬫᬮᬶᬄᬭᬶᬳᭂᬦᬸᬢᭀᬘᬧᬭᬶᬓᬸᬝᬧᬸᬭ᭞

ᬭᬫ᭄ᬬᬫᬲᬵᬥᬸᬓᬵᬭᬲᬯᬢᭂᬓ᭄ᬚᬦᬓᬸᬝᬳᬫᭂᬮᬶᬦ᭄᭞

ᬯᬾᬢ᭄ᬦᬶᬭᬯᬸᬲ᭄ᬧᬭᬵᬚᬬᬲᬶᬫᬹᬱᬶᬓᬧᬶᬦᬓᬭᬶᬧᬸ᭞

ᬰ᭄ᬭ᭄ᬢᬷᬚᬮᬸᬕᬃᬚᬶᬢᬾᬂᬳᬢᬶᬫᬮᬸᬬ᭄ᬓᬺᬢᬦᬕᬭᬦᬶᬭ᭛

1.     Tan ucapĕn malih ri hĕnu tocapa ri kuṭapura,

Ramya masādhukāra sawatĕk jana kuṭa Hamĕlin,

Wetnira wus parājaya si mūṣika pinaka ripu,

ṡtrī jalu garjiteng hati maluy krĕta nagaranira .

 

᭒᭞       ᬮᬹᬤ᭄ᬢᭂᬓᬲᬂᬧᬶᬧᭂᬃᬮᬸᬫᬓᬸᬭᬶᬂᬓᬸᬭᬶᬲᬶᬲᬶᬓᬩᬭᬢ᭄᭞

ᬗ᭄ᬓᬵᬫᬗᬸᬘᬧ᭄ᬧ᭄ᬯᬬᬾᬂᬳᬸᬮᬸᬓᬸᬝᬧ᭄ᬭᬮᬤᬕᬢᬶᬦᬶᬭ᭞

ᬤᬸᬄᬳᬸᬮᬸᬓᭀᬝᬯᬸᬲ᭄ᬓᬤᬸᬮᬸᬤᬾᬦ᭄ᬢᬲᬸᬮᬪᬦᬶᬫᬫᬶ᭞

ᬮᬷᬡᬍᬩᬸᬃᬫᬸᬲᬸᬳ᭄ᬢᬓᬧᭂᬚᬄᬲᬫᬶᬭᬶᬓᬮᬶᬯᬲᭂᬃ᭛

2.     Ndan tĕka Sang Pipĕr lumaku ring kuri sisi ka barat,

Ngkā mangucap pwa yeng hulukuṭa pralada gatinira,

Duh hulukoṭa wus kadulu denta sulabha ni mami,

Līṇa lĕbur musuhta kapĕjah sami ri Kali Wasĕr .

 

᭓᭞       ᬤᬾᬦ᭄ᬕᭂᬕᭂᬮᭀᬦ᭄ᬲᬸᬮᬶᬂᬭᬚᬢᬦᬶᬂᬫᬫᬶᬢᬦᬦᬧᬧᬲ᭄᭞

ᬫᬗ᭄ᬓ᭄ᬬᬯᭂᬦᬂᬓᬶᬢᬩ᭄ᬭᬫᬶᬮᬰᬷᬖ᭄ᬭᬫᬦ᭄ᬳᬸᬭᬫᬫᬶ᭞

ᬲᬂᬯᬚᬸᬩᬵᬂᬢᬗᬦ᭄ᬦ᭄ᬬᬫᬦᬥᬄᬫᬢᬜᬭᬶᬲᬸᬥᬦ᭞

ᬲᬾᬯᬸᬧᬶᬭᬓ᭄ᬋᬓᭀᬢᬦᬦᬮᭀᬂᬓᬤᬶᬲᬫᬬᬤᬗᬹ᭛

3.     Den gĕgĕlon suling rajata ning mami tanana papas,

Mangkya wĕnang kita bramila ṡīghra manahura mami,

Sang Waju Bāng tangannya manadhah mataña ri sudhana,

Sewu pirak rĕko tanana long kadi samaya dangū .

 

᭔᭞         ᬩᬵᬫᬓᬭᬦ᭄ᬬᬮᬾᬦ᭄ᬳᬶᬓᬫᬢᬸᬗ᭄ᬓᭂᬤᬭᬶᬲᬶᬲᬶᬢᭂᬗᬄ᭞

ᬓᭀᬝᬧᬢᬶᬕ᭄ᬬᬫᬗ᭄ᬕᭂᬮᬭᬓᭂᬦ᭄ᬢᬩᭂᬮᬫᬳᬶᬲᬶᬲᭂᬓ᭄᭞

ᬤᬾᬧᬧᬶᬭᬓ᭄‌ᬳᭂᬫᬲ᭄ᬫᬲᬸᬲᬸᬦᬦ᭄ᬳᬦᬲᬶᬬᬸᬮᬶᬯᬭ᭞

ᬦ᭄ᬤᬦ᭄ᬳᬸᬫᭂᬦᭂᬂᬲᬶᬭᬂᬩ᭄ᬭᬫᬶᬮᬢᬦ᭄ᬳᬦᬫᭂᬢᬸᬯᬸᬘᬧᬦ᭄᭛

4.     Bāmakaranya len ika matungkĕda ri sisi tĕngah,

Koṭapati gya manggelarakĕn tabĕla mahisi sĕk,

De papirak ĕmas masusunan hana siyu liwara,

Ndan umĕnĕng sirang bramila tan hana mĕtu ucapan .

 

᭕᭞        ᬚ᭄ᬭᭀᬦᬶᬫᬦᬄᬦ᭄ᬤᬢᬦ᭄‌ᬍᬕᬫᬯᬾᬄᬥᬦᬭᬶᬲᬶᬯᬚᬸᬩᬵᬂ᭞

ᬧᬦ᭄ᬭᬶᬦᬲᬾᬂᬫᬦᬄᬦ᭄ᬬᬫᬤᬗᬦ᭄ᬚᬸᬕᬮᬮᬓᬸᬲᬶᬧᬶᬤ᭄᭞

ᬓᬾᬯᬮᬲᬗ᭄ᬓᬦᬶᬂᬫᬸᬦᬶᬲᬸᬮᬶᬂᬲᬫᬶᬚᬸᬕᬓᬯᭂᬦᬂ᭞

ᬢᬦ᭄ᬧᬥᬬᬦ᭄ᬲᬶᬦᬸᬂᬲᬶᬯᬸᬧᬶᬭᬓ᭄‌ᬍᬳᭂᬗᬬᬓᬶᬦᬸᬭᬂ᭛

5.     Jro ni manah ndatan lĕga maweh dhana ri Si Waju Bāng,

Pan rinaseng manahnya madangan juga lalaku Si Pid,

Kewala sangka ning muni suling sami juga kawĕnang,

Tan padha yan sinung siwu pirak lĕhĕnga ya kinurang .

 

᭖᭞        ᬕ᭄ᬬᬵᬳᬶᬦᬯᬾᬄᬫᭂᬦᬾᬲᬶᬯᬚᬸᬩᬵᬂᬳᬸᬮᬶᬳᬦᬶᬭᬋᬓᭀ᭞

ᬳᬃᬣᬮᬶᬫᬂᬧᬸᬮᬸᬄᬩᬮᬓᬢᬦ᭄ᬓᬤᬶᬲᬫᬬᬤᬗᬹ᭞

ᬭᬫ᭄ᬬᬲᬸᬭᬓ᭄ᬦᬶᬓᬂᬩᬮᬭᬶᬯᬸᬲ᭄ᬳᬸᬮᬸᬓᬸᬝᬫ᭄ᬫᬦᬳᬸᬃ᭞

ᬲᬃᬯᬶᬕᬶᬭᬂᬫᬕᬸᬬ᭄ᬯᬗᬸᬧᬓᬵᬭᬲᬶᬭᬲᬶᬯᬚᬸᬩᬂ᭛

6.     Ndan inaweh mĕne Si Waju Bāng ulihanira rĕko,

Artha limang puluh balaka tan kadi samaya dangū,

Ramya surak nikang bala ri wus hulukuṭa manahur,

Sarwi girang maguywangupakāra sira Si Waju Bang .

 

᭗᭞       ᬤᬤ᭄ᬬᬲᬶᬧᬶᬤ᭄ᬧᬶᬧᭂᬃᬢᬶᬲᬬᬩᭂᬦ᭄ᬤᬸᬭᬶᬲᬶᬳᬸᬮᬸᬓᬸᬝ᭞

ᬦᬾᬢ᭄ᬭᬫᬩᬵᬂᬫᬮᬶᬄᬳᬲᬸᬯᬲᬦ᭄ᬬᬫᭂᬢᬸᬯᬗᬶᬦ᭄ᬳᬗᬶᬦ᭄᭞

ᬮ᭄ᬯᬶᬃᬧᬗᬢᬕ᭄ᬩᬭᬢ᭄ᬓᬧᬶᬢᬸᬬᬦ᭄ᬳᬸᬧᬫᬢᬦᬦᬮᬾᬦ᭄᭞

ᬕ᭄ᬮᬶᬲ᭄ᬫᬗᬸᬘᬧ᭄ᬧ᭄ᬯᬬᬾᬂᬲᬶᬓᬸᬝᬦᬵᬣᬫᬕᬶᬮᬕᬸᬫᬸᬦᬸᬂ᭛

7.     Dadya Si Pid Pipĕr tisaya bĕndu ri si hulukuṭa,

Netra mabāng malih asuwasanya mĕtu angin-angin,

Lwir pangatag barat kapitu yan upama tanana len,

Glis mangucap pwa yeng Si Kuṭanātha magila gumunung .

 

᭑᭞       ᬕᭂᬍᬂᬢ᭄ᬯᬲ᭄ᬢᭀᬧᭀᬂᬩᬵᬂᬲᬓᬤᬶᬍᬩᬸᬕᬸᬦ᭄ᬢᬸᬃᬳᬪᬶᬦᬯ᭞

ᬦᭂᬳᭂᬃᬫᭀᬚᬃᬰᬩ᭄ᬤᬦ᭄ᬬᬕᬸᬭᬕᬥᬫᬗ᭄ᬤᬸᬓ᭄ᬳᬺᬤᬬᬬ᭞

ᬐᬩᭀᬩᬩ᭄ᬓᭀᬳᬫ᭄ᬮᬶᬦ᭄ᬧᬢᬶᬢᬸᬳᬸᬢᬢᬦ᭄ᬲᬢ᭄ᬬᬲᬫᬬ᭞

ᬲᬸᬫᬗ᭄ᬕᬸᬧ᭄ᬓᭀᬭᬶᬂᬮᬵᬝᬶᬩᬮᬓᬮᬶᬥᬄᬢᬦ᭄ᬧᬳᭂᬮᬸᬂ᭛

1.     Gĕlĕng twas Topong Bāng sakadi lĕbu guntur abhinawa

Nĕhĕr mojar ṡabdanya guragadha mangduk hrĕdaya ya

Ai bobab ko Hamlinpati tuhu tatan satya samaya

Sumanggup ko ring lāṭi balaka liḍah tan pabahĕlung

 

᭒᭞       ᬧ᭄ᬭᬳᬵᬲᬧ᭄ᬯᬾᬓᬂᬧᭀᬭᬚᬦᬓᬤᬶᬚᬗ᭄ᬓ᭄ᬭᬶᬓ᭄‌ᬳᬫᬶᬤ᭄ᬯᭂᬗᬶ᭞

ᬳᬸᬫᬸᬂᬫᭀᬦᬶᬯᬃᬕᬦ᭄ᬬᬓᬤᬶᬫᬦᭂᬯᭂᬓ᭄ᬓᬃᬡᬲᬶᬧᬶᬧᭂᬃ᭞

ᬕ᭄ᬬᬫᭀᬚᬃᬲᬂᬓᭀᬝᬾᬦ᭄ᬤ᭄ᬭᬭᬶᬢᭂᬗᬳᬶᬓᬂᬯᬃᬕᬳᬫᭂᬮᬶᬦ᭄᭞

ᬳᬭᬄᬩᭂᬗ᭄ᬓᬸᬂᬢᬦ᭄ᬮᭀᬂᬓᬶᬢᬲᬶᬯᬚᬸᬩᬵᬂᬢᬦ᭄ᬓᬤᬶᬓᬤᬶ᭛

2.     Prahāsa pwekang porajana kadi jangkrik amid wĕngi

Umung moni warganya kadi manĕwĕk karṇa Si Pipĕr

Gya mojar Sang Koṭendra ri tĕngah-ikang warga Hamĕlin

Arah bĕngkung tan long kita Si Waju Bāng tan kadi-kadi

 

᭓᭞       ᬢᬸᬓᬂᬭᬫ᭄ᬧᭀᬓ᭄ᬢᬦ᭄ᬮ᭄ᬬᬦ᭄ᬓᬶᬢᬳᬶᬓᬶᬳᬫᬓ᭄ᬱᬦ᭄ᬫᬫᬶᬫᭂᬦᬾ᭞

ᬳᬗᬶᬫ᭄ᬩᬸᬄᬬᬤ᭄ᬬᬲ᭄ᬢᬸᬦ᭄ᬲᬮᬶᬮᬶᬫᬫᬶᬢᬦ᭄‌ᬳᬃᬱᬭᬶᬓᬶᬢ᭞

ᬫᬶᬮᬕ᭄ᬲᬗ᭄ᬓᬾᬓᭀᬝᬗ᭄ᬓᬸᬓᬶᬢᬲᬶᬩᬳᬓᬦᬷᬘᬫᬮᬶᬦ᭞

ᬫᬭᬫ᭄ᬬᬧ᭄ᬯᬾᬓᬂᬓᭀᬝᬚᬦᬫᬲᬸᬭᬓ᭄ᬭᬶᬂᬲᬶᬯᬚᬸᬩᬂ᭛

3.     Tukang rampok tan lyan kita iki amakṣan mami mĕne

Angimbuh yadyastun sacili mami tan arṣa ri kita

Milag sangke koṭangku kita si bahak nīcamalina

Maramya pwekang koṭajana masurak ring Si Waju Bang.

 

᭔᭞         ᬳᬶᬭᬶᬩ᭄‌ᬳᬫᬺᬕ᭄ᬧᬸᬡ᭄ᬥᬸᬂᬮᬓᬸᬩᬮᬦᬶᬓᬂᬓᭀᬝᬫᬲᬸᬭᬓ᭄᭞

ᬫᬓᬵᬃᬬᬓ᭄ᬭᭀᬥᬾᬂᬢ᭄ᬯᬲ᭄ᬦᬶᬭᬚᬸᬭᬸᬲᬸᬮᬶᬂᬢᬦ᭄ᬧᬭᬶᬫᬶᬢ᭞

ᬳᬫᬸᬡ᭄ᬥᬸᬃᬲᬂᬧᬶᬤ᭄‌ᬕ᭄ᬮᬶᬲ᭄ᬬᬕᬸᬭᬕᬥᬮᬫ᭄ᬧᬄᬦᬶᬭᬮᬭᬶᬲ᭄᭞

ᬳᬕᬗ᭄ᬲᬃᬮᬫ᭄ᬧᬄᬲᬂᬧᬶᬧᭂᬫᬦᬸᬚᬸᬓᬶᬮ᭄ᬬᬦ᭄ᬚᬩᬓᬸᬝ᭛

4.     Hirib amrĕg puṇḍung laku bala nikang kota masurak

Makārya krodheng twasnira Juru Suling tan parimita

Amuṇḍur Sang Pid glis ya guragadha lampahnira laris

Agangsar lampah Sang Pipĕ manuju kilyan jaba kuṭa

 

᭕᭞        ᬳᬸᬯᬸᬲ᭄ᬲᬂᬧᬶᬤ᭄ᬧ᭄ᬭ᭄ᬧ᭄ᬢᬾᬗ᭄ᬓᬦᬮᬚᬸᬬᬫᬓ᭄ᬭᬓ᭄ᬫᬰᬧᬣ᭞

ᬳᬯᬦ᭄ᬢᬸᬦ᭄ᬯᬦ᭄ᬢᬸᬦ᭄ᬦᬵᬤᬦᬶᬭᬲᬶᬧᬶᬧᭂᬃᬮ᭄ᬯᬶᬃᬫᬺᬕᬧᬢᬶ᭞

ᬫᬸᬘᬧ᭄ᬚᬄᬢᬲ᭄ᬫᬵᬢ᭄‌ᬤ᭄ᬮᬵᬳᬫᬫᬶᬳᬫᬍᬲ᭄ᬯᬃᬕᬳᬫᭂᬮᬶᬦ᭄᭞

ᬳᬧᬦ᭄ᬫᬤ᭄ᬯᬢᬶᬗ᭄ᬓᬄᬦ᭄ᬬᬭᬶᬫᬫᬶᬢᬢᬦ᭄ᬫᬾᬗᭂᬢᬶᬬᬰ᭛

5.     Huwus Sang Pid praptengkana laju ya makrak maṡapatha

Awantun-wantun nādanira Si Pipĕr lwir mrĕgapati

Mucap jah tasmāt dlāha mami amalĕs warga Hamĕlin

Apan madwa tingkahnya ri mami tatan mengĕt-i yaṡa

 

᭖᭞        ᬭᬭᬶᬲ᭄ᬢᬸᬗ᭄ᬕᬂᬲᬺᬗ᭄ᬕᬧ᭄ᬯᬮᬓᬸᬦᬶᬭᬳ᭄ᬬᬂᬅᬃᬓᬭᬶᬫᭂᬦᬾ᭞

ᬳᬶᬓᬂᬥᭀᬓ᭄ᬮᬾᬗᬗ᭄ᬲᬶᬃᬲᬯᬭᬦᬶᬓᬢᭂᬫ᭄ᬧᬸᬄᬲᬶᬧᬯᬦ᭞

ᬫᬶᬭᬶᬃᬢᬶᬲ᭄ᬦᬶᬂᬩᬵᬬᬸᬦ᭄ᬬᬕᬸᬫᬬᬓᬾᬦ᭄ᬚᬦ᭄ᬫᬫᬳᬭᬶᬧ᭄᭞

ᬧᭂᬢᭂᬂᬢᬂᬲᬩ᭄ᬬᭀᬫᬵᬦ᭄ᬢᬭᬓᬮᬶᬫᬸᬦᬦ᭄ᬫᬾᬖᬫᬯᭂᬮᬸ᭛

6.     Raris tunggang srĕngga pwa lakunira Hyang Arka ri mĕne

Ikang ḍok len gangsir sawaranika tĕmpuh si pawana

Mirir tis ning bāyunya gumayakĕn janma maharip

Pĕtĕng tang sabyomāntara kalimunan megha mawĕlu

 

᭗᭞       ᬕ᭄ᬬᬫᬸᬗ᭄ᬕᬄᬭᬶᬂᬳᬫ᭄ᬩ᭄ᬬᬦ᭄ᬮᬓᬶᬩᬶᬲᬮᬸᬮᬸᬢ᭄ᬭᬶᬂᬧᬚᬶᬦᭂᬫᬦ᭄᭞

ᬍᬍᬧ᭄ᬦᬶᬤ᭄ᬭᬵᬢᬦ᭄ᬯ᭄ᬭᬶᬂᬧ᭄ᬭᬲᬫᬭᬶᬧᬦᬗ᭄ᬓᬦ᭄ᬪᬬᬥᬢᭂᬂ᭞

ᬭᬶᬩᬾᬜ᭄ᬚᬶᬂᬲᬂᬳ᭄ᬬᬂᬢᬾᬚᬫᬯᬸᬗᬸᬫᬭᬶᬂᬯᬵᬲᬯᬤᬶᬰ᭞

ᬲᬶᬦᬫ᭄ᬩᬸᬢ᭄ᬤᬾᬦᬶᬂᬫᭀᬦᬶᬧᬭᬓᬕᬮᬾᬦ᭄ᬲ᭄ᬬᬵᬬᬓᬸᬓᬸᬬᬸᬓ᭄᭛

7.     Gya munggah ring ambyan lakibi salulut ring pajinĕman

Lĕlĕp nidrā tan wring prasama ri panangkan bhaya dhatĕng

Ri beñjing Sang Hyang Teja mawungu maring Wāsawadiṡa

Sinambut de ning moni para kaga len syāya kukuyuk

 

᭘᭞       ᬰᬰᬵᬗ᭄ᬓᬧ᭄ᬯᬾᬓᬂᬲᬧ᭄ᬢᬤᬶᬦᬮᬶᬫᬤᬶᬦ᭄ᬢᭂᬦ᭄ᬦᬶᬭᬕᭂᬦᬶ᭞

ᬩᭂᬢᭂᬂᬭᬶᬂᬯᬲ᭄‌ᬰ᭄ᬭᬷᬮᬸᬤ᭄ᬭᬳᬶᬭᬶᬓᬢᬸᬮᬸᬲ᭄ᬲᬂᬤᬸᬓᬭᬯᬸᬄ᭞

ᬯᬸᬓᬸᬦ᭄ᬬᬾᬯᬸᬲ᭄ᬭᬶᬗ᭄ᬕᬶᬢ᭄ᬮᬕᬶᬬᬲᬤᬸᬭᬸᬂᬭᬶᬂᬢᬺᬡᬦᬶᬓ᭞

ᬰᬰᬶᬄᬭᬶᬂᬭᬵᬢ᭄ᬧᬗ᭄ᬮᭀᬂᬭ᭄ᬯᬢᬶᬦᬸᬚᬸᬫᬭᬶᬂᬰ᭄ᬭᬵᬯᬡᬢᬸᬳᬸ᭛

8.     ṡaṡāngka pwekang saptadina limadintĕnnira gĕni

bĕtĕng ring was ṡrī Ludra irika tulus sang duka rawuh

Wukunye wus ringgit lagi ya sadurung ring trĕna nika

ṡaṡih ring rāt panglong rwa tinuju maring ṡrāwaṇa tuhu

 

᭙᭞       ᬦᬳᬦ᭄ᬤᬶᬦ᭄ᬢᭂᬦ᭄ᬦ᭄ᬬᬧ᭄ᬭᬧ᭄ᬢᬶᬮᬕᬶᬲᬶᬧᬶᬧᭂᬃᬭᬶᬂᬳᬫᬮᬶᬳᬶᬦ᭄᭞

ᬓᬢᭀᬦ᭄ᬫᬗ᭄ᬓᬾᬯᬲ᭄ᬢ᭄ᬭᬦ᭄ᬬᬫᬭᬓᬢᬯᬸᬲ᭄ᬳᭂᬦ᭄ᬢᬶᬯᬚᬸᬩᬂ᭞

ᬳᬶᬚᭀᬫᭀᬭᬸᬩ᭄ᬧ᭄ᬯᬾᬓᬂᬓᬯᬘᬲᬫᬶᬢᭀᬧᭀᬂᬦᬶᬭᬚᬸᬕ᭞

ᬬᬦᬶᬂᬲᬡ᭄ᬥᬶᬂᬮ᭄ᬯᬶᬃᬭᬹᬧᬦᬶᬰᬩᬭᬫᬳ᭄ᬬᬸᬦ᭄ᬫᬩᬸᬭᬸᬫᭀᬂ᭛᭐᭛

9.     Nahan dintĕnnya prapti lagi Si Pipĕr ring Hamalihin

Katon mangke wastranya marakata wus hĕnti waju bang

Hijo morub pwekang kawaca sami topongnira juga

Yaning saṇḍing lwir rūpa ni ṡabara mahyun maburu mong

 

᭑᭞       ᬩᬂᬯᬾᬢᬦ᭄ᬭᬯᬶᬕᬢ᭄ᬭᬢᬸᬮ᭄ᬬᬲᭂᬫᬸᬦᬶᬂᬭᬤ᭄ᬬᬦ᭄ᬕᬮᬸᬄᬭᬶᬂᬥᬳ᭞

ᬤᬸᬓ᭄ᬫᭂᬗ᭄ᬓᬩ᭄ᬮᬯᬗᬦ᭄ᬫᬭᬶᬂᬧᬕᬮᬸᬳᬦ᭄ᬢᬢ᭄ᬓᬵᬮᬫᬳ᭄ᬬᬸᬦ᭄ᬫᭂᬥᬮ᭄᭞

ᬢᬦ᭄ᬮ᭄ᬬᬦ᭄ᬭᬶᬂᬭᬳᬤᬾᬦ᭄ᬳᬶᬦᭀᬧ᭄ᬯᬲᬶᬭᬫᬗ᭄ᬓ᭄ᬬᬋᬧ᭄ᬫᬘᬸᬡ᭄ᬥᬸᬓ᭄ᬓᬰᬶᬄ᭞

ᬫᬗ᭄ᬓᬵᬬᬦ᭄ᬳᬸᬧᬫᬵᬩᬗᬸᬦ᭄ᬭᬳᬶᬦᬫᬮ᭄ᬯᬶᬄᬲᭀᬪᬫᬹᬮᬾᬂᬤᬶᬦ᭛

1.     Bang wetan rawigātra tulya sĕmu ning Radyan Galuh ring  Dhaha

Duk mĕngkab lawangan maring pagaluhan tatkāla mahyun mĕdal

Tan lyan ring Rahaden Ino pwa sira mangkyarĕp macuṇḍuk kaṡih

Mangkā yan upamā bangun rahina malwih sobha mūleng dina.

                       

᭒᭞       ᬚᬮ᭄ᬯᬷᬰ᭄ᬢᬷᬂᬳᬫᭂᬮᬶᬦ᭄ᬫᭂᬦᬾᬮᬸᬗᬫᬭᬶᬂᬯᬾᬰ᭄ᬫᬦ᭄ᬧᬫᬸᬚ᭄ᬬᬦ᭄ᬦᬶᬭ᭞

ᬳᬗ᭄ᬳ᭄ᬬᬂᬭᬶᬂᬤᬶᬦᬓᬂᬲᬶᬦᭂᬗ᭄ᬕᬸᬳᬬᬦᭂᬲ᭄ᬧᬯ᭄ᬮᬸᬲ᭄ᬤᬳᬢ᭄ᬫᬗ᭄ᬕᬮ᭞

ᬗ᭄ᬓᬵᬯ᭄ᬯᬂᬓᭀᬝᬲᬫᬹᬳᬲᭃᬓ᭄ᬫᬧᬳᬸᬫᬦ᭄ᬭᬶᬂᬕ᭄ᬭᬾᬚᬫᬧ᭄ᬭᬵᬃᬣᬦ᭞

ᬗ᭄ᬳᬶᬂᬢᬦ᭄ᬢᬹᬢ᭄ᬧ᭄ᬯᬭᬭᬬ᭄ᬭᬭᬬ᭄ᬭᬶᬳᬫᭂᬮᬶᬦ᭄ᬓᬫ᭄ᬩᬸᬮ᭄ᬫᭂᬦᭂᬂᬭᬶᬂᬳᬸᬫᬄ᭛

2.     Jalwīṡtrīng Hamĕlin mĕne lunga maring weṡman pamujyannira

Anghyang ring dina kang sinĕngguha Yanĕs Pawlus dahat manggala

Ngkā wwang koṭa samūha sök mapahuman ring greja maprārthana

Nghing tan tūt pwa raray-raray ri Hamĕlin kambul mĕnĕng ring umah

           

᭓᭞       ᬦ᭄ᬤᬦ᭄ᬤᬸᬓ᭄ᬭᬵᬫᬋᬡᬦ᭄ᬬᬭᬶᬂᬕ᭄ᬭᬳᬧᬫᬸᬚ᭄ᬬᬦ᭄ᬮᬹᬤ᭄ᬥᬢᭂᬂᬧᬶᬤ᭄ᬧᬶᬧᭂᬃ᭞

ᬚᬕ᭄ᬲᬂᬯᬲ᭄ᬢ᭄ᬭᬯᬶᬮᬶᬲ᭄ᬥᬢᭂᬂᬫᬭᬲᬓᬾᬂᬓᭀᬡ᭄ᬝᭂᬦ᭄ᬓᬸᬮᭀᬦ᭄ᬢᬦ᭄ᬲᬸᬯᬾ᭞

ᬢᭀᬦ᭄ᬢᬂᬯᬵᬮᬭᬭᬬ᭄ᬲᬫᬹᬳᬬᬕᬶᬭᬂᬫᬵᬫᭂᬂᬳᬫᭂᬂᬭᬶᬂᬳᬸᬫᬄ᭞

ᬓ᭄ᬯᬾᬄᬯ᭄ᬯᬦ᭄ᬢᭂᬦ᭄ᬫᬕᬸᬬᭀᬦ᭄ᬕᬸᬬᭀᬦ᭄ᬮᬕᬶᬫᬤᭀᬤᭀᬮᬦ᭄ᬫᬦᭂᬫ᭄ᬩᬂᬚᬸᬕ᭛

3.     Ndan duk rāma rĕṇanya ring graha pamujyan lūd ḍatĕng Pid Pipĕr

Jag Sang Wastra Wilis ḍatĕng mara sakeng koṇṭĕn kulon tan suwe

Ton tang wāla raray samūha ya girang māmeng-amĕng ring umah

Kweh wwantĕn maguyon-guyon lagi madodolan manĕmbang juga    

 

᭔᭞         ᬫ᭄ᬯᬂᬯ᭄ᬯᬬᬫᬗᬶᬕᭂᬮ᭄ᬧ᭄ᬭᬫᭀᬤᬬᬦᭂᬳᭂᬃᬯ᭄ᬯᬦ᭄ᬢᭂᬦ᭄ᬫᭂᬦᭂᬂᬢᬦ᭄ᬧᬋᬂ᭞

ᬫᬵᬮᬶᬄᬯ᭄ᬯᬬᬍᬍᬧ᭄ᬢᬸᬭᬹᬓᬲᬧᬸᬢᬦ᭄ᬤᬾᬦᬶᬂᬧᬗᬶᬧ᭄ᬬᬦ᭄ᬦᬶᬭ᭞

ᬓᬜ᭄ᬘᬶᬢ᭄ᬲᬂᬧ᭄ᬭᬲᬸᬮᬶᬂᬫᭂᬦᬾᬫᬲᭂᬫᬸᬩᬗ᭄ᬕᬶᬕ᭄ᬮᬶᬲ᭄ᬧ᭄ᬯᬫᬦ᭄ᬬᬸᬧ᭄ᬲᬸᬮᬶᬂ᭞

ᬲᬵᬃᬳᬾᬦᬓ᭄‌ᬰ᭄ᬯᬭᬦᬶᬂᬲᬸᬮᬶᬂᬦ᭄ᬬᬫᬗᭂᬧᭂᬃᬤᬾᬦᬶᬂᬢᬶᬦᬹᬩ᭄ᬫᬵᬭᬸᬢ᭛

4.     Mwang wwaya mangigĕl pramoda ya nĕhĕr wwantĕn mĕnĕng tan parĕng

Mālih wwaya lĕlĕp turū kasaputan de ning pangipyannira

Kañcit Sang Prasuling mĕne masĕmu banggi glis pwa manyup suling

Sār enak ṡwara ning sulingnya mangĕpĕr de ning tinūb māruta.

           

᭕᭞        ᬢᬦ᭄ᬤ᭄ᬯᬦ᭄ᬫᭀᬦᬶᬲᬸᬮᬶᬂᬦ᭄ᬬᬫᬵᬃᬤᬯᬭᬶᬧᬗᬺᬗ᭄ᬯᬦ᭄ᬧᬢᭂᬄᬭᬶᬂᬤᬗᬹ᭞

ᬭᬾᬄᬢᬦ᭄ᬪᬾᬥᬧᬸᬧᬸᬄᬦ᭄ᬬᬢᬸᬮ᭄ᬬᬭᬶᬤᬗᬹᬤᬸᬓ᭄ᬫᬹᬱᬶᬓᬵᬦ᭄ᬢᬧᬸᬦᬄ᭞

ᬓᬵᬮᬦ᭄ᬬᬦ᭄ᬓᬍᬩᬸᬫᬭᬶᬂᬥᬍᬫᬶᬓᬂᬲᬸᬗ᭄ᬳᬬ᭄ᬯᬲᭂᬃᬢᬦ᭄ᬯᬦᬾᬄ᭞

ᬗ᭄ᬓᬵᬭᬶᬂᬚ᭄ᬭᭀᬦᬶᬓᭂᬤᬸᬂᬕᭂᬦᬄᬦ᭄ᬬᬓᬧᭂᬚᬄᬯᬸᬲ᭄ᬢᬹᬢ᭄ᬢᬶᬢᬶᬲ᭄ᬦᬶᬂᬲᬸᬮᬶᬂ᭛

5.     Tan dwan moni sulingnya mārdawa ri pangrĕngwan patĕh ring dangū

Reh tan bhedha pupuhnya tulya ri dangū duk mūṣikānta punah

Kālanyan kalĕbū maring ḍalĕm-ikang Sunghay Wasĕr tan waneh

Ngkā ring jro ni kĕdung gĕnahnya kapĕjah wus tūt titis ning suling.

 

᭖᭞        ᬦᬦ᭄ᬢᭂᬦ᭄ᬫᬗ᭄ᬓ᭄ᬬᬤᬸᬤᬹᬢᬶᬓᬸᬲ᭄ᬮᬸᬫᬓᬸᬢᬹᬢ᭄ᬭᬶᬂᬰᬩ᭄ᬤᬦᬶᬂᬲᭀᬮᬶᬗᬦ᭄᭞

ᬦᬗ᭄ᬳᬶᬂᬲᬂᬧᬭᬯᬵᬮᬓᬂᬳᬦᬫᬭᬶᬂᬚ᭄ᬭᭀᬓᭀᬝᬫᬗ᭄ᬓᬾᬢᬸᬫᬹᬢ᭄᭞

ᬲᬵᬢᬸᬲ᭄ᬢ᭄ᬭᬷᬡᬶᬧᬸᬧᬸᬄᬓᬝᬄᬧᬭᬭᬭᬬ᭄ᬢᬹᬢ᭄ᬭᬶᬂᬳᬮᬸᬦ᭄ᬦᬶᬂᬲᬸᬮᬶᬂ᭞

ᬥᬾᬯᬾᬓ᭄ᬮᭀᬮ᭄ᬬᬢᬢᬦ᭄ᬳᬶᬗᭂᬢ᭄ᬓᬯᬶᬱᬬᬦ᭄ᬤᬾᬰᬩ᭄ᬤᬍᬫ᭄ᬧᬸᬂᬫᬦᬶᬲ᭄᭛᭐᭛

6.     nantĕn mangkya dudū tikus lumaku tūt ring ṡabda ning solingan

nanghing sang para wāla kang hana maring jro koṭa mangke tumūt

sātus trīṇi puluh kaṭah para raray tūt ring alun ning suling

ḍewek lolya tatan ingĕt kawiṣayan de ṡabda lĕmpung manis.

 

 

᭑᭞       ᬢᬦ᭄ᬓᭀᬘᬧ᭄ᬧ᭄ᬯᬭᬭᬬ᭄ᬭᬭᬬ᭄ᬲᬫᬫᬶᬚᬶᬮ᭄ᬲᬓᬶᬂᬓᬸᬯᬸᬓᬸᬯᬸ᭞

ᬲᭂᬓ᭄ᬮᬫ᭄ᬧᬄᬦ᭄ᬬᬤᬸᬮᬸᬃᬤᬸᬮᬸᬃᬫᬭᬳᭂᬦᬹᬤᬳᬢ᭄ᬲᬸᬓᬲᬸᬓ᭞

ᬢᬦ᭄ᬯ᭄ᬭᬸᬄᬭᬶᬂᬧᬓᭂᬦᬾᬦ᭄ᬤ᭄ᬭᬢᭀᬬᬲᬓᬭᬶᬂᬳᬸᬮᬶᬄᬫᬬᬫᬬ᭞

ᬲᭂᬓ᭄ᬭᬶᬂᬫᬵᬃᬕᬧᭂᬦᬸᬄᬢᭂᬓᬧ᭄ᬧᬭᬭᬭᬬ᭄ᬮᬸᬧᬾᬂᬮᬓᬸᬮᬓᬸ᭛

1.         Tan kocap pwa raray-raray sama mijil saking kuwu-kuwu

Sĕk lampahnya dulur-dulur mara hĕnū dahat suka-suka

Tan wruh ring pakĕnendratoya saka ring ulih maya-maya

Sĕk ring mārga pĕnuh tĕkap para raray lupeng laku-laku.

           

᭒᭞       ᬢᬦ᭄ᬢᭀᬦ᭄ᬤᬾᬦ᭄ᬬᬳᬦᬾᬂᬤᬮᬦ᭄ᬓᬧᭂᬦᬸᬳᬦ᭄ᬢᭂᬓᬧ᭄ᬩᬢᬸᬩᬢᬸ᭞

ᬮᬸᬜ᭄ᬘᬶᬧ᭄ᬢᬶᬓ᭄ᬱ᭄ᬡᬓᬭᬂᬭᬶᬫᬵᬃᬕᬬᬮᬶᬦᬗ᭄ᬓᬳᬾᬂᬢᭂᬓᬧᬶᬭ᭞

ᬢᬸᬃᬮᬾᬦ᭄ᬭ᭄‌ᬭ᭄ᬯᬶᬭ᭄ᬯᬶᬧᬘᭂᬓ᭄ᬫᬓᬷᬃᬡᬭᬶᬤᬮᬦ᭄ᬢᬶᬦᬶᬡ᭄ᬥᬓᬲᬫ᭞

ᬦᬵᬳᬦ᭄ᬯᬶᬖ᭄ᬦᬭᬶᬫᬵᬃᬕᬢᬦ᭄ᬭᬶᬦᬲᬤᬾᬭᬭᬬ᭄ᬧ᭄ᬭᬲᬫᬬ᭛

2.         Tan ton denya haneng dalan kapĕnuhan tĕkap batu-batu

Luñcip tikṣṇa karang ri mārga ya linangkahĕn tĕkapira

Tur len rwi-rwi pacĕk makīrṇa ri dalan tiniṇḍaka sama

Nāhan wighna ri mārga tan rinasa de raray prasama ya.

 

᭓᭞       ᬯᬾᬢ᭄ᬦᬶᬂᬯᬸᬲ᭄ᬓᭂᬦᬓᬂᬚᬭᬶᬂᬲᬸᬢᭂᬭᬲᬗ᭄ᬓᬭᬶᬂᬰ᭄ᬯᬭᬲᬸᬮᬶᬂ᭞

ᬫᬗ᭄ᬤᭀᬄᬮᬫ᭄ᬧᬳᬶᬓᬂᬭᬭᬬ᭄ᬧ᭄ᬭᬲᬫᬭᬾᬄᬢᬸᬫᬹᬢ᭄ᬰ᭄ᬯᬭᬲᬸᬮᬶᬂ᭞

ᬮ᭄ᬯᬶᬃᬕᭀᬄᬢᬹᬢ᭄ᬧᬗᬗᭀᬦ᭄ᬭᬭᬬ᭄ᬕᬡᬫᬦᬸᬄᬫᬢᬹᬢ᭄ᬰ᭄ᬯᬭᬲᬸᬮᬶᬂ᭞

ᬢᬦ᭄ᬯ᭄ᬯᬦ᭄ᬢᭂᬦ᭄ᬩᬮᬯᬵᬮᬭᬶᬂᬳᬓᬸᬝᬢᬦ᭄ᬢᬸᬫᬹᬢ᭄ᬰ᭄ᬯᬭᬲᬸᬮᬶᬂ᭛

3.         Wet ning wus kĕna kang jaring sutĕra sangka ring ṡwara suling

Mangdoh lampah-ikang raray prasama reh tumūt ṡwara suling

Lwir goh tūt pangangon raray gaṇa manuh matūt ṡwara suling

Tan wwantĕn bala wāla ring akuṭa tan tumūt ṡwara suling.

 

᭔᭞         ᬫᬗ᭄ᬓᬶᬦ᭄ᬤᭀᬄᬮᬓᬸᬦᬶᬂᬓᬶᬭᬵᬢᬫᬗᬗᭀᬦ᭄ᬭᬭᬬ᭄ᬭᬶᬳᬫᬾᬮᬶᬦ᭄᭞

ᬫᬗ᭄ᬯᬾᬢᬦ᭄ᬧ᭄ᬯᬫᭂᬦᬾᬭᬭᬶᬲ᭄ᬮᬸᬫᬓᬸᬭᬶᬂᬩᬸᬓᬶᬢ᭄ᬲᬫᬲᬫ᭞

ᬧ᭄ᬭᬵᬧ᭄ᬢᬾᬂᬧᬃᬯᬢᬫᬲ᭄ᬢᬓᬕ᭄ᬬᬧᬭᬯᬵᬮᬫᬸᬲ᭄ᬦᬲᬧᬶᬲᬦ᭄᭞

ᬢᬦ᭄ᬓᬯ᭄ᬭᬸᬄᬓᬳᬦᬦ᭄ᬦ᭄ᬬᬢᬹᬃᬚᬸᬭᬸᬲᬸᬮᬶᬂᬧᬋᬂᬦᬫᬸᬦᬫᬸ᭛

4.         Mangkin doh laku ning Kirāta mangangon raray ri Hamĕlin

Mangwetan pwa mĕne raris lumaku ring bukit sama-sama

Prāpteng parwata mastaka gya para wāla musna sapisan

Tan kawruh kahanannya tūr Juru Suling parĕng namu-namu                       

 

᭕᭞        ᬓᭀᬚᬃᬫᬗ᭄ᬓ᭄ᬬᬭᬶᬯᬸᬲ᭄ᬬᬧᭀᬭᬚᬦᬫᬦ᭄ᬢᬸᬓᬾᬂᬓᬸᬯᬸᬦᬶᬭ᭞

ᬳᬢ᭄ᬬᬦ᭄ᬢᬧ᭄ᬯᬯᬶᬫᬹᬃᬘᬭᬶᬂᬳᬢᬶᬫᬦᭀᬦ᭄ᬭᬭᬬ᭄ᬦᬶᬭᬳᬶᬮᬂ᭞

ᬫᬓ᭄ᬭᬓ᭄ᬚ᭄ᬭᬶᬢ᭄ᬦ᭄ᬬᬫᬯᬦ᭄ᬢᬸᬢᬸᬮ᭄ᬬᬫᬸᬦᬶᬳᬫ᭄ᬧᬸᬳᬦ᭄ᬢᬾᬧᬶᬧᬭᬂ᭞

ᬤᬾᬦᬕ᭄ᬮᬶᬲ᭄ᬧᬭᬯᬃᬕᬫᬫ᭄ᬭᬶᬳᬶᬭᬭᬬ᭄ᬭᬭᬬ᭄ᬦᬶᬭᬲᬫᬶ᭛

5.         Kojar mangkya ri wus ya porajana mantukeng kuwunira

Atyanta pwa wimūrca ring hati manon raraynira hilang

Makrak jritnya mawantu tulya muni ampuhan tĕpi parang

Den-aglis para warga mamrihi raray-raraynira sami.

 

᭖᭞        ᬮᬹᬤ᭄‌ᬯ᭄ᬯᬦ᭄ᬢᭂᬦ᭄ᬧ᭄ᬯᬭᬭᬬ᭄ᬢᬶᬕᬂᬲᬶᬓᬶᬲᭂᬥᭂᬂᬭᬶᬫᬵᬃᬕᬢᬶᬦᭂᬫᬸ᭞

ᬗ᭄ᬳᬶᬂᬲᭀᬯᬂᬦ᭄ᬬᬯᬶᬓᬵᬭᬲᬗ᭄ᬓᬭᬶᬫᬶᬚᬶᬮ᭄ᬫᬢᬂᬦᬶᬭᬓᬲᬾᬧ᭄᭞

ᬧᬶᬜ᭄ᬘᬂᬢᬸᬃᬯᬸᬢᬮᬾᬦ᭄ᬫᬮᬶᬄᬢᬸᬮᬶᬭᬭᬬ᭄ᬳᬦᬾᬂᬳᭂᬦᬸᬳᬶᬓ᭞

ᬦᬵᬳᬦ᭄ᬓᬵᬭᬡᬲᬂᬭᬭᬬ᭄ᬓᬢᬶᬕᬓᭀᬘᬶᬯᬾᬂᬭᬬᬧᬣ᭛

6.         Lūd wwantĕn pwa raray tigang siki sĕḍĕng ri mārga tinĕmu

Nghing sowangnya wikāra sangka ri mijil     matangnira kasep

Piñcang tur wuta len malih tuli raray haneng hĕnu ika

Nāhan kāraṇa sang raray katiga kociweng rayapatha.

           

᭗᭞       ᬲᬂᬓᭀᬝᬾᬦ᭄ᬤ᭄ᬭᬕᭂᬮᬶᬲ᭄ᬫᬢᬓ᭄ᬯᬦᬭᬶᬲᬂᬭᬭᬬ᭄ᬫᬓᬢᬶᬕ᭞

ᬳᬾᬄᬭᬶᬂᬳᭂᬦ᭄ᬤᬶᬓᬓᬂᬳᬭᬶᬦ᭄ᬢᬫᬧᬕᬯ᭄ᬬᬤᬾᬦ᭄ᬢᬳᬶᬭᬶᬓ᭞

ᬲᬂᬧᬶᬜ᭄ᬘᬂᬳᬸᬫᭀᬚᬃᬳᬮᭀᬦ᭄ᬫᬦᬳᬸᬢᬶᬂᬳᬸᬘᬧ᭄ᬳᬸᬮᬸᬓᬸᬝ᭞

ᬲᬶᬗ᭄ᬕᬶᬄᬯᭀᬬᬫᭂᬦᬾᬳᬦᬓ᭄ᬳᬸᬯᬢᬸᬫᬹᬢ᭄ᬭᬶᬲᬂᬯᬚᬸᬯᬶᬮᬶᬲ᭄᭛

7.         Sang Koṭendra gĕlis matakwana ri sang raray makatiga

Heh ring ĕndi kakang arinta mapa gawya denta iriki

Sang piñcang umojar alon manahut-ing ucap hulukuṭa

Singgih woya mĕne anak uwa tumūt ri Sang Waju Wilis.

 

᭘᭞       ᬤᬾᬦᬶᬂᬗ᭄ᬯᬂᬓᬤᬳᬸᬢ᭄ᬢᭂᬓᬧ᭄ᬫᬸᬦᬶᬦᬶᬓᬂᬲᬸᬮᬶᬂᬫᬥᬸᬫᬦᬶᬲ᭄᭞

ᬢᬸᬃᬲᬵᬦᬓ᭄ᬫᬫᬶᬢᬦ᭄ᬢᬳᭂᬦ᭄ᬭᬶᬫᬦᬶᬲᬶᬂᬰ᭄ᬯᬭᬵᬢᬶᬫᬭᬫᬾ᭞

ᬗ᭄ᬳᬶᬂᬢᬦ᭄ᬲᬶᬤ᭄ᬥᬢᭂᬓᬧ᭄ᬳᬦᬓ᭄ᬢᬢᬸᬫᬸᬭᬸᬢ᭄ᬫᬭᬶᬂᬮᬓᬸᬦᬶᬭ᭞

ᬳᬦ᭄ᬢᬃᬮᬷᬦᬲᬓᬾᬂᬧᬦᭀᬦ᭄ᬫᬫᬶᬭᬶᬯᬸᬲ᭄ᬮᬶᬯᬢ᭄ᬫᬭᬳᬸᬓᬶᬃ᭛

8.         de ning ngwang kadahut tĕkap muni nikang suling madhu manis

tur sānak mami tan tahĕn ri manis-ing ṡwarātimarame

nghing tan siddha tĕkap anakta tumurut maring lakunira

antarlīna sakeng panon mami ri wus liwat mara ukir.

 

᭙᭞       ᬭᬾᬄᬢᬶᬫ᭄ᬧᬂᬲᬸᬓᬸᬗᭀᬂᬤᬸᬫᬾᬄᬦ᭄ᬬᬓᬸᬘᬶᬯᬾᬂᬤᬮᬦ᭄ᬓᬬᬫᭂᬦᬾ᭞

ᬫᭀᬚᬃᬲᬂᬯᬸᬢᬫᬗ᭄ᬓ᭄ᬬᬤᬸᬄᬫᬫᬶᬧᬢᭂᬄᬫᬢᬹᬢ᭄ᬫᬸᬦᬶᬲᬸᬮᬶᬂ᭞

ᬗ᭄ᬳᬶᬂᬢᬦ᭄ᬢᭀᬦ᭄ᬢᭂᬓᬧᬶᬗ᭄ᬳᬸᬮᬸᬦ᭄ᬭᬶᬮᬓᬸᬦᬶᬂᬓᬓᬂᬫᬫᬶᬯᬦᬾᬄ᭞

ᬫᬵᬧᬦ᭄ᬢᬦ᭄ᬓᬤᭂᬎᬧᬫᬵᬃᬕᬫᬢᭂᬫᬄᬳᬶᬗᭀᬂᬓᬭᬶᬯᬸᬭᬶ᭛

9.         reh timpang suku ngong dumehnya kuciweng dalan kaya mĕne

mojar sang wuta mangkya duh mami patĕh matūt muni suling

nghing tan ton tĕkap-inghulun ri laku ning kakang mami waneh

māpan tan kadĕlö pamārga matĕmah ingong kari wuri                     

 

᭑᭐᭞     ᬲᬂᬢᬶᬫ᭄ᬧᬂᬳᬕᭂᬮᬶᬲ᭄ᬫᬸᬘᬧ᭄ᬮᬕᬶᬫᬭᬶᬂᬦᬭᬾᬦ᭄ᬤ᭄ᬭᬳᬫᭂᬮᬶᬦ᭄᭞

ᬲᬂᬢᬸᬗ᭄ᬕᬮ᭄ᬳᬶᬓᬶᬫᬶᬢ᭄ᬭᬦᬶᬂᬫᬫᬶᬧᬋᬂᬢᬸᬫᬹᬢ᭄ᬢᬧᬶᬢᬸᬮᬶ᭞

ᬲᬯ᭄ᬬᬓ᭄ᬢᬶᬧ᭄ᬯᬳᬶᬧᬸᬦ᭄‌ᬦ᭄ᬤᬢᬦ᭄ᬳᬫᬶᬭᬸᬗᬸᬰ᭄ᬯᬭᬦ᭄ᬲᬲᬸᬮᬶᬗᬦ᭄᭞

ᬲᬯ᭄ᬬᬓ᭄ᬢᬶᬧ᭄ᬯᬫᬦᬄᬳᬶᬧᬸᬦ᭄ᬲᬧᬤᬸᬮᬸᬃᬮᬯᬦ᭄ᬓᬸᬮᬚᬸᬕ᭛

10.      sang timpang agĕlis mucap lagi maring Narendra Hamĕlin

sang tunggal iki mitra ning mami parĕng tumūt tapi tuli

sawyakti pwa ipun ndatan amirungu ṡwara n sasulingan

sawyakti pwa manah ipun sapadulur lawan kula juga.

 

᭑᭑᭞  ᬦᬵᬳᬦ᭄ᬳᬾᬢᬸᬦᬶᬧᬸᬦ᭄ᬬᬓᬾᬯᬮᬢᬸᬫᬹᬢ᭄ᬭᬶᬕᭀᬢ᭄ᬭᬫᬮᬓᬸ᭞

ᬢᬦ᭄ᬲᬗ᭄ᬓᬦ᭄ᬲᬶᬭᬫᬗᬺᬗᭃᬫᬸᬦᬶᬲᬸᬮᬶᬂᬦᬗᬶᬂᬓ᭄ᬭᬡᬳᬶᬲᭂᬂ᭞

ᬯᬸᬲ᭄ᬫᬗ᭄ᬓᬾᬓᬋᬗᭃᬳᬸᬚᬃᬲᬶᬢᬶᬕᬮᬹᬤ᭄ᬲᬫᬹᬳᬫᬢᬶᬮᬃ᭞

ᬮᬸᬗ᭄ᬳᬾᬂᬧᬃᬯᬢᬫᬗ᭄ᬭᬸᬭᬸᬄᬧᬭᬭᬭᬬ᭄‌ᬦ᭄ᬤᬢᬦ᭄ᬮᬫᬳᬗᭂᬦ᭄᭛

11.      nāhan hetu nipun ya kewala tumūt ri gotra malaku

tan sangkan sira mangrĕngö muni suling nanging kraṇa isĕng

wus mangke karĕngö ujar si tiga lūd samūha matilar

lungheng parwata mangruruh para raray ndatan lama angĕn.

 

᭑᭒᭞   ᬲᭂᬓ᭄ᬧ᭄ᬯᬾᬓᬂᬕᬶᬭᬶᬭᬾᬄᬧᭂᬦᬸᬄᬢᭂᬓᬧᬶᬯᭀᬂᬲᬓᬾᬂᬳᬫᬮᬶᬳᬶᬦ᭄᭞

ᬢᬦ᭄ᬧᬗ᭄ᬕᬶᬄᬦ᭄ᬬᬭᬭᬬ᭄ᬤᬗᬹᬮᬸᬗᬫᬭᬶᬂᬕᭂᬕᭂᬃᬕᬶᬭᬶᬦᬶᬓ᭞

ᬮ᭄ᬯᬶᬃᬦ᭄ᬬᬦ᭄ᬫᬸᬲ᭄ᬦᬢᬢᬦ᭄ᬫᬰᬾᬱᬓᬢᬥᬄᬢᭂᬓᬧ᭄ᬕᬶᬭᬶᬕᬸᬳᬵ᭞

ᬢᬦ᭄ᬤ᭄ᬯᬕ᭄ᬮᬶᬲ᭄ᬫᬲᬲᬫ᭄ᬩᬢᬦ᭄ᬧ᭄ᬯᬬᬲᭂᬲᭂᬓ᭄ᬧᭂᬦᬸᬄᬭᬶᬕᬕᬦ᭛

12.      sĕk pwekang giri reh pĕnuh tĕkap-i wong sakeng Hamalihin

tan panggihnya raray dangū lunga maring gĕgĕr giri nika

lwirnyan musna tatan maṡeṣa kataḍah tĕkap giriguhā

tan dwa glis masasambatan pwa ya sĕsĕk pĕnuh ri gagana.

           

᭑᭓᭞   ᬮ᭄ᬬᬦ᭄ᬯᬤ᭄ᬯᬦ᭄ᬓᬭᬶᬭᬶᬂᬳᬸᬫᬄᬚᬸᬕᬫᬲᬫ᭄ᬩᬢᬦ᭄ᬢᬸᬳᬸᬮᬭ᭞

ᬫᬤᬺᬲ᭄ᬮᬸᬄᬦᬶᬭᬢᬸᬮ᭄ᬬᬯᬃᬱᬢᬶᬩᬫᬵᬲᬦᬶᬂᬓᬧᬶᬢᬸᬬ᭞

ᬮᬾᬦ᭄ᬫᬵᬮᬶᬄᬲᬸᬭᬓᬶᬂᬯᬢᭂᬓ᭄ᬧ᭄ᬭᬚᬦᬢᬸᬮ᭄ᬬᬓᬵᬮᬭᬶᬭᬡ᭞

ᬢᬸᬃᬢᬸᬂᬢᬸᬂᬧᬦᬗᬶᬲ᭄ᬦ᭄ᬬᬲᬓ᭄ᬱᬡᬳᬫᬶᬦ᭄ᬢᬲᬶᬄᬫᬭᬯᬶᬥᬶ᭛

13.      lyan wadwan kari ring umah juga masambatan tuhu lara

madrĕs luhnira tulya warṣa tiba māsa ning kapitu ya

len mālih surak-ing watĕk prajana tulya kāla ri raṇa

tur tungtung panangisnya sakṣaṇa aminta sih mara Widhi.  

 

᭑᭔᭞     ᭓᭯ᬵᬲᭂᬫ᭄ᬩᬄᬲᬶᬭᬲᬂᬫᬳᬵᬰᬸᬘᬶᬋᬗᭃᬦ᭄ᬮᬭᬾᬂᬳᬢᬶᬫᬫᬶ᭞

ᬬᬦ᭄ᬢᬦ᭄ᬯᭀᬬᬫᬯᬮ᭄ᬬᬯᬵᬮᬳᬫᭂᬮᬶᬦ᭄ᬫᬭᬶᬂᬩᬧᬋᬡ᭞

ᬦᬶᬃᬤᭀᬦ᭄‌ᬗ᭄ᬯᬂᬫᬳᬸᬭᬶᬧ᭄ᬭᬶᬓᬂᬓᬸᬝᬲᬫᬗ᭄ᬓᬦᬧ᭄ᬯᬳᬶᬦᬸᬘᬧ᭄᭞

ᬤᬾᬦᬶᬂᬭᬵᬫᬋᬡᬦ᭄ᬬᬲᬂᬘᬶᬮᬶᬳᬶᬮᬂᬢᬥᬄᬫᬸᬦᬶᬫᬦᬶᬲ᭄᭛

14.      Oṁ sĕmbah sira sang mahā ṡuci rĕngön lareng hati mami

yan tan woya mawalya wāla Hamĕlin maring bapa rĕṇa

nirdon ngwang mahurip rikang kuṭa samangkana pwa inucap

de ning rāma rĕṇanya sang cili hilang taḍah muni manis      .

 

᭑᭕᭞    ᬲᬵᬢᬸᬲ᭄ᬢ᭄ᬭᬷᬡᬶᬧᬸᬮᬸᬄᬭᬭᬬ᭄ᬭᬶᬳᬫᭂᬮᬶᬦ᭄ᬳᬶᬘᬮ᭄ᬲᬧᬶᬲᬦᬦ᭄᭞

ᬢᬦ᭄ᬮ᭄ᬬᬦ᭄ᬯᬸᬕ᭄ᬳᬫᭂᬮᬶᬦ᭄ᬓᬬᬾᬂᬓᬸᬦᬤᬯᭂᬕ᭄ᬋᬩᬸᬢ᭄ᬧᬭᬢᬶᬓᬸᬲ᭄᭞

ᬫᬾᬄᬕᭃᬗᬦ᭄ᬮᬭᬓᬂᬥᬢᭂᬂᬓᬤᬶᬫᭂᬦᬾᬬᬦᬶᬂᬳᬶᬦᬸᬧᬫ᭞

ᬦᬵᬓᬶᬂᬓᬶᬂᬳᬧᬸᬢᭂᬓ᭄ᬭᬯᬸᬄᬭᬶᬳᬫᭂᬮᬶᬦ᭄ᬓᬬᬤᬗᬹ᭛

15.      sātus trīṇi puluh raray ri Hamĕlin ical sapisanan

tan lyan wug Hamĕlin kayeng kuna dawĕg rĕbut para tikus

meh göngan lara kang ḍatĕng kadi mĕne yaning inupama

nā kingking aputĕk rawuh ri Hamĕlin malih kaya dangū.

 

᭑᭖᭞    ᬯᬶᬭ᭄ᬯᬂᬭ᭄ᬯᭀᬂᬲᬯᬢᭂᬓ᭄ᬳᬶᬓᬂᬩᬮᬢᬢᬦ᭄ᬢᬶᬦᬫ᭄ᬩᬦᬮᬕᬶ᭞

ᬳᬵᬪᬵᬦᬶᬂᬭᬯᬶᬢᬦ᭄ᬧ᭄ᬭᬲᬶᬤ᭄ᬥᬫᬫᬶᬲᬃᬚᬦᬂᬤᬸᬓᬫᬬ᭞

ᬗ᭄ᬓᬵᬭᬶᬂᬫᬵᬃᬕᬯᭂᬓᬲ᭄ᬭᬭᬬ᭄ᬮᬸᬫᬓᬸᬗᬹᬦᬶᬰᬵᬧᬓᬢᬶᬩ᭞

ᬢᬦ᭄ᬓᬯ᭄ᬦᬂᬫᬯᬶᬭᬵᬫᬢᬸᬃᬫᬸᬦᬶᬲᬸᬮᬶᬂᬭᬯᬸᬄᬬᬭᬶᬳᭂᬍᬫ᭄᭛

16.      Wirwangrwong sawatĕk ikang bala tatan tinambana lagi

Ābhā ning rawi tan prasiddha mamisarjana ng dukamaya

Ngkā ring mārga wĕkas raray lumaku ngūni ṡāpa katiba

Tan kawnang mawirāma tur muni suling rawuh ya ri hĕlĕm.

 

᭑᭗᭞   ᬦᬵᬳᬦ᭄ᬯᬵᬓ᭄ᬬᬤᬗᬹᬓᬣᬵᬦᬶᬭᬲᬶᬧᬶᬤ᭄ᬧᬶᬧᭂᬃᬳᬶᬦᬸᬚᬭᬦ᭄᭞

ᬧᭀᬮᬶᬄᬗ᭄ᬯᬂᬫᬦᬸᬮᬃᬲᬓᬾᬂᬳᬫᬶᬋᬗᭃᬢᬸᬢᬸᬃᬢᭂᬗᬢᭂᬗ᭞

ᬫ᭄ᬯᬂᬢᭀᬦ᭄ᬢᭀᬦ᭄ᬫᬫᬶᬤᬸᬓ᭄ᬭᬭᬬ᭄ᬭᬶᬢᬶᬧᬶᬫᬗ᭄ᬮᬗᭂᬦ᭄ᬢᭂᬓᬫᭂᬦᬾ᭞

ᬧᬰ᭄ᬘᬢ᭄ᬤᬾᬲᬶᬲᬳᬵᬬᬧᬦ᭄ᬤ᭄ᬬᬫᬗᬶᬓᭂᬢ᭄ᬫᬭᬹᬧᬬᬲᭂᬓᬭ᭄᭛᭐᭛

Nāhan wākya dangū kathānira Si Pid Pipĕr inujaran

Polih ngwang manular sakeng amirĕngö tutur tĕnga-tĕnga

Mwang tonton mami duk raray ri tipi manglangĕn tĕka mĕne

Paṡcat de Si Sahāya Pandya mangikĕt marūpa ya sĕkar.

 

᭑᭞       ᬯᭀᬬᬾᬂᬳᬮ᭄ᬧᬲᬸᬭᬢ᭄ᬳᬫᭀᬕᬢᬪᬝᬵᬭᬰᬶᬯᬤᬳᬦᬯᬵᬭᬦᬸᬕ᭄ᬭᬳ᭞

ᬢᬦ᭄ᬮ᭄ᬬᬦ᭄‌ᬧᬵᬤᬸᬓᬭᬢ᭄ᬦᬲᬫ᭄ᬪᬯᬲᬶᬦᭂᬫ᭄ᬩᬳᬲᬓᬤᬶᬭᬶᬫᬗ᭄ᬕᬮᬾᬂᬓᬣᬵ᭞

᭓᭯ᬵᬅ᭯ᬓᬵᬭᬓᬪᬓ᭄ᬢᬶᬦᬶᬂᬫᬫᬶᬳᬦᬾᬂᬓᬯᬶᬬᬤᬶᬬᬓᬸᬭᬂᬮᬸᬧᬸᬢ᭄ᬲᬫᬶ᭞

ᬲᭂᬗ᭄ᬕᬸᬄᬮᭀᬪᬫᬦᬳ᭄ᬓᬸᬫᭀᬕᬭᬶᬳᬸᬮᬸᬦ᭄ᬫᬢᬶᬤᬤᬶᬦᬲᬶᬳᬗ᭄ᬓᭂᬩᬦ᭄ᬚᭂᬫᬄ᭛

1.           Woyeng alpasurat amoga ta Bhaṭāra Ṡiwa Dahana wāranugraha

Tan lyan pāduka Ratnasambhawa sinĕmbaha sakadi ri manggaleng kathā

Oṁ Angkāra kabhakti ning mami haneng kawi yadi ya kurang luput sami

Sĕngguh lobha manahku moga ri hulun mati dadi nasi angkĕban jĕmah.

᭒᭞       ᬓᭀᬚᬃᬤᬸᬓ᭄ᬳᬗᬯᬶᬢ᭄ᬳᬶᬓᬂᬘᬭᬶᬢᬭᬶᬂᬤᬶᬦᬲᬸᬓᬚᬶᬦᬫᬹᬃᬢᬶᬲᭀᬤ᭄ᬭᬯ᭞

ᬳ᭄ᬬᬂᬰ᭄ᬭᬷᬭᬸᬤ᭄ᬭᬕᬸᬦᬸᬂᬭᬸᬳᬸᬃᬳᬸᬫᭂᬗᬯᬲ᭄ᬫᬭᬭᬶᬯᬸᬓᬸᬰᬲ᭄ᬢ᭄ᬭᬦᬶᬂᬲᬗ᭞

ᬫ᭄ᬯᬂᬢᬗ᭄ᬕᬮ᭄ᬲᬯᭂᬮᬲ᭄‌ᬰᬰᬶᬄᬓᬤᬰᬯᬃᬱᬭᬲᬕᬸᬭᬸᬮᬯᬦ᭄ᬦᬶᬪᬵᬱ᭄ᬓᬭ᭞

ᬢᬗ᭄ᬕᬮ᭄ᬯᬶᬗ᭄ᬰᬢᬶᬭᬶᬂᬫᬋᬢ᭄ᬚᬮᬥᬶᬮᭀᬘᬦᬢᬬᬪᬸᬚᬓᭀᬘᬧᬦ᭄ᬚᬸᬕ᭛

2.           Kojar duk angawit ikang carita ring dina suka Jinamūrti sodrawa

Hyang ṡrī Rudra gunung ruhur umĕnga was mara ri wuku ni ṡastra ning sanga

Mwang tanggal sawĕlas ṡaṡih kadaṡa warṣa rasa guru lawang ni bhāṣkara

Tanggal wingṡati ring Marĕt jaladhi locana taya bhuja kocapan juga

 

᭓᭞       ᬦ᭄ᬤᬦ᭄ᬧᬰ᭄ᬘᬢ᭄ᬢᬶᬦᬸᬮᬶᬲ᭄ᬭᬶᬓᬂᬬᬫᬫᬦᬸᬄᬧᬶᬦᬶᬲᬳᬧᬦᬶᬭᭀᬦ᭄ᬭᬶᬲᭀᬕᬢ᭞

ᬭᬶᬂᬧᬹᬚᬵᬯᬮᬶᬤᬾᬯᬭᬶᬂᬧᬸᬭᬓᭂᬳᭂᬦ᭄ᬯᬭᬭᬸᬘᬶᬭᬭᬶᬩᬗ᭄ᬮᬶᬫᬡ᭄ᬥᬮ᭞

ᬭᬶᬂᬢᬗ᭄ᬕᬮ᭄‌ᬭ᭄ᬯᬯᭂᬮᬲ᭄ᬢᬳᬸᬦ᭄ᬋᬢᬸᬢᬲᬶᬓ᭄ᬯᬶᬯᬭᬦᭂᬫᬸᬧᬚᬂᬤᬸᬓᬶᬂᬓᬸᬍᬫ᭄᭞

ᬫ᭄ᬯᬂᬭᬶᬂᬰ᭄ᬭᬵᬯᬡᬫᬵᬲᬤᬸᬓ᭄ᬰᬶᬰᬶᬭᬓᬵᬮᬫᬦᬧᬸᬢᬶᬳᬗᭂᬦ᭄ᬓᬢᬸᬭᬶᬤᬦ᭄᭛

3.           Ndan paṡcat tinulis rikang Yama manuh pinisaha paniron ri sogata

Ring pūjāwali dewa ring Pura Kĕhĕn wara rucira ri Bangli maṇdhala

Ring tanggal rwa wĕlas tahun rĕtu tasik wiwara nĕmu pajang duk-ing kulĕm

Mwang ring ṡrāwaṇamāsa duk ṡiṡirakāla manaputi angĕn katuridan.

 

᭔᭞         ᬭᬶᬂᬩᬜ᭄ᬚᬃᬦᬶᬭᬕᭀᬲᬮᬶᬧ᭄ᬯᬧᬫᬸᬧᬸᬢ᭄ᬓᬯᬶᬧᬸᬦᬶᬓᬶᬓᬭᬾᬓᬤᬾᬦ᭄ᬳᬸᬮᬸᬦ᭄᭞

ᬫᬸᬗ᭄ᬕ᭄ᬯᬶᬂᬬᭀᬦ᭄ᬬᬮᬬᬧ᭄ᬭᬤᬾᬰᬓᬸᬯᬸᬦᬶᬂᬫᬫᬶᬳᬶᬓᬶᬳᬦᬭᬶᬂᬩᬮᬾᬃᬚᬸᬭᬂ᭞

ᬩᬵᬬᬩ᭄ᬬᬾᬂᬲᭂᬫᬍᬢ᭄ᬫᬭᬶᬂᬢᭂᬧᬶᬲᬶᬭᬶᬂᬮᬕᬶᬮᬕᬶᬧᬧᬤᬸᬪᬬᬗ᭄ᬓᬭᬵᬰ᭄ᬭᬫ᭞

ᬦᬵᬳᬦ᭄ᬯᬾᬰ᭄ᬫᬲᬳᬵᬬᬧᬦ᭄ᬤ᭄ᬬᬲᬓᬭᬶᬂᬬᬰᬩᬧᬦᬶᬭᬓᬂᬳᬸᬯᬸᬲ᭄ᬫᬸᬮᬶᬄ᭛

4.           Ring Banjarnira Gosali pwa pamuput kawi puniki kareka den hulun

Munggwing Yonyalaya pradeṡa kuwu ning mami iki hana ring baler jurang

Bāyabyeng Sĕma Lĕt maring tĕpisiring lagi papadu Bhayangkarāṡrama

Nāhan weṡma Sahāya Pandya saka ring yaṡa bapanira kang huwus mulih.

 

᭕᭞        ᬗ᭄ᬳᬶᬂᬕᭃᬂᬲᬫ᭄ᬧᬸᬭᬦᬶᬂᬳᬸᬮᬸᬦ᭄ᬭᬶᬧᬭᬲᬵᬥᬸᬚᬦᬓᬯᬶᬯᬭᬾᬂᬲᬭᬵᬢ᭄ᬲᬫᬶ᭞

ᬫ᭄ᬯᬂᬭᬶᬂᬲᬂᬳᬫᬘᬧ᭄ᬭᬮᬫ᭄ᬧᬶᬢᬓᬣᬵᬦᬶᬓᬶᬬᬓᬢᬶᬰᬬᬦ᭄ᬳᬶᬧᬮ᭄ᬳᬶᬧᬮ᭄᭞

ᬗ᭄ᬯᬂᬧᬸᬗ᭄ᬕᬸᬂᬯᬦᬶᬮᬾᬦ᭄ᬘᭂᬓᬧ᭄ᬫᬦᬶᬭᬸᬲᬂᬧᬸᬢᬸᬲᬶᬕᬸᬭᬸᬮᬖᬸᬧ᭄ᬭᬥᬵᬦᬬ᭞

ᬓ᭄ᬱᬦ᭄ᬢᬯ᭄ᬬᬵᬓ᭄ᬦᬲᬳᬵᬬᬧᬵᬤᬸᬓᬧᬶᬧᬷᬮᬶᬓᬫᬭᬲᬥᬯᬓ᭄‌ᬤ᭄ᬯᬶᬧᬵᬗ᭄ᬕᬬ᭛

5.           Nghing göng sampura ning hulun ri para sādhujana kawiwareng sarāt sami

Mwang ring sang amaca pralampitakathā niki ya katiṡayan ipal-ipal

Ngwang punggung wani len cĕkap maniru sang putus-i guru laghu pradhāna ya

Kṣantawyākna Sahāya pāduka pipīlika marasa dhawak dwipāngga ya.