Babad Pande - Pratata Lingga nikang Prajurit (Bagian I)

 Pratata Lingga nikang Prajurit

I

-o- ONG Awighnamastu nama śiwaya -o-  Iti pratata linggā nikang prajurit, sané tumurun ka Bali, marahéng Wilwatikṭa, duk sawiji matĕmahan akwéh. Kawit mayoga sira sang hyang Sinuhun Kidul, umĕtw ikang catūr janma. Brahmāṇa mĕtu ring, WANG. Kṣatriya mĕtu ring, ONG. Wéṣya mĕtu ring, ANG. Śūdra mĕtu ring MANG. Yatika prasama putranira bhaṭāra sang hyang Sinuhun Kidul. Kunang mwah sang kṣatriya, atĕmahan andadi rātu cakra wartīng sarāt. Kunang sang brahmāṇa, sira maka sūrya ning sarāt. Maka ngūni sira wéṣya, atĕmahan pwa sira papatih, amangkwa nagara ring Wilwatikṭa. Tĕkwan sira śūdra, sira pwa maka kawulaning ratu, mangkana kapradatanya ring kunā.

Kunang mwah sira sang brahmāṇa, alunggwing Katépéng Régés, sira kṣatriya alungguh ring Wilwatikṭa, alaki pwa sira gagani. Wĕkasan asuta pwa sira, 9, padha laki, paripūrṇa. Sang maka pamahyun titisira bhaṭāra Brahmā, sira aśāsaṇa ring Lulumbang. Atiśaya śakti sira, mwang wiśéṣa, tan arṣa pwa jumĕnĕngana ratu. Apan mahalĕwih kaśaktinira, siddhyajñana nira ring luhuring ukir, ya hĕtuning tan kahyun, arĕp akārya sañjata, apalon tangan, alaṇdhĕsan pupu, amĕtu ikang aghni saking lĕpa-lĕpa ning tangan.

Kunang arinira kang pamadhé sira pwa sinangguh pamahyun, jumĕnĕngana ratu ring Witana. Kang pamadhé mwah arinira, atĕngĕran radén Ārya Kĕñcĕng, sanging wuruju atĕngĕran sirārya Bléténg, sang i wĕkas, akakasih pwa sirārya Sĕntong. Mwah sang ari ngaran sirārya Biñjuluk, malih Ārya Kapakisan, makangūni sirārya Kuṭa Waringin, mwah Ārya Bĕlog, malih sirārya Watang. Kunang sirārya Kĕñcĕng sira ta umadĕg patih dé sang prabhu.

Sah saking Wilwatikṭa, jumujug pwa sira ring panagara Bangsul, lawan sanakira kabéh. Hana pawéh ira Sira Mpu Brahmā Wiśéṣa, ring sasanakira sadhaya, makangūni sang prabhu. Prasama kasinungan kĕris, maka pajĕnĕngan mwang lalaṇdhĕp watang, katatwannya makapangarĕp musuh, katĕkéng durātmaka. Ya hétunya Sira Mpu Brahmā Wiśéṣa, tĕlas añinungakĕn sañjata, mangkana prastāwanya ring kuna.

Nihan mwah hana sutanira Sira Mpu Brahmā Wiśéṣa, akakasih pwa Sira Mpu Śiwa Saguṇa, paparĕng pwa sira tumurun marahéng panagara Bangsul. Jumujug aśāsana ring Gélgél, ariné kāri ring Yawa Wilwatika, aśāsana ring Lalumbang, aranira Mpu Gandring, anawita ring ariné sang prabhu ring Wilwatikṭa. Nĕhĕr hana ring Jawa.

Tucapakna mwah sang lungha ka Bali, sapraptané panagara Bangsul, Sira Mpu Śiwa Saguṇa, aśāsana pwa sira maring pradéśa Tusan, tan lingĕn pwa karĕṣṭyanira. Pira ta kunang lawasnira amutĕring nagara Bangsul, awyatara, 7, tahun. Tan hana pwa sira adrĕwé suta, apan kaméddha olih ki Bhūta Wawangsilan. Tĕkwan sirārya Kĕñcĕng amatihin sang ratu, malar tan adrĕwé suta, kapangan dé Bhūta Wawangsilan, mangkana caritanya ngūni.

Mangké ucapakna mwah sira sang amutĕring Bangsul, walwi umantuk maring Majalangu mwah. Kunang sang apatih Ārya Kĕñcĕng, tumūt pwa sira lungha maring Majapahit, tan kari Sira Mpu Śiwa Saguṇa, tumūt maring Wilwatikṭa. Tan kathākna lampahira, wus prapténg Majalangu. Mangké wuwusĕn sira sang mahā brahmāṇa, sang alungguhing Katépéng Régés, aputra śtrī, 3. Putran sang brahmāṇa pamahyun ingambil dé sang prabhu, mwah putra sang brahmāṇa pamadhé, kāmét dĕ sira apatih Kĕñcĕng. Mwah Sira Mpu Ārya Saguṇa angamét misanira, putran sang prabhu Wilwatikṭa, ariné sang amutĕring Bangsul, sami sah saking Wilwatikṭa, umantuk maring nagara Bangsul, prasama padha amawa śtrī.

Sapraptané maring Bangsul, lami sira sang amĕngku nagara Bali, wkasan asuta pwa sira kakung, kahĕmpu dĕning lawéyan, mausuk wĕsi, ginaṇdhong dé ning lawéyan, winawa maring sang Kasuhun Kidul ring Kĕntĕling Gumi. Mwah sira apatih Kĕñcĕng, malar aputra kakung, kahĕmpu dé ning sarwa kumala. Sawĕngi-wĕngi ginaṇdhong déning lawĕyan ring kiwa, ginawa maring sang Kasuhun Kidul. Wus prapta maring sang Kasuhun Kidul, irika putran sang prabhu, kinasungan walang rupĕk dénira sang Kasuhun Kidul.

Mwah putrané sira patih Kĕñcĕng, rinajah pwa lidhahira dé sang Kasuhun Kidul, ya hétuning hana nugrahan putraning ratu sumĕndi ratu. Putraning Patih Kĕñcĕng umadĕg patih, aswé dĕnira amukti karĕṣṭyaning nagara krama. Pira ta kunang lawasnira, tĕka pangataging kāla sanghara, rundah tékang bhūwana, acĕngilan lawan sanak amisan, tan katutūr tékang śāsaṇa, tan kongang mariyang apatih, ratu mariyang ratu, tan patiṇdhih ikang catūr janma, mangkanā kalinganya ngūni.

.....

BERSAMBUNG