Kakawin Sāgara Maṇika
1.
Sakweh nikang jaladhi sāmpun tělas kalalwan
Lwānya-ng tasik linayaran němu mangkya wagyut
Rěm-rěm nikang gagana wus tinukup payoda
Handheng tasik tinutupan halimut sumar lwā
2.
Kocak layar banawa sang puhawang manguñcang
Sowe prabañcananya manrajang-ing bahitra
Hajrih Sangut gya maměkul suku lūd mangumpět
Meh prapta māsa mami mangkya maněmwi pāti
3.
Delěm mamantra mangumik mapi sang juru trang
Byar tang langit sinarěngan gumuruh gěrěhnya
Delěm kasop ya kumětěr laju milwa mompět
Wandhya pwa de nira laris maněrang kayeku
4.
Měrdah Malen sinarěngan mangabih narendra
Satyanya tan kena dudut sapu toya mombak
Kañcit milang pracala wighna maring tělěng wwe
Ton tang bale maṇi kumambanga moparěngga
5.
Rěngganya kañcana tatur mahatěp suratna
Lungsir pěṭak maka tawingnya malih dhwajābang
Catranya lusya mahijo pinasang makěmbar
Wwantěn malih pramadaninya binot ri Persya
6.
Śtrī laksmi munggu rika tulya Gagar Mayang rūm
Sih tan pěgat juga gědog wali bhūṣananya
Sumpangnya campaka putih mapusung hagoñjer
Sugyan ri wus sira měnek daha duk samangko
7.
Cihnanya sang ratu manon sawatěk pasajyan
Bantěn makeh ginělaran ri pusadyaramya
Salwāgading phala-phaleng saji tur jarimpěn
Sang nātha lingnya manuruh paricāranira
8.
Dhuh hyunku mangkya mamarěk ri bale kumambang
Lah śīghra śīghra parěkěn wawa jongnya mangke
Sāmpun kadi prawacana prabhu tan kalangghya
Ngkā śrī narendra manělŏ sumayan pramāna
9.
Carmāgading lagi siratmaya tulya mimba
Socanya bhānu kakalih kuku mutyahāra
Romanya mangsi malikět sěmu tulya gěndis
Ginggang langit sakědapannya manumpurakěn
Teks pupuh lainnya dari Kakawin Sagara Manika dapat diakses di sini: Ikhtisar Cerita
Komentar
Posting Komentar