Kakawin Sāgara Maṇika
Pupuh VIII
1.
Nā sojar Si Malen matur saduga lūd sang pandya lingnyātěduh
Ngwang wruh ring wanitā surūpa rinarah ngūnyana ring sāgara
Munggwing salwi těngah samudra pagěnahnyācangkrama lwir yasa
Tan lyan sang rara kojaranta maparab Dewī Maṇik Sākěcap
2.
Yan mahyun pwa kiteng kapangguhana dewī ring tělěng sāgara
Ndah mangke warahěn prabhunta magawe yajña krameng sāgara
Sangsiptanya wěnang kitāngaturakěn sarwa pradāna ng kabeh
Yan swecchā Rahaden Maṇik pradata yomijil cinunduk malih
3.
Antyan bhāgya Malen manampi pawarah sang sthāpaka ring pura
Candi hyang gya siněmbahěn pralada dening wadwa sang bhūpati
Mangke glis pwa ya Si Twalen mawali ring Rāgālayānūt kaphal
Tan kocap palayar maring jaladhi mangke wus dhatěng ring puri
4.
Ndan mojar Si Malen matur kadi warah sang pandya monggwing Srangan
Sang Rāgaprabhu śīghra mapranayaneng pangriñci ning tarpana
Tan sah sarwa pabantěnan ri palipir lod wus samāpta pwa ya
Mwang tang wedya catur gayah cinawisan munggwing payajñannira
5.
Ting ting ting muni ghanta mārdawa mabandung lwir karungweng wiyat
Sangkeng sabda ni ghanta sang śiwa parěng sang bajrapānyambarung
Mwang wwantěn swara ning kidung juga mabandung lan taběh mangrěgung
Gong kěndang hiniring gubar bahiri rodra swara mañjrah rika
6.
Mangkā ta pratatā nikang pasaji de Sang Kumbhanātheng pasir
Nircedanya kadi watěk para mahādewāgawe yajña tah
Ndan ring wusnya puput pasajya nika lūd mangke matur panghělěb
Kambing warna cěměng dinadyakěna sajyāpanghělěb ring jala
7.
Meh kambingnya liněbwakěn mara ri gambhīrālaya ndan wurung
Reh Melěm mangucap matur ri sira sang bhūpāla sojarnya rūm
Duh śrī pāduka tan samangkana tatā ning bhakti yan hyun phala
Yan tūt locita ning maněh ratu aron twan manghurup kang bali
8.
Yan kambing linarut ri toya masa mahyun Sang Maṇik glis metu
Yan mahyun sira mangda mětwa gugahěn de ning brana mwang dhana
Yan mangka pratatānya pastika mijil sang kanyakā de nika
Yan prihěn ri jagat kabeh masa hana śtrī tan kapengin dhana
9.
Pun Twalyan masahur ucapnira salah yan mangka lampah nika
Wyāmoheng hati sang katong laju manūt ring sojaran Dehělěm
Mantrī wadwa samūha lungha maměrih hartha braneng rājya tah
Sangkeng ling Prabhu Kumbha sarwa dhana mūlyeka gya sinyandana
10.
Ndan mangke pari len beras cinadanging pat warna tur ñuh sajěng
Wwah-wwah mwang phala wīja len huwi malih rěmpahnya mātus wakul
Gěndis len susu sangka goh sinarěngan hantrīni makrañjangan
Sěh sěksěk pasisir pěnuh sakadi wus panyan supūrneng wulat
11.
Sang bhūpālaka mowaca ri kikisik anghundangi Dyah Maṇik
Duh ratnāyu pagantungan hati mami ndah śīghra ton-ton hiki
Ton-toněn sapawehku ring kita sariñcinyeki makweh yayi
Mangke yan kita mětwa tan dwa sapangan kenumta běk tan kurang
12.
Tan sowe tumuluy mijil taběla sangkeng tan katon ring pasir
Wus kongkab taběleka ton pwa ya rikang jro mesi kang bras hěmas
Len goděm jawawut jagung huwi gědang mwang wwah samūhanya mas
Kāścaryan sama mandělŏ hisi nikang kotak mateja sumŏng
13.
Mwah wwantěn swalapatra mesi tulisan Sang Dyah Maṇik Sākecap
Ingsun wus mawibuh ri sarwa ni tadah bhukti tulisnyeng surat
Herang hyunnira sang prabhu gya manguwah bhaktīka de ning cěpuk
Lungsir prada kajang śirah cacawangan gringsing wayang len kěling
14.
Len songket papare malih hana wayang putrī matumpuk ruhur
Mwang boreh jěnu len pupur měka cucuk rambut samūhāběcik
Mrik marbuk wangi gandha ning raratusan kāmbu tigang yojana
Lūd sang nātha waluy mangundangi Raden Děwī saking posadi
15.
Toh sang dyah lihati pawehku saměne sāmpun katur ring kita
Mangke yan kita mětwa paṣṭi kita tan mewěh ri pahyas yayi
Tan sah Sang Himarasmi sor kiraṇanya de ning prabhāwanta sih
Lah mangke tulusakna sih ta lihateng pangriñci ning ngwang tiki
16.
Kañcit wwoya mijil malih taběla kěmbar lūd inungkab juga
Ndan mangke Si Sangut kinon mangudi kotak kang labuh ring pasir
Kāscaryan Si Sangut těkap hisi nikang tableka meběk juga
De ning sarwa payas malih pasalinan morub prabhānyājwala
17.
Wastranyeka mahemagātra malawe de mās tatur manglurak
Wwantěn mesi pupur saking mutihara mwang tang gagandan wangi
Ingsun wus mawibuh maring pahulěsan mangka pwa sabdeng tasik
Antyan krodha narendra mangrungu tikang sabdeng tasik ring kana
18.
Dhik he wāk prakatanmu langghyana ri sojar ninghulun sang ratu
Tan wruh ring kasuśīla ning hati malih buddhinta sandeha tah
Mwang tan wruh pwa dhawakta yan saka ri běndungku pralīneng jagat
Mwang landhěp ni tutukku tulya kadi dangstrā ning gělap mangděděl
Teks pupuh lainnya dari Kakawin Sagara Manika dapat diakses di sini: Ikhtisar Cerita
Komentar
Posting Komentar