Geguritan Kandara Bang : Prabu Wangsana Ngicén Bala Domas Tali

Palet IV : Prabu Wangsana Ngicén Bala Domas Tali

Pupuh Ginada

31. Sang Prabhu agya umojar / ingsun nganugrahé kaki / genep saha sikep yuddha / lakar ka wétan ngelurug / wus ring wétan tur ngidulang / domas tali / kamulan wadwa maperang //

32. Garjita twasé Sang Merak / anampi raos bhupati / nanggar pedang nyinganada / katularin sahur manuk / déning wadwané samuha / natan lami / Mantri Werdané mapajar //


33. Ksamakna tityang amiwal / ring sandikan sri bhupati / Adimantri Merak bobab / singsal aturé puniku / né yukti Merak durjana / dadi hati / ngrusak tata ring Wangsana //


34. Tityang amatur pojolan / nisphala perang kayéki / sampunang malih lanturang / puniku dané maseru / Sang Merak tidem wadana / ya sang mantri / rinejek laju pinunggal //


35. Tiba sirahyéng paséban / makasami kagyat ngaksi / Sang Merak asemu bangga / gelis ngucap ya mawungu / syapa tan tumut maperang / syapa kari / antaka pwa temahannya //


36. Watangé mantri binuncal / getihné sami kaambil / saksat ya satru pertama / getihné sampun kakumpul / nggon ngrajah dwaja pataka / maka ciri / balané mangkat maperang //