Palet XVIII
Panglantur Siat ring Pasisi / Gusti pada Gusti Ngadu
Kawisesan
1. Adimantri dahat rosa / yén awaknya metu geni
/ méh kalah murubing kapal / bala wadwa kwéh malayu / kapalajeng tan tinitah / mangemitin
/ jiwanyané sowang-sowang //
2. Né makecog ka segara / gagésonan ya ngelangi
/ apang madoh saking gelar / ka pasisi ya manuju / nanging né kantun mawirang /
méla pati / sing mundur dyapi satapak //
3. Domas tali ring Wangsana / umundur saparo
lebih / dyastun akéh tan prayatna / nagané cundang mabarung / pitik ané
manyundangang / domas tali / wug kasapuh limang ceban //
4. Tan aswé kapalé telas / wusan katempuhan
angin / ring ajeng nilat mungkurang / api barak kebyar-kebyur / mawasana tan
pamarga / ring kikisik / perang malih kasambungang //
5. Ucapen sampun ring lemah / siyat tan surud
masengit / sasénaning nénten bhrasta / miwah kang nénten malayu / kari maambek
satriya / tatan wedi / dyapi lina ba manglawad //
6. Siyaté gemes maramya / gusti mapadu ring
gusti / bala mapadu ring bala / saling padu saling pagut / manujah nora rérénan
/ tur macelig / magrudug swaraning aswa //
7. Bala Lemah Api prapta / adimantri kagyat
ngaksi / gelis ngepung saha suryak / suryaké mawantun-wantun / sumesek soring
Kandara / makuliling / tan kaweruh sangkanira //
8. Pasanggrahan sampun rusak / katunu dé Lemah
Geni / wiréh angrejek dadakan / wadwa nénten siddha mendung / mabejug wadwan Wangsana
/ barat-birit / manilarin rananggana //
9. Adimantri Merak mojar / hé kita prabhu
duskerti / malagu pwa apil dahat / telah dayan cai keruk / norana teguh maperang
/ tanpa éling / matingkah dédé mamongah //
10. Sardula Rakta umojar / minab kamu nénten
hoki / malolya kamu ring raga / saksat maling nyengguh pandung / kamu juga
padha droha / dahat pegil / manglekasang sarwa singsal //
11. Lan suba jani adokang / amun mongkén
saktin cai / manira dot ngerasayang / macihna satriya tuhu / maharepan ring
samara / adimantri / mésém ngelédék Sardula //
12. Pangkah cai tekén gelah / wun-wunan méh enu
andih / rasan draksa méh sing nawang / dadalan méh durung ketur / méh-méh bani
cai nantang / adimantri / pakandel jagat Wangsana //
13. Adimantri nyungkab pedang / arané Ki
Galang Langit / Macan Katong tatan ngalah / Srégala Mangap kahunus / wimbané
katon macelang / sareng kalih / maruket padha magiras //
14. Galang Langit mawisésa / ngamedalang
bajrasani / duké amagut Ki Mangap / rasa abingé kaguntur / pertiwi gejer déniya
/ kencrang-kencring / langité runtuh umpama //
15. Sang karo padha saktinya / tan hana angaku
jerih / saksana manyuti rupa / anadi bhuta mangamuk / kawisésan kalekasang / antyan
mijil / watek satwa kabhinawa //
16. Hananya kuntul anglayang / pasiluman
adimantri / wulu héma kuku slaka / masangling emas ring cucuk / umijil geni
prakasa / sanga palih / angeseng sadaging sarat //
17. Pasiluman Sang Sardula / atemah singa kayéki
/ mahelar dangstrané mangan / awaknya ageng maruhur / juga ngawijilang wisa / asing
keni / sinah rebah maplisahan //
18. Sang kalih padha mangawang / masiyat
duhuring langit / hudan geni tan pangkura / saking tutuking sang kuntul / kadi
udaning palguna / hudan geni / mangantem singa bhargawa //
19. Winalesan déning singa / geni mijil ring
uswasi / geni ngalawan pawaka / sambraké mawelu-welu / malesat ring dasa désa /
kembang api / sayojana kanten dohnya //
20. Ri wus asengit maperang / kuntul kena sembar
geni / geni macampur ring wisa / antyan janggarnyané puun / ri wus puun mawali ya
/ dados mantri / nanging rambuté magambah //
21. Adimantri masapatha / jah tasmad rengenen
iki / mangké aku ngaku kalah / nanging hana pawarahku / dlaha aku angrebuta / Samongdhani
/ lah sayaganen punika //
22. Puput mojar dané musna / mapan érang natan
sipi / malesat sira ring ghana / anutut lakuning kukus / umilu prawadwanira / mundur
sami / apan kakantenang kalah //
23. Mangkana kanda kalekas / raris anangun
prasasti / inukir ring Kandara Bang / pangéling dumun magebug / élah bedik
nyandang menang / domas tali / kalah ngelawan nem dasa //
Komentar
Posting Komentar