Palet XIV
Lunga Ngruruh Jemparing
1. Mangkin ring Samong Nagara / wadwa kénak
saka kedik / sangkaning Sang Sugih Liyang / matemahan ya kasumbung / kaaksi dé
Yuyu Petak / Mantri Sugih / kawijnanané malimpad //
2. Matur sira ring sang natha / tuhan
waspadanen yukti / né madan I Sugih Liyang / dlaha bisa dadi ripu / maring
tuhan mangda tatas / kéto yukti / Rékata ngalih dalihan //
3. Raris metu ékan-ékan / reko kuangan jemparing
/ apan kaplaibang bala / sané malaib mawangsul / mantuk ka Lemah Pawaka / Mantri
Sugih / apang manempain ika //
4. Satus tali kang kocapan / ring awengi
mangda polih / yéning nénten samangkana / sirah ko pacang kaputung / Sugih
Liyang manyanggupang / dané ngidih / somi kapal tur prakencan //
5. Ikang kapal binungkusan / sami kabungkus
ban somi / raris sominé rinéka / ginawé dadi lelakut / mapan sami sampun pascat
/ maring wengi / kapal sominé malayar //
6. Sugih Liyang ring buitan / sareng dané
Mantri Kancil / kakatonang kapal ika / nganampék rauh ka celuk / Mantri Kancil
dahat nyap-nyap / nguda jani / malayar ka sebun lawan //
7. Sugih Liyang tan umojar / énak nyeduh téh ring
poci / nanging Kancil ibuk manah / kéwala jak pat ring prahu / dané sareng
Sugih Liyang / wénten malih / tukang dayung ajak dua //
8. Kapal sominé adasa / sowang-sowang mési
kalih / padha mengkeb ring buwitan / ngamong dadi juru dayung / mangda kapalé
malayar / sayan gelis / sayan nampek Abing Barak //
9. Wengi kalimunan andha / kalimutan ikang
tasik / yéka katon dé gebagan / hanané ikang padawu / akéh wong ngadeg irika / wadwa
somi / sinengguh wadwa manusa //
10. Sang gebagan awurahan / karengo dé Kura
Jati / taler muwah Kura Jata / lawatnyané si lelakut / kadi angamel tomara / wiréh
wengi / musuh magebug kadéna //
11. Raris kapalé angandang / ring kapalé nabuh
béri / kapal somi mabyayungan / matimpal swaraning tambur / buka tengeran maperang
/ sami nganti / nanging kapalé tan mara //
12. Kura Jata lingnya ghora / dusta ngrejek maring
wengi / eda ento paekina / sagét ada jebag ditu / sinah ling dini mamanah / kemu
benting / panah musuhé di kapal //
13. Gagisonan bala nira / ngambil langkap tur
jemparing / raris manah tan rérénan / jemparingé tulya jawuh / aniba nyangkét
ring kapal / maring somi / drika sami matanceban //
14. Penuh jejel ikang kapal / kasangkut heru
ring sanding / das malingeb kapal ika / nanging sandingé nu puyung / ento ané
kabadingang / ring pasisi / anak bingung mangatonang //
15. Telasang suba mamanah / kéto raos Kura
Jati / wadwané sumingkin akas / anuju ka wong ing prahu / mamanah nénten udepang
/ tambis-tambis / panahé sumingkin telas //
16. Sugih Liyang girang manah / kéto masih
Mantri Kancil / wiréh madaging kenehnya / jemparing sampun masangkut / suba
lantas ya samapta / kapal somi / mabalik maring nagara //
17. Kura Jati Kura Jata / marasa kendel ring
hati / ngadén musuh kaprajaya / twara nawang ada prahu / asiki kaanyud nyelap /
prahu somi / majemparing matanceban //
18. Di gelis Sang Mantri Merak / nguningin
rusuh ring tasik / raris turun ya marika / punang rusuh wusan sampun / Sang Merak
ica ngatonang / kaselehin / pecak musuh tusing ada //
19. Manggalané dhateng nyembah / Kura Jata
Kura Jati / nguningang déwékné menang / nundung musuh rusuh tuhu / né madaya
ring segara / mangkin sami / suba mundur padha ngalah //
20. Adimantri ya matakwan / pira kwéhing musuh
iki? / sinahuran dé sang karwa / hulun natan weruh iku / peteng alimut hétunyan
/ raris kami / saking doh nglesatang panah //
21. Adimantri malih ngucap / kuda panah anggon
cai? / dong ulah aluh lumampah / malih masahur siréku / satus tali langkung
minab / wantah kami / nénten wani nampek mrika //
22. Sagét wénten daya corah / ring awun ipun
masilib / nanging saking nayan tityang / jag panah dogén i musuh / muntab kroddhané
Sang Merak / uduh cai / jlema bengeh tan prayatna //
23. Durung apakpakan canang / ada prahu somi
kampih / sami kagyat mangatonang / prahuné misi lelakut / majeljel matanceb
panah / adimantri / kabramantyan sira mojar //
24. Dong lelakut musuh iba / jemparingé satus
tali / anggon cai ngawirangang / mula tusing ada unduk / kéné ci miwalin gelah?
/ kanti bani / makliab ngaturang panah //
Komentar
Posting Komentar