Pangeling Baligia ring Taman Bali

 

 

Pangeling Baligia ring Taman Bali

 

1. Hana ta mangke karya winuwus agung suramya maring udyana subali baligyanira maha mpu karmarawangsa sinuhun duk purnamaning srawana ring adri upaya tuhu sinambung makori surya mangke inikĕting gita.

2. Hanane sakawarsa puniku kaya sojar ika tatkalaning masan wrĕsti sopakara pascat putus kadi ucaping pu lutuk ambil-ambilan sang pandya ligya punggĕl aran iku sapisan hana masatya dening wali janayajnya.

3. Hana wĕrta kalumrahing hĕnu pacang nangun karya griyane ring taman bali mangkana silih sinambung dady ataki-taki sampun akweh okane mirĕnga pada ring griya umatur atakwan jatining wĕrta kapisinggih wĕrta ika.

4. Ryuwusing prawartaka aparum putusing dudonan wus kapica ring pangiring kang adrĕwe pitra tumut angiring sira sinuhun sira muni pamucuknya paparĕng malih sira mpu wus lĕpas ring swecapura kaprĕnah nanak hyang pandya.

5. Wwantĕn akwehing sĕkah umilu satus patang dasa sayuktinya lĕwih asti nihan pakawit sireku akwehan karmarasunu hana juga kapakisan nĕhĕr pasĕk juga tumut sampun putus pangabenan mangky aparĕng atma suddha.

6. Hananira saking taman bangsul sakeng banjar blungbang banjar pule hana malih tĕgal ambĕngan tumurut tanggan talang jiwa durus kĕmbĕngan len pagĕsangan abyan sĕdah sibang hulu payangan sĕkahing gĕlah mwang hana banjar gunaksa.

7. Siladan malih nongan kalantur pradesa bĕng juga srokadan desa siladri malih cĕbang tur sangguhu srongga kidul tĕgal tugu kasyan talĕr kuta ramya wit ambĕngan desa manuk turikup gosali roban lila arsa kidul jurang.

8. Desa tambahan mwang basang ambu saha jalakungkang tabuwana talĕr pĕring karangamla angantĕlu tamĕsi bona aturut sibang gĕng banjar wĕdihan sĕlat blĕga hana juga kocap saking batu sigar banjarnira maendahan.

9. Witning banjar lohakarma dumun tusan banjar pokas banjar madya kayu kulit ika rowanging blahbatuh sakeng apwan watĕk mangku mangkana kirang lĕwihnya kawiting pitra winangun ring panggung rinaga sĕkar sapĕpĕking sangaskara.

10. Mangke karya pangĕntĕg kawuwus lĕgi wara matal manca kĕrta tur piuning ring payadyanne umungguh angawit anangun caru dasarning arĕsigana swaran kĕtungan adulur salonding atatangguran karungu manis mardawa.     

11. Inajĕngan de sinuhun galuh wwange pada mabryak pranamya nĕmbah abakti arĕp ring karyane mulus kadi sasurating tuduh amogha doh baya wighna siddhakaryane karangkus mangkana tungtunging arsa tatkala rahina ika.

12. Enjang enjinging pasisi siyut supĕnuh prasama maring tirahe alinggih angulapan tur anĕbus pitranira saking sindu ida mranggi kang amuja griya tusan sangkan wiku mangke wus munggah pawedan abhusana rakta muntab.

13. Puja bhakti samuha wus katur maring hyang baruna sang hyang ratnangkara sakti ratu gĕde ped aruntut samasta ngaraning puput inarad araning pitra angĕndag dening kakĕplug ya saking luhuring biyas kramanira sowang-sowang.

14. Rinasa-rasa pitrane rawuh anjĕnĕng tapakan tan sah ring daksina putih apan sampurna sinambut dening puja tur pawungu atha impĕr bĕnĕr surya prasama pada umantuk angiring nuju payadnyan soring pusadi ginĕnah.

15. Ring dina surya paniron rawuh nunas ron wandira sinarĕngan dening riris tatkala lingsir kang dawuh iniringing balaganjur agĕnah kilyan payadnyan irika ta taru agung yadyapi alit tininghal ri niskala ika beda.

16. Sawetning gorda rumuhun haneng sanding pasar catuspata taman bali yeka mangke sampun rubuh andadi ilang iriku ika kawit marmanira ananĕm kang kalpataru haneng karang suci griya jatining ingangge yadnya.

17. Sampurna suddha ngaraning taru apan wus pinĕras duwĕg palĕbon rimihin matĕmahan sampun patut angaran juga tarwagung mangkana kocapeng sastra dyapi hana wrĕksataru agĕng lĕwih madurgama nirdon yan durung apĕras.

18. Tunggal juga inajĕngan sri mpu silacandra jina kawacanira trang kuning kadi bajrajnana tĕdun swaran gĕntane adulur angawe tĕduhing arsa yadyapi katiben jawuh tan hana akirig tapak pangiring angadĕg dhira.

19. Sabantĕn jangkĕp kastawa puput inanggit ikang rwan sira galuh angawitin angagĕm galah sirebu lĕmat suddhamaleng pucuk ingangge anunas patra atatak tikĕh yan runtuh sang wadon yaning anglumah yan kumurĕb sirang lanang.

20. Suryaking jana awantun-wantun kala rwanne rĕbah lwir runtuhing kasur sari acihna egar ring sĕmu yeka prayanya inajum pinasang awaking puspa ika linilit den tuhu arthanya uttama dahat don waringinne manggala.

21. Atha rwan gorda rinasa cukup lud murwadaksina kang waringin kinaliling prapta linggihing pamuput tan reren amuja hayu saksate pitra prasama pascat munggah taru agung wruhing marga indraloka angiring bhagawan karwa.

22. Mawalya wwange adulur-dulur sĕgan göng tinapak umanjinging kalang suci adĕdamping pras sasantun makakalih sira galuh nĕhĕr anyanting amuja saha patanganan lĕmuh angucap weda rahasya anambut roning wandira.

23. Sapĕpĕking puja nyanting rampung laju parikrama ikang ron gorda ginunting raris winasĕh ring banyu toya anyar kang rumuhun ping dwa asaban candana ryuwus brĕsih gya kinumpul mangke gunting sinalinan dening sanak kulawarga.

24. Pada ping trini dumadi jatu winasĕhan sama banyu tabah mwang candani ring paso wadahing banyu irika cinĕlup-cĕlup nĕhĕr sineser arata prasama bĕcik kapunduh prayanya dumoga dangan tatkalaning ngajum enjang.

25. Yadyapi basah tiniban jawuh norana sungkawa pada egar manah sami purna amolihing jatu roning sami wilis bagus siniwi sang hyang sangkara reh polih sinĕmbah dangu ri gigir meru parwata sakeng tuduh sang hyang taya.

26. Andakara tumuli angliput wwange aluwaran nanging hana juga kari ngkana agĕbag akumpul pada mucap guyu-guyu hana len anutur tatwa sowang manut lĕga kahyun anundung ariping mata angrakĕtakĕn akadang.

27. Sawyakti norana sang sor luhur sama sanak kadang turun saking trĕh sawiji sang hyang brahma pasuprabhu angadakakĕn den tulus sagĕnĕp isining sarat tur manusa mangda adung meling ring kawitan tunggal andadi hayuning praja.

28. Ipit-ipit aruna awungu sang polihing ayah tragya anamtam pamargi lungha anĕda pakuluh sakadi hana ring batur tur hyang prapen ratu pandya ri basakih natar agung kahyangan hyang putranjaya mwah catur lawa lokarma.

29. Malih ring pangastulan hyang tugu parĕng ring lĕmpuyang maring tirta ĕmpul hĕning neriti ring huluwatu pascima ring watukaru tur ri rabut gwa lalawah kĕntĕl gumi sapadulur sang hyang pande ring tamblingan saha ri bali udyana.

30. Ri kahyangan tiga nora luput pusĕh dalĕm desa sinambung ring bukit jati punika inaran puput nanging pangiring madulur anĕda tirta sowangan lwir kayeng drĕstane anut pada adrĕwe panĕmbahan sakahyunnya anukeng twas.

31. Kadi panĕmbahannya kang patut lwir sanggar pakubwan kawitan paibon panti kadi pura maksan tuhu kocap tan wĕnang linuput kahyangan desa sowangan irika nĕda kakuluh aptining ayu sampurna saprateka pitaranya.

32. Kaya mami niri kang winuwus arowang payangan awiwit dangu ring bangli nanging sampun tan kawuwus irika nĕda kakuluh ryangaraning kabuyutan pascat wantah ring pakubu sanggar ring tĕgal pawitra sinĕmbah de bapa kina.

33. Maring payangan anama puput grĕha airsanya ri linggih nataran tunggil tur nghulun matur pawungu sapisanan wajik suku haneng dalĕm kadewatan irikang pradesa sanur mapan ratu tĕtĕgĕnan dadi sasuluh pangraksa.

34. Walinĕn ri rahina angajum ri lintanging aswa sang hyang ludra nĕmu lĕgi waraning uye umungguh salonding awantun-wantun ri pawedyan mangku munggah sumadya angajum dawun tinulis tĕkap aksara sabĕnĕring ujar sastra.

35. Sagĕnĕp daginging puspatanu mesi murddha lingga madaging sulasih mĕrik kĕmbang widuri len jĕpun dasarnira dening wakul tur adaging kusadanda cilimuka bumbu-bumbu pwekang buluh asta murtya uttama madaging mirah.

36. Puspaning lanang asumpang pucuk wadon sĕkar sandat wastra sama putih kuning akakasang ika tulus akarawista ring pucuk akojong rupaning awak kadi sikaraning gunung wwaya bokor dadi wadah rangkĕp adaging rantasan.

37. Wuwusĕn mangke hana ring esuk kadi panamaya sopakara wus cumawis sĕsĕk punang wong angrubung pada rauhe sumuyug pasupati sĕkah madya ri dina sogata apuy asilih asihe mangkya tumus amurwadaksina. 

38. Gayah tĕgtĕg sarad wus mungguh tan bina parwata gayah ika mewak bawi mastakanya ri sor munggu jajatah rinĕngga pamuk dadi pwa amarayudha de jĕjaringan mwang muluk socapan dharma caruban gĕnah manut pangidĕran.

39. Hana mawak kayonan tan samun iku ngaran sarad sĕsanganan warna-warni rupa astra munggah sampun nyasa nikang loka agung tan kari asanding suar sarupaning pandam kurung sasuluhing sang hyang atma tan baribin marga sanga.

40. Sowang sĕkah polih saji tulus bantĕn sadandanan arosan lan catur nyiji gĕnĕp munggah maring luhur ri sornya hana kang katur sopakara kinĕmbulan sajawaning puspa hyang mpu bakti munggah padudusan sagĕnĕping nyanggar tawang.

41. Wara pandya anjĕnĕng pamuput mpu taman angsoka kadi sang amoghasiddhi malinggih pwa pinih hulu sira pandya angantĕlu alinggih daksinanira hyang aksobhya pwa anurun mangkana pwa yan kedĕpan kalaning angrangsuk bhawa.

42. Sang jinartha sandingnira mungguh akawaca pĕtak witing griya pingit bangli tulya bajrasatwa tuhu amuja arĕping guru mwang sri patni swecchapura kadi laksmidewi wibhuh alinggih pinih daksina sama alĕp ndatan kirang.

43. Lumaris wonge ring marga agung mĕndak marga sunya iniring puja sang muni wonge prasama alungguh umarĕp sira ring kidul angagĕm kalpika dupa tur sinanding dening lĕmbu ahĕnĕng tĕlĕnging suksma anganti pitara datang.

44. Gĕnahe jabaning pura agung pura panataran paniwyan pande udyani atha ri puput sinĕngguh awali sami lumaku maring jĕroan payadyan kalpika dupane kantun ginamĕl bakti susrusa anganti pangarah nama.

45. Atha ri wus ingonek sang patut laris kang kalpika pinasanging ragasari abaris sama den pangus lwir barising gunung tatur lumampah pwa ya amurwa praya polihing ping tĕlu pinih arĕp uparĕngga saendahnya sarwa sweta.

46. Pamungkah marga arumning kukus canang rebong untat tinutut de tiga sampir pahĕsan tĕmpa adulur tinut bantĕn kalih suhun lwir iniring swargagana cihnaning sang menak agung tinimpal swaraning gĕnta lumaris lĕmbu apayas.

47.  Ngrenyeb papayase abra murub asaput awastra abadong malih apĕnding rupanya alĕp abagus moparĕngga bungan jĕbug anglenteng sanding wrĕsaba binĕbĕd jĕnar kang sunggu len sapute mirah muntab rinĕngga wajik len sĕkar.

48. Wastraning lĕmbu arjuna mulus manuh duk samana hana ta dwija angiring parĕng lampah sanding lĕmbu tan hana waneh sira mpu asrameng taman wratmara puspa pamucuk adulur puspaning pangiring purna tumut ta haneng walakang.

49. Alantaran sami kasa pingul lwir duhuring wiyat ingatĕran hyang nandini wahana bhatara guru munggah sikaraning meru rika adharmopadesa atutur-tutur rahayu den tatas ujaring tatwa amrih purna kalĕpasan.

50. Swaraning gong gurnita ambarung lawan saron gambang malih kidung nyunyur manis saksat dĕdara anurun agamĕl lawan angidung  sang dĕdari sira asolah pamucuknya sĕkar gadung kadi ring taman bagenda pangalusan sang hyang dhatra.

51. Swaraning gĕnta sang yati pĕnuh betel antariksa ambarung swara aklĕnting siddha anĕgtĕgakĕn hyun ring hrĕdayanta rumangsuk anĕrus ring sang hyang manwan mandala akarya hayu ramya tulya kadi kendran tatan hĕnty anawut arsa.

52. Puput amurwalampah ping tĕlu angayat umunggah puspane munggah pusadi saking sanding kalor iku anapaking kĕbo wulung makadasar titi mamah alantur ring gigir lĕmbu ring sirah pada ping tiga wahu munggaheng payadnyan.

53. Ingunda-unda puspa ka luhur manut linggih sowang haneng tĕngah len lor malih  hana juga mareng kidul pusadi mambalan rweku kadi putusing tinata irika ya sampun mungguh tan lali bhatara sangghya nĕhĕr kinaturan yadnya.

54. Den apĕnĕd wwange amrih lungguh wawalen sorabha ki dalang anggĕdog ringgit pada rĕja sang atapuk rĕjang baris pendet tumut angawe rĕnaning darya rĕrĕjangan sakeng dalung abhusana ya sindura warnan wastranya anjana.

55. Sapatĕdun etehing padyusdus lud midĕr winawa ri sanggar tawang rimihin raris ri drĕsta katurut gĕnĕping sapuput-puput laju sumadya angayab saprateka bakti durus ingatĕr de puja stawa sakeng catur muniwara.

56. Baktinya ingayaban tan luput manuting dudonan angawit bantĕn pasaksi tan kari bakti ring hayun tinĕgĕpakĕn tatabuh tok bĕrĕm arak len toya saha sari nikang kukus rumĕmbe maring gagana mogha tĕkeng byoma siwa.

57. Apalĕt upĕti ngaran puput tinut de pamuspan nyakupakĕn kara kalih anĕmbah ring widhi putus surya prajapati guru ring puspa ida bhatara tur sĕmbah puspa sadulur malih sang hyang samodaya mangka cutĕting pamuspan.

58. Wus amuspa nĕda wangsuh suku prasama sinirat sang wusing anĕmbah bakti raris hyang rawi sumurup sang asatya wadon lan pung angadĕg ya abhyakala pangrĕsikan wus lumaku tur anĕda wangsuh pada kang katunas sowang-sowang.

59. Sang satya winagi gana kutus sangging asta juga kwehing wong apotong danti satak lĕwih ring rwang puluh malih lĕwih sanga iku anganti sira giliran prayanya munggah ring salu maring sowang-sowang gana sang satya munggah pasangan.        

60. Sang sinambat aran munggah salu raju ya ingĕndag ring giginya dening simsim raju arĕbahing salu kĕmul bungalan angukub sahingane maring dada tur alapis dening cĕpuk alapis malih aksara yeka pangaput sang satya.   

61. Cangkĕm ginanjĕl padangal tĕbu lumaris tinatah dening pangotok lan kikir amusti tangan satyeku kinonkon dharaneng kahyun tan wĕnang amĕrĕm netra dangstrane rinata sampun raris angidu ring bungkak saksat amuncal malanya.

62. Saparikramane kirang langkung raris nurun lĕmah karuhun ingayab saji masadana pĕras tuwun iwaknya pinanggang sawung saji tinapak ping tiga tur amolih blonyoh sampun kunyit rĕratusan jĕnar ingurut-urut ring awak.

63. Meh madyaning wĕngi wahu puput dening kakwehan wwang wus atatah sama asri kadi kamajaya turun punika sira sang jalu kadi ratih angindarat sira ta sang wadon tuhu rupawan rumaja putra nanging hana sampun wayah.

64. Kawitira sang satya umilu duk apotong waja tan sah sakeng taman bali malih saking angantĕlu tur malih gelgel kalungkung katurikup pagĕsangan mĕnanga nĕhĕr pamanuk sakeng soka mwang nyanggĕlan tĕmĕsi sangguwan nongan.

65. Sarwakadan talang jiwa tumut tur janggala sĕdah payangan lan silasasih sibang kaja jĕhĕm sanur jagat bona parĕng batur banjar pule lan patolan sakeng bĕng lan sibang agung pinih akwehnya kocapan mawit sakeng batu sigar.

66. Wuwusĕn pwa malih sang aturut sakeng desa apwan jagat pring gunaksa bangli taro tĕbuwana iku parĕng srongga lilakahyun siladan tur kadonganan tur sura matangkis pingul sakwehing kawit kocapan hana tĕlung puluh lan sad.

67. Hĕntyakna andakara lumiput bang wetan hyang aruna para wwange akweh prapti ri payadnyan wus apupul anglantur ngĕning winangun lunghane ring pangalusan ri siganing pwa sinĕngguh sama lumakweng sidawa iniring dening uparĕngga.

68. Ping arĕp wangi asĕp malĕpus lalontek dewangga ingapit kober pangawin bandrangan putih atarung tĕdunge jangkung mabandung tri sampir iniring mĕka canang rebonge lumaku dinulur rantasan puspa anuting tata cumadang.

69. Munining balaganjur tan rantun angiringing puspa swaranya lĕmpung amanis kadi angiring hyang sambu tumuruneng taman adyus kalumbrah widya santika gĕnahing sang tunjung biru mareng gigir gunung ambal angruwat papa kasmala.

70. Lampahireng tanggar gya tumurun adoh nurun parang katon sawah kubwan rawit arangkan sukĕt len paku warna alab ijo iku angawe ta manah jamjam tan hana marasa lĕsu yadyalĕyö rikang marga prasama wus pariyatna.

71. Sang para satya tumut ring ungkur bhusana sarwendah pada apayas den bĕcik andadi deeng pangimbuh pada pangus lituhayu tulya kadi hyang anangga sang lanang katon abagus kadi hyang kamini tatas sang wadon kĕmbanging manah.

72. Tan sah bungkah ikang manon kerut lud angayam-ayam yan ingidĕp sĕkar mangli arĕp inalap jroning hyun pinatĕhan surawadhu dumadi kĕmbanging natah angĕntas sang rimang bingung ngunin yan nari sasanak uttama sinumbung kadang.

73. Prapteng taman lampahe rahayu ndatan hana kirang haneng siganing pinuji puspa rantasan umungguh ri lahapan haneng hayun pangiringnya madudwanan arĕrĕh gĕnah alungguh mangku siganing amuja anglĕkas bakti cumadang.

74. Sinirat sakeng toya amancur puspa samudaya tur para asatya ngiring anĕda hĕninging banyu saksat mala papa lĕbur norana mara gĕgodan raharja satuwuh watu sayukti juga inaptya sunu amadangi kula.

75. Tan warnanĕn ri siganing puput mangke sama munggah awangsul ri pĕtak suci aduluran kaya dumun motsaha sira sumanggup apan awaknya kanghelan bina rasa munggah tĕdun yan tĕdun lampahe dangan munggah jurang lĕwih abwat.

76. Nanghing tan hana mengkuh angaduh sama lilajnana acihna agĕnging bakti angiring sira sinuhun wakprakata ndatan purun atutur kaya wak manah manah lĕga dadi hayu hayu nikang silakrama kramaning amanggih swargan.

77. Ndatatita sira maring hĕnu wus masuk payadnyan puspane munggah pusadi talĕr rantasan umilu pascat ndatan kurang luput alĕkas adining karya apuja stiti sinĕngguh angatĕr sikara yadnya kang ingaranan baligya.

78. Haneng rahina purna sitangsu hyang brahma alabha mĕpĕt ring ruhuring adri padangan amaraguru aryang wuku tumpĕk kurung ika ta dadi diwasa saka gunung nĕmu sindu amaranggana andarat karya mangguh kasulabhan.

79. Wuwusĕn mangke wiku pamuput hana sira papat pinih hulu wiku istri tan len sang sinuhun galuh yajamana sira tuhu abhawa mahaprabhawa lwir hyang dhatrapatni turun amuja sireng pahoman angawe sukaning jagat.

80. Ri sandingnira mwah wiku galuh sang galuhing tunggak lwir hyang pratisaradewi maring andapada turun sarwa pataka linĕbur gĕlungnira papudakan angawe angob pandulu yeka sira buddhapaksa nanakira hyang bhatara.

81. Malih sandinging sang jinawadhu sang pandya tonjaya agĕm maheswara yukti len angganira alĕmu nanghing awibhawa kasub lwir sang brihaspati sira ry andamandala tumĕdun nanging duk gita sinurat ra mpu tonja sampun lĕbar.

82. Sawyatarane sawulan iku lĕbar sira pandya sasampun lĕbar sri pwaji asrameng tatasan kidul duk inikĕt iking kidung palĕbwanira wus pascat abade tinumpang tĕlu nanging sira mpu ring tĕga kary anganty atiwa-tiwa.

83. Walyakna pwa ri sang pamuput sira sang panguntat juga sira wiku istri kadi wisnupriya turun patĕh nanak hyang sinuhun bhatara linggarsapura asrameng taman gandarum sang mwah winangunĕn karya sira ta adrĕwe dampatya.

84. Sampun kadi panamaya dawuh kawit ikang yadnya sri mpu tunggak napak ksiti arĕping sanggar tinuju rangkĕp abhusana agung tan lyan soring sanggar tawang angadĕg ayoga bayu irika abhumisuddha angurip rajahing lĕmah.

85. Atatakan kasa irĕng watu duhurnya ginambar dening dewayudha sakti kang ginaway dening tĕpung raris ta sira anyumu den jangkĕp apatanganan aganitri ndatan luput mucap mantra tan kawĕdar dinulur klĕntinging gĕnta.

86. Raseng manah saptaloka tumus mwang sapta patala saprateka suddhabhumi sampun ingaranan puput ring pamyosan munggah wangsul paparĕng sang wiku papat pada amuja sang wiku salanlaning bakti yadnya munggah adusdus mwah pisan.

87. Suswara nikang gĕnta ambarung karungweng diganta saha sumar kukus wangi kĕmbang pinĕntiling ayun saha sĕkar ura niku angilir kalawan puja rumĕmbe si kukus arum angantĕg surabhawana inastu watĕk amara.

88. Sarangkĕpning weda gangga sindu weda stuti stawa lud pangrĕsikan mamargi lanang wanita sumuyug ngayah etehing padusdus winawa tur ingayaban maring gĕnah wus cinumpu sanggar-sanggar saruntutan tur saidĕring payadnyan.

89. Ramyaning saron gambang supĕnuh salonding tan kurang swaran nikang gong amanis prasama tanguran alĕngut tinĕgĕpan dening kidung tur wawacan wirakatha dinuluran wwang amutru sang hyang ringgit molah cara mwang topeng alĕlampahan.

90. Antyan sawijiling topeng prabu dalĕm siddhakarya mangkana andadi hĕnti malih rĕjang dĕha ayu tur baris pendet adulur uruk-urukan gandharwa dadi panĕgĕpe katur sopacara wus ingayab kadi rincining dudonan.

91. Puput angayab asti kacakup akramaning sĕmbah maring bhaskaradipati pĕrtiwi maraga ibu maring bhatara swayambu ring puspa bhatara karwa ring puspa pangiring tumut ring catur guru piduka bhatara lingga tan lupa.

92. Mangkana sĕmbah sakurang langkung sang hyang samodaya sangksiptannya manut drĕsti tur raris anyurud hayu sang potong danti len rambut parĕng natab pulagembal asiki mangge kinĕmbul wus ika majaya-jaya dirgahayur mrĕtyunjaya.

93. Pinujanĕn lĕwih kĕduk timbul drĕman sukasada kadi panuddheng sukordi kang ginawe wastra pangus inastu sada rahayu nĕkeng sapta kaliliran tur hana kacihna tuhu angangge kang karawista saha paiccha kalpika.

94. Hana putra bhatara sinuhun sira anwam puspa anĕda nugraha pingit awintĕnan pwa sireku paparĕng lawan sang wadhu anamtam agurusastra sanyasakarma tinuju mogi antar apulang rah anyambung warihing griya.

95. Hanane sun maring jroning kahyun atisaya anghwab rasa mĕlĕd milw abĕrsih haneng dĕlaha sapa wruh siddha polih sun kayeku kewala atĕrĕh mangkya hanane sun mudha lacur pasĕbunan mala papa akweh mojar sapa ngĕga.

96. Yeka kangge natabe rumuhun kewala ring citta kadining mayura siki sinanding gagak dalurung yeku upamane isun wijile niccha malina angajap kalintang jumbuh sujati tan sandang gĕga tong kosong nyaring bunyinya.

97. Walinĕn pamargi niku puputing ayaban meh surup pratanggapati sami polih wangsuh suku tur juga tirta pakuluh kang wus pinĕndaking kina sinirating puspa dumun tur tirta tinunas sowang gya matĕmahan lileng twas.

98. Sowang puspa dinuluring bĕruk umisi sarkara malih ginantunging wrĕti kadi tulis langit iku dawĕging gĕni umurub tur angreka gringsing wayang angawe hati ulangun tan hĕnty amuji hyang ratna iniring atmanastutya.

99.  Sangksepanya wus anunggang gunung hyang satakirana akweh wwang kantun atangkil cet ilanging banurasrum ginanti dening hyang indu monining gasir anĕmbang cihnaning samangke dalu kewala tan siyos padang reh kasuluhan purnama.

100. Irika malih wwange akumpul amralina puspa ryuwus tĕdun sakasiki amrih gĕnah manut lungguh kadi cumadanging sampun puspaning bhatara karwa maring pawedan umungguh puspaning pangiring sama ri sornya akĕbat klasa.

101. Wwaya piranti anguyĕg iku sĕnden rajah cakra semprong alit malih ilih tur jajaton kayu-kayu puspanya linukar durus inambil isi-isinya roning gorda kang amĕkul prarai len basan ubad malih adĕg pangawaknya.

102. Madori ratna putih lan jĕpun prasama kalukar raris hyang gĕni inurip ri pawedan pinih hayun raju pangiring anurut ri sĕnden sama dumilah mĕtu kukus tur akĕplug manda-manda munggah tawang aniti nirbana sunya.

103. Urube pawayangan hyang brahma dadi mahadewa arĕng dadi sang hyang hari hyang rudra klĕtiking latu hyang iswara sira kukus latu bhatara sangkara sang hyang sambu kĕmbang awu malĕpug hyang maheswara ambu mulih ring baruna.

104. Angadĕg sira bĕnĕring tĕrus dadi sang hyang taya ayogeng akasa lĕwih mangkana dadining apuy andadi puspa tan alum meru mas tumpang sawĕlas irika tinuju jujug windu pĕpĕt kalĕpasan swargan hyang guru uttungga.

105. Kukusing gandapura kumutug yeka dadi warsa anuwuhĕn tuwuh bhumi makaraja drĕwen hulun kebĕk sari lana membuh rauh sarining amĕrta tinampi de sanak putu samasta katĕkeng jĕmah awet dadi dharma putra.

106. Atha bhasmibhuta dadi awu sinĕhĕb de toya banyu kumkuman lan cĕngkir ingulĕg ya dening tĕbu ingaduk kadining bubur arĕngnya sinidu kĕdas pinulang jroning cĕcupu sakarinya ring duwĕgan malih sira bhinusana.

107. Apangadĕg tulya kadi gunung awastra ya pĕtak inaweh sĕkar sumpang sri sĕkar capaka asusun sĕkar kuning sandat mimbuh parĕnging si tunjung nila suku tunggal pangadĕgnyu kadi wayanging hyang siwa maha sakti natyaraja.

108. Wimba ardhanareswari patut suku tunggal siwa titi mamah hyang bherawi mahesantaka atanu angardi trĕpti nikang bhuh patĕmwaning siwa durga kadi ujaring tantreku atutur atma jatinya kalĕpasan samyagjnana.

109. Tan warnanĕn rajani kalalung akweh wwang agĕbag sang hyang wiwaswan atangi para pangiring sumuyug lungheng pasir sapadulur lumariseng gwa lalawah ri gĕnah ika angayut ikang madya sapisanan winawa juga ring tirah.

110. Ombaknya ghora angalun-alun ri sagara lanang inampĕhan barĕt angin sabrang tasik saru-saru nusa malit ya kadulu ri wĕni alinggih sama katur bĕbantĕn de mangku matur pyuning pangaksama praya anganyut tang bhasma.

111. Puput sajining tasik kahatur lud alakweng tirah ri sanding ambu akinkin irika linukar payu suku tunggale sautuh ingayut gambhiralaya mulih pawakannya alus tĕhĕr sinadya tapakan hyang atma mwah ingulapan.

112. Tapakan prasama pada hayu pĕpĕking kusuma sama mangke wus alinggih ryajĕng linggih sagareku sopakarane linantur sadanane padudusan inayunan de sang wiku asasana ring galiran prĕnahing amangku dalang.

113. Araris kawit apiyos sri mpu agĕlungan rakta pantĕs lwir amoghasiddhi angastu hayuning hayu tan warnan pamuspan puput mangke amurwadaksina ring sandinging linggih tugu pangayatan ratnangkara aniwi hyang lodannatha.

114. Samapta kumuliling ping tĕlu tur raris anabrang tapakan sami mabaris ring sirah sama jinunjung barising tapakan luhung sakadi giri kusuma abĕcik tan hana kusut suganda warna mendahan manobhawa kalangĕnan.

115. Mangke aranjing tapakan santun alungguh ring jrowan abaktyeng hyang giripati arĕping wiwara bukuh inajĕngan de sirang mpu sang pandya asrameng sidan sira ta munggah akĕtu lwir hyang kanja angindarat amuja lilawarana.

116. Tan akweh caritanĕn puniku pascating pamuspan prasama atulak wali mawali ring taman bangsul sagrĕhan sama adulur angunggahakĕn wahana tan panjang lampahing hĕnu iniring gong kadyeng mangkat malih munggahing payadnyan.

117. Mangke rahinaning tumpĕk kurung kĕpiting prabhata tapakan malih iniring lungheng pura hulu bangsul majar-ajar mangda puput lampah sama anguttara amurwa ka simpat bunut bĕnĕr wetan prapteng nongan anglor tumut marga raya.

118. Swaran gong angiring ayun umung lwir watĕk dewata praya nangkil ring tohlangkir saprapta sireng tinuju lungheng dalĕm puri dumun hyang candika tinangkila alinggihing gĕdong agung sapisan rakwa anĕbas hyang pitara yan irika.

119. Bhaktinya inayunan sang galuh griya sukawana apiyos amuja siddhi tan lyan padmadewi turun wibhawanira akĕtu pascat ikang bhakti sĕmbah pangiring polih jajatu sakeng de mangku irika kinon mĕndĕm ungkur rong trya.

120. Atangi malih amurwakidul ring natar kadatwan kumuliling ya ping trini wus iku ring jawi lantur ring linggih hyang prajaprabhu ugal-agil titi gonggang sapuputnya pada mantuk lumaris mangke ring pura catur lawa hyang karmara.

121. Irika anyĕpihing palaku sang padarman syosan haneng pasĕk mintar kangin tur hana ring arya tuhu ri padarmannya umatur anĕda wara nugraha mogha drĕman bagya lanus salanggenging surya candra tur kocak ombak sagara.

122. Waluyakna ri nataran iku kahyangan lokarya de mangku amuja bakti panangkilan dharaneku ri arĕping linggih meru palinggih pu siwaguna merune atumpang tĕlu irika tan dadi lupta satrĕhing pande anĕmbah.

123. Mapan kayeng dangu hana pastu sapasira lupa anĕmbah linggih hyang suci natar kapandeyan sungguh kasapa selining banyu sugih gawe kirang tĕda kadi damar gĕngan apuy nanging kakirangan lĕnga karusakan panas bara.

124. Hyangnira tinapak mareng batur sawusing amuspa mangkana kadi pralagi ring pura-pura rumuhun saksat sampun polih rauh lud anuju padma tiga irika malih anyakup sapuputing pratĕka yadnya pascat sampun inasrenan.

125. Tapakannira sang hyang sinuhun mwang hyang nanaknira munggah sireng bale asti pangiring ri natar sampun sapuputing yadnya katur prasama ngadĕg agĕntya ahalon tan wĕnang runtuh malih hyangnira tinapak ring baturing tri purusa.

126. Ri pura len kewala pawungu mangda tan ajambat kadi ri pura karihin dalĕm panangsaran iku sang pande wĕnang iriku malih ring hyang pamuputan manik mas juga karuhun bangun sakti gowa raja pura gĕlap sahananya.

127. Atha ryuwusnya sama awantun nuruneng gopura sangkeng sor katon surasmi kadi wau tumurun jung lungha sakeng jagat mlayu tumuruna sireng tuban rajya gĕgĕlang rinuruh tan sah anggawoking ulat reh kusumasara anjrah.  

128. Tan ucapĕn wahaneng marga gung lampah sumanggala awalya ring taman bali asimpang ring jro hyang cungkub pamasaran adwĕ hulu ingaranan dalĕm jlela irika sama umasuk matur sĕmbah len panyuksma apan karya wus alabda.

129. Ucap mĕne pangiring lumaku anapaking lĕmah anglor prapteng pasar raris hana kapwa marga catur angalih bĕnĕring kawuh prapta maring pangastulan irika sama umasuk ingaranan hyang nataran panĕmbahan lohakarma.

130. Arĕpnira prama suksma katur ring bhatara lingga tan len kapĕndak iriki lancananing sang hyang guru pamugĕran jagat agung suksmaning tan tampak indrya alingga murddha kasuhun mangkana sang hyang pinuja siwa taya suksmeng sarat.

131. Inayunan sri galuh sinuhun baktinya samuha arangkĕpan de bĕbangkit sapuputing yadnya katur lumampah amurwakidul ri uttamaning mandala kumuliling ya ping tĕlu raris amantukeng jawa angungsi maring payadnyan.

132. Socapan palinggih maring hayun panataran pandya gunung agung kĕntĕl gumi gunung lĕbah hyang pamuwun kayu sugih ngrurah agung mwang sĕdahan panĕrangan palinggih sĕdahan lĕmbu tur akweh palinggih lenan tan kocapan haneng gita.

133. Walinĕn sopakara ring panggung tapakan umunggah mawali ri gĕnah suci bakti apalĕt tan luput bakti pangĕntĕg pangingkup inajĕngan pandya karwa ri hulu sira mpu galuh asrama ring swecchapura ri dudonan pu kamasan.

134. Asanding malih sang dwija jalu griya wĕratmara kadi warna kĕmbang cangkring kawacanira sira mpu nĕhĕr den pangus akĕtu jnana bajra napak lĕmah mawa tutur pinahayu duk sira munggah pawedan madumukeng hyang adhyaya.

135. Sopakaranira tan winuwus putus arantasan samana anyaluk wĕngi ikang warsa mangke labuh tatkala tapakan turun yeka sumanggala kocap saksat sama kĕni jawuh saking paicchan amaragana puspawrĕsti ring niskala.

136. Atha ri tapakan wus tumurun amwiting payadnyan prasama winawa mulih ri grĕhanya sowang tuhu lininggihĕn maring salu yan hana adrĕwe payasan hana ring sanggar sireku hana alinggih ring dadya nataran len manut drĕsta.

137. Kocap tapakan raman inghulun mulih maring sanggar agĕnah ring tĕpisiring pradesanya katurikup hĕlĕt uttaraning pangkung nging sadurung prapteng umah matur pakeling rumuhun irikang mangkalan desa marga tiga hana wrĕksa.

138. Ryajĕng palinggih padma tumĕdun raris matur sĕmbah alungguh tur maprastuti linggih ratu gĕde iku panyawang dalĕm ped tuhu tur sira sĕdahan marga smasana adrĕwe tutuk mwang bhatara sapuh jagat tan kari hyanging arungan.

139. Atha pascat lumarisa purun amarga ring kilyan anuju padu neriti irika kuwu ninghulun kaloring kuwu tumurun lumaris anapak lĕmah satĕkane haneng lĕbuh inaturan tadah sĕga maring sang kala wigraha.

140. Mangda tan usil maring gawenku tur ring kala ngandang mangda tan tumut umulih tur raris nuju hyang batur ri jawa malih asuguh wus ika munggah payasan lud ingarĕpakĕn timur madumuka ring kamulan palinggih hyang tiga jnana.

141. Sakadi duwung masuking sahung ikang adumuka warangka masuking kĕris rokning gĕni lawan banyu wruh atangi wruh aturu sang hyang pradana purusa jalu brahma wadon wisnu kawitaning sang hyang atma tan kĕneng sarirantaka.

142. Ahoratri tĕlĕng bhakti mungguh amurnamasada mawak ardhanareswari panĕmbahan mahaputus boddhakacapi sinĕngguh idĕpe mawak kulisah sastra sanga gĕnta pitu amrih suddha kalĕpasan antawindu siningidan.

143. Wangi bakti sayaga den puput pĕras pangambĕyan sodan dapĕtan malih panyĕnĕng alit sĕsayut pĕjati angge pawungu munggah ring sanggar tutuwan hyang taksu malih hyang guru munggah bhatara pranamya dinuluran bakti nyawang.

144. Makadi ring dalĕm gandamayu dalĕm kadewatan dalĕm agung dalĕm kangin gĕnahing angaben dumun duk pinuput sang pu galuh agriyeng guhya samaja ika nyawang talĕr katur sinĕngguhku dalĕm purwa marikanang  galĕng lantang.

145. Bakti ingantĕban jĕro mangku panataran pandya tulikup banjar gosali pabrĕsihanne adulur bayakaonan rumuhun samaliha prayascita ikang jawuh tiba kantun niskala surakusuma lumra manjrah pakarangan.

146. Sĕkar ura idĕpĕn sumawur gatining komala sĕkar sandat len warsiki tanjung gadung anggrek mĕnuh mandasuli sĕkar jĕpun kĕmbang jĕnar pancar cina waribang tur ratna pingul widuri putih suratrya tĕlĕng wungu tĕlĕng pĕtak.

147. Idĕpĕn ri sakala kang jawuh gatining sabĕh mas dadi hemadrawa pwekang riris ikang kilat adrĕwe wuntu mogha rika ratna turun parine awoh katupat awoh wastra pwekang kapuk sarwa tinandur raharja urip enak sesining rat.

148. Tan ucapĕn bakti ring hyang batur sampun pascat tatas tapakan pacang lininggih ring sanggar bhatara guru rikang linggih marong tĕlu pada desa mawacara nanging pakrĕttaning hulun alinggih ring sanggar tiga mbontĕn ring sanggar rong dwitya.

149. Kadyeng anubhawaning sanghulun palinggih rong karwa hyang kabuyutan jalwistri kamulan bhatara guru uttama baligya putus alinggih sireng kamulan irika lingganing guru bhatara batur ingaran panĕmbahan suksma taya.

150. Hanane tutur sanggar rong tĕlu ri tĕngĕn bapanta kiwa linggih ra sang bibi madya raganta satuwuk arddhanareswari iku sinĕmbah hyang murti tiga sama ika mawak guru angastu rahayuning rat sobhagya samasta jana.

151. Mwang hana prakrĕta nikang tutur linggih tiga jnana rong kidul sira hyang sakti palinggih bhatara guru pangayatan manik apuy pamunahing sarwa mrana lokaraksa maweh lanus kĕntĕl gumi hyang sakenan andakasa mwang sagara.

152. Hana rong kalor mangke kawuwus ayat manik tirta batukaru majapahit ulun danu gunung batur maraga hyang adiguru kawit ikang pandaringan sira hyang sari sinĕngguh hyang sakti pawakan brahma hyang sari mawak kesawa.

153. Rong madya dadi sira pamucuk pawakan iswara pangayatan manik sakti maraga hyang prama guru aparab sira hyang ratu gunung agung kang ingayat hyang kĕhĕn lĕmpuyang luhur bhatara ring dalĕm dasar prasama angraksa tuwuh.

154. Malih pwekang rong tiga tatweku panĕmbahan desa kiwa sang hyang ganapati pangayatan pusĕh tuhu sang hyang smarabhawa kidul pangayatan pura desa sang hyang sunyamrĕta iku alingga maring rong tĕngah pangayat dalĕm wisesa.

155. Walinĕn sopakara ring batur amurwadaksina mawa tapakan siniwi hana pinaka panganjur ikang sĕpit culik apuy mottama ikang pakakas sarwa bhuta ya atakut apan mawisesa dahat saking aji kapandeyan.

156. Sang hyang sangkara ri culik apuy solah ala arja ring idĕp sira umulih pawakannya gĕni murub ikang sĕpite umungguh dewata parama siwa pamulihannya ring bayu matĕmahan kalih netra pawakan banyu wisesa.

157. Pakakas rwa panganjuring laku tĕbu panuntunan sĕsinggĕle lawe putih rantasan ika ri hayun patute adaging kukus sarupaning asĕp mĕnyan mĕnyan panggil majagawu pangrumrum dewa ayoga tinabuh swaraning gĕnta.

158. Amurwa daksina wus ping tĕlu raris ingĕntĕgan tapakan haneng palinggih kiwa tĕngĕn madya tumus sowang pada maping tĕlu tur lumaris ingadĕgan anyĕjĕr ping tigang wĕgung sinimpĕn ikang rantasan ring rong dwa kalawan nama.

159. Sĕkar sinĕbit sari dinulur mawiting tapakan ginĕnahan den abĕcik ring rong kalihe puniku kewalya andadi jatu untĕngnya jantĕn kamulan kantun tibaning hyang jawuh dawĕg anyimpĕn tapakan mogha iccha swarganatha.

160. Tigang rahina kalaning dalu amasmi tapakan linukar ginĕsĕng sami sampurnaning dadi awu tĕlas awunya pinunduh pinulang jroning nyu danta raris pinĕndĕm ring ungkur ungkurnira hyang kamulan tan adalĕm ikang lĕmah.

161. Pinĕndĕm paparĕng ikang jatu tinunas kina ring kahyangan dalĕm puri ginĕnahan sanding hulu tinancĕb katiking iksu haneng sandinging daksina urip dadi tĕbu ratu nguni galihing hyang durga duk linukat sahadewa.

162. Hanekang sari wrĕta rinungu yan ring mrajan griya sinĕngguh ring natar suci tapakan dewa sinuhun lininggihĕn ring dineku surya madu pwekang dina ring manahil pwekang wuku mangkana puput kawĕdar sopakaraning baligya.

163. Mangkana carita kurang langkung den ingĕtĕn manda jati makweh tuna lĕwih lingsanira nora anut sok paksa angikĕt kidung lupa raga alpasastra bhasa bhasita tan lĕngut dikapan angawe lĕga tan sah tinindaning sarat.

164. Kadi sodama anarung indu pastika kasoran kadi nghulun mawak cacing paksa atanding ring manuk tan sah nghulun kadi nyamuk atinggah cangkĕm saraswat kantun mawak rare bĕngu lancang makĕncan ring sastra tan pangus banding surupa.

165. Sawyakti nghulun nyungsung jugul tan adrĕwe rowang awarih lokarma wijil agawe astra tan wĕruh iwa wring amojar jumbuh thapi norana isinya aywa rĕngön si awuru rimang midĕp dina enjang tan kawruh kadyangapa.

166. Aksamakna si pangripta jugul puput ring rahina guruning amara yukti astawara hyanging kidul patanĕkan panca niku wukuning pasupanjara aryang laba ingkĕl manuk tur lintanging pamĕrĕman kalaning para wong nidra.

167. Singgih sakawarsa gita puput liman ring sagara alĕlawang amrih bhumi pascat liwaring satahun ping kalih nĕmu pawĕtu oton rahina baligya yan ingĕtĕn hyang sinuhun polih muput ryumah ingwang ping roro sama wĕdalan.

168. Sesaning angraja mrĕgaprabu malih pawintĕnan makarwa puput ring suci griya bhatara sinuhun arya sahaya sanghulun potraka karmarawangsa umĕnĕng maring tulikup sanding siring loring jurang banjar wiswakarmaputra.

169. Sapuputing carita ingapus ring gĕnah inucap irikang gĕdong maalit wwayeng saren luhur kidul kiduling ancak tumuwuh iki pangeling baligya sampuranĕn makweh luput de sang sadhu suddhyamaca ligya ring taman waluya.