Geguritan Jalasoca

 Geguritan Jalasoca

                                                                 

              

1. ginada pamurwan gita, ngawit ring wara kulantir, sri matumpuk tungleh masah, dinané sogata madu, metu manah mangindayang, saking wreti, miragiang wimbakara.

 

2. tityang damuh kantun muda, pangkah manempa sang kawi, mamodal ban basa tawah, twara tawang ngawit nyumu, tityang kédok mabet tlaga, kemu mai, jugulé sunggi titiang.

 

3. i damuh kalintang alpa, alpa rasané tan kadi, makaca sumingkin buta, mapi-mapi nawang tutur, tityang kelem ring clébokan, sira alih, apang lédang maningtingang.

 

4. to mawinan damuh nyembah, ring ratu hyang saraswati, ratu tulya kadi luah, nyusup ring ilining banyu, dadi sarin sangaskara, sarwa nresti, urip sangkan hana toya.

 

5. indik sarining carita, wénten ratu nyakrawarti, nanging manemu pralaya, wiréh campah tekén danu, punika saking bisama, wiku sakti, maparab sang jalasoca.

 

6. kocapan sang jalasoca, bhujangga mangwanaprasti, mayasa ring alas jurang, nyabran purnama ka gunung, drika ida mangulengang, masemadi,

mitutur kaya wak manah.

 

7. purnacandraning wésaka, sang bhujangga mangawitin, mayoga pucak parwata, ring watu lumbang majemuh, ngaran gunung mahamerta, siang latri, ngacep hyang jagat karana.

 

8. yan pira kala lumampah, teka ring madyaning wengi, tapané raris kagoda, déning sabeh nadak blabur, tur ring sor metu klebutan, toya milir, embahanné ageng pisan.

 

9. toyané ngembeng ring lemah, sayan negehang prajani, jalasoca enteng manah, dyapi toya wus ring waduk, ngancan-ngancan wus ring dada, ten alami, toyané ngelemang sirsa.

 

10. mangkana gagodan déwa, arsané lakar mintonin, patapan ida bhujangga, napikéh sujati tuhu, napi kantun nenga-nenga, ida resi, matapa dasar kembengan.

 

11. mangkin ring dasaring toya, pitung wengi bawisyati, jalasoca ngelar tapa, ida tan manggih pakéwuh, réh toya kasuksman ida, to mamurti, sangkan pangacep sang pandya.

 

12. atha ring benering surya, anggané sang mahamuni, ngamijilang geni ngabar, ring dasar toya makebyur, bahni mlesat maring tawang, ring dik widik, mapulung-pulung manglayang.

 

13. raris malih nibéng toya, rumangsuk ring awak resi, tan dumadé toya asat, enyat matemahan kukus, kukusé mawarna petak, miik gati, tulya kadi asep menyan.

 

14. malépod kukus manunggal, madulur munggah ka langit, praptané ring suraloka, kalimunan kukus arum, kagaok déwa irika, apan ngaksi, kawisésan jalasoca.

 

15. wuwusan hyang jagatkrana, swéca ring ida sang yogi, wireh dreda tan pacala, ten obah ring manah kukuh, limpad ring yoga rahasya, sané mangkin, ida bhatara nyekala.

 

16. turun hyang jagatkarana, kairingin widyadari, kasréokin jawuh puspa, sembar wanginé ring gunung, lédang manah jalasoca, manganjali, ginanti punang wacana.

 

1. ida bhatara manurun, nyatur bhuja tri wadani, raris masabeh wacana, kapining sang wiku yukti, mapan ageng yasa tapa, ambek brata tan sinipi.

 

2. jalasoca hé anakku, gagelaranta utami, tan pasah kita ring toya, toyané awakta jati, dyapi ring garba lan jaba, nanak tusing taén lali.

 

3. hana ta panugrahanku, sarining ajiné singid, arang ada wong né wikan, umpamiang wong sakoti, méh asiki nora nawang, ring ajian kaya niki.

 

4. kaputusan sapta sindu, apang nanak manelebin, sindu ring rahasya muka, pacang kapaica mangkin, élingang nanak ngeraksa, réh utamaning prakérti.

 

5. jalasoca raris nyaur, manyembah nyakupang asti, manguncarang wéda stawa, tui mapranamya bakti, maring hyang jagatkarana, sembah tan simpang ring budi.

 

6. sembahku ring hyang sinuun, sané swéca nganugrahin, i katunan kadi tityang, sané tambeté tan kadi, molihang sindu rahasya, sané kocap suksma pingit.

 

7. puput ujaré sang wiku, hyang jagatkrana mamurti, marupa déwi saksana, mamakta bumbung masanding, busanané cemeng abra, jalasoca gaok ngaksi.

 

8. raris déwi listuayu, angarad kukus ring langit, turunné mapanta-panta, dasa désa malih nunggil, gandané wangi makebyar, raris ka bumbung ngeranjing.

 

9. kukusé sampun ring bumbung, manadi toya mawali, téjan toyané dumilah, ngasorang téjan sang rawi, sang déwi lantur mamuja, rauh wénten sastra mijil.

 

10. sastrané mangkin ngerangsuk, sadaging pranawa murti, saksat macampuh ring toya, sayan sinang manyunarin, sajebag jana lokika, saha miwah sarwa prani.

 

11. sampun jangkep toyan bumbung, paican ida bhatari, wus katampi jalasoca, kancit sirna hyang bhatari, mantuk ka acintyapada, ninggalin sang mahamuni.

 

12. critayang ida sang putus, makayunan mantuk malih, nuju pukuhing parwata, ring pasraman ida nguni, arsané pacang makarya, linggih bumbung padma manik.

 

13. kalaning manurun gunung, karang réjéng kaentasin, samaliha alas wayah, sarwa galaké menuhin, kéwala ngeboh sadaya, duk jalasoca mamargi.

 

14. né mawinan sami manuh, réh nepuk bumbung ngentérin, tri warna mumbul makesyar, tulya wulan nyuluh wengi, satwané sakadi nyembah, manyembah ring toya jati.

 

15. duk ida sedeng lumaku, maclegos cokor sang yogi, ten uning wénten céglongan, aget bumbung tan macedig, nanging ida ngemanahang, cihna durmanggala niki.

 

1. jalasoca, ngelanturang pamargannya, tan tinarka tengah margi, ada anak nyadang, anak mwani ngaba kléwang, gedé ganggas renges gati, pregas manguman, tingkah bégal durbudi.

 

2. hé pandita, apa alih tengah alas, uling ejoh katon ngendih, apa aba bapa, nguda ja ngenah gumiwang, mirib ja socan mas manik, bakat di alas, baang tiang manolih.

 

3. sang bhujangga, masaur ngandika banban, tusing ada kéto cening, bapa wanaprasta, sing nyaratang arta brana, tuah mayasa tan pahi, ring mahamerta, giriné pinih suci.

 

4. to i bégal, sing ngugu wacanan ida, mata nyeheng kelik-kelik, bumbungé kaawas, sangsaya tekén sang pandya, ngengkebang sesocan apik, ento makada, bumbungé kaedotin.

 

5. tur karampas, kasogok ida sang wipra, bumbung toyané kaambil, i bégal mlaibang, sawat mangelod pascima, ring sandingin kidul bukit, bégal nguagang, keneh gedé kén manik.

 

6. tuah toya, tengah bumbungé kabakat, ngadoang bumbungé iki, tur raris kasampar, ka kébot ulung ring jurang, nadak medal toya mili, ten pegat-pegat, paling ia ngenotin.

 

7. uling dija, ada yéh maluab membah, i bégal macuet ningkling, mlaibang angkihan, sajebag tanahé drika, toyané ngembeng nyilemin, negeh-negehang, manadi danu ening.

 

8. danu nika, saking tengah bumbung medal, mulanira toya jati, nyekala ring lemah, sarining sindu rahasya, sastra pranawa mamurti, suci nirmala, danuné tan patanding,

 

9. macengehan, i bégal makesyab-kesyab, sajan koné bumbung sakti, ané bakat sampar, pesu jani dot hatinya, toyané kaanggon sugi, wiréh masunar, diptané nawut ati.

 

10. nadaksara, awak ipun kebus bara, makules dadi lelipi, aéng kabinawa, ageng sabongkol wandira, tur calingé tiksna lungid, layah masepak, lén kadi goba riin.

 

11. gunung rebah, mangkana yén inumpama, gelur ipun ulyan sedih, lawaté ring toya, katonné dudu manusa, mangkin magoba lelipi, kawalang arsa, i naga dahat kingking.

 

12. tan alama, wiku jalasoca prapta, kagyat ida mangatonin, ipun naga gombang, siluman bégal katemah, munyiné matungtung tangis, amelad prana, ngaksama ring dwijati.

 

13. uduh bapa, ampurayang tityang singsal, nyampah tekén toya jati, padruwéan bapa, kadén tiang tan paguna, tityang nunas pang mawali, dadi jelema, lédang bapa nywécanin.

 

14. ujar ida, ngucapang i bégal iwang, mawinan ala pinanggih, twara wénten tamba, pangruwatan panglaradan, yéning toya ngawisyanin, yén ngedot supat, ipun katitah resi.

 

15. naga gombang, jani cai tundén bapa, apang nyaga danu driki, selegang nyaga, danuné apang santosa, cai dini nyelem putih, bapa misama, runguang apang becik.

 

16. ring delaha, danu niki dadi luan, luan sakancan mahurip, maha amerta, nora dadi pati ulah, patuté sembah baktinin, ratu kawula, tur sinomanné mangkin.

 

1. pisajanang naga gombang, béngbéngang kupingé jani, tata titi mangda tatas, rangsukang telenging ati, kapining toya iriki, sané matemahan danu, wénten enem warah bapa, maka sarana makérti, maring danu, né kén dadi né kén nora.

 

2. kapertama pisaratang, muncal luu nora dadi, luun panjus sarwa camah, luun paon sisan bukti, ndatan kawenang prasami, palané yéning kalurug, waduké busung jah tasmat, ten rérén lara nyakitin, ngaduk-aduk, wisya mawali ka basang.

 

3. kaping roro katlatarang, toya sing dadi kecuhin, palané kirangan pangan, eda kanti kapurugin, sabdané pacang tan sidi, warahé natan kagugu, bilih yéning sang pandita, mantrané sasar tan mandi, yéning ratu, caket yéning mawacana.

 

4. kalanturang kaping tiga, eda mawarih mabacin, ring tengah toya nirmala, ngutah bayar kal tinampi, dong plapanin ento cening, yéning amiwal puniku, gela-gela nénten waras, jawat siang jawat latri, aduh aduh, naenang gering mamangsa,

 

5. kaping kapat kang ingetang, mulang racun to kelidin, apa buin yan mabwaka, madasar bikasé drenggi, ala dahat kang pinanggih, yéning toyané rinacun, lemet lépéné katama, sing inget déwék pedidi, sayan ngembuh, atma maninggal kurungan.

 

6. durus mangkin kaping lima, yén jalan yéh kaurugin, nyelap ngempet yéh di luan, sangkaning pangaptin demit, sok marasa déwék ririh, tekén tebén twara lingu, mangda molih embet jengkang, aywa drowakaning budi, toya ngalur, patut tunas sinarengan.

 

7. gegamanné kaping untat, ngebah punyan twara dadi, yukti yan madasar punyah, sampunang pati ngawagin, punyanné telas pungkatin, katotor tuara kéngguh, baya ageng jaga prapta, blabar agungé mamurti, jagat gentuh, putung sasanak santana.

 

8. yéning mahyun nganggé toya, ada warah bapa mangkin, toyané apang yasaang, satingkahé nangun kérti, eda ko patigaukin, anggé manut sakaperlu, bisama eda engsapang, jalan linggihang ring ati, mangda nugtug, rahayu pitung undagan.

 

9. puput sajawuh andika, naga gombang nyembah bakti, sadya nindihin bisama, saking jalasoca sakti, kacihnayang puspa wresti, kasaksi surya sitangsu, malih panca maha bhuta, sang hyang trayodasa saksi, sami nulu, labuh bisama sang pandya.

 

10. katon maring antariksa, déwi ayu naténg rasmi, angadeg macatur bhuja, ngungkung kalangun sulaksmi, tuhu sira wisnupatni, rumaras lindi manudut, tejané mas makalangan, raris mlesat prabawati, maring danu, ida turun manyuksema.

 

11. dedari gana ngiringang, turunnya makoti-koti, tinabuh genta lan sangka, manis swaranya mamunyi, tumurun sami masuci, makénak-kénak ring danu, macamana adyus kramas, akembang malenga suri, wus masusur, pasalinné abra muntab.

 

12. danuné ening gumiwang, kadi mameka umpami, yéning masuluh ring toya, lawaté katonan ilis, ten katon sarwa durgati, dahat sinang sapuniku, wimba kéndranné katonan, samaliha déwa-déwi, katon parum, ring danu yéning tlektekang.

 

13. sojarira déwi wara, mami nganugrahé kaki, danuné mangda anama, imper kadi naman resi, aywa predo maring mami, danu jalasoca tuhu, jalané mateges toya, socané mateges ening, tan pacampur, anadi sarin amerta.

 

14. sida amunahang lara, sidi anggén mangusadi, suda sadaginging sarat, malilang jeroning tusti, masadana toya jati, suksmané pranawa sindu, sabda idepé tunggalang, lawan bayu dados siki, mantran lantur, gangga nirmala siwa ya.

 

15. jalasoca nyakup asta, pujané ngayat sang déwi, nyembah ring padma carana, raris priambada nyawis, bagya titiang ring sang singgih, mapica araning danu, maka mertaning bhuwana, uduh sang adruwé urip, semayanku, satuuh watu manyaga.

 

16. tan warnanen déwi tirta, nyuksma pawayangan déwi, nyusup danu jalasoca, naga gombang taler ngiring, malingser nyaputin tepi, sajimbar danu kaserung, nagané tambak laléyan, pacang ngraksa nyelem putih, kadi tuduh, ida sang maha bhujangga.

 

17. raris ida jalasoca, éling ring nanak sawiji, apsujati puspatanya, saksat soma manumadi, manggeh dados cudamani, purohitaning sang ratu, tedung jagat lemah banda, wibawané nyakrawarti, sampun kasub, kadi smara danaraja.

 

1. ucapang sang narapati, sri sang prabu danaraja, wibuh sarwa molé-molé, gedongé maprada emas, pariginé nawa ratna, uparengga manik tatur, kadi kahyangan kuwéra.

 

2. dahat wibuh ring nagari, panjaké pada santosa, makasami nyambut gawé, matani mangangon muah, taler madagang manukang, nagarané sida lanus, sangkan toyané ring taman,

 

3. tamanné kalintang asri, yéh mumbul wénten ring madya, metu saking pertiwiné, dyastun dangar nénten enyat, nika dados pagantungan, sakancan ngarepang landuh, wastané taman sudhira.

 

4. sarwa kusuma manyanding, menuh kemoning lan soka, nagapuspa samalihé, cepaka lan purnajiwa, ring luhur ateb sumekar, umpami maraab santun, sami mangenyudang arsa.

 

5. tatamanan sami becik, kalangen sama tumingal, arum tan ada pamadén, dwaning ring taman sudhira, wénten pasiraman nata, kulon saking toya mumbul, kaiter déning komala.

 

6. mangkin wiku apsujati, masarin tanah ring manah, marawat-rawat sang nabé, mapan wénten kleteg manah, manawi wénten wacana, manauhin nanak wiku, mangkana stata rinasa.

 

7. ring jalasoca walinin, sang bhujangga ngambil toya, wreksa patra tatakanné, tuah toya aketélan, di gelis manados macan, raris samongé kautus, cai ngalih sisyan bapa.

 

8. sang pandya laju nuturin, sapangandikan pandita, karesepang macan rangréng, laut i macan malesat, ical ring duurin tawang, punika taler sang guru, musna ka dasaring toya.

 

9. gelisin satua mangkin, aruna endag udaya, i macan rauh pramangké, munggah ring gedong sang pandya, laut manyembah pranata, singgih naweg sang pukulun, titiang maraga utusan.

 

10. ratu nabé ngandikain, palungguh ratu pang lunga, mamargi lunga ka kalér, ring néritining parwata, drika mangkin wénten toya, supraba maraga danu, ngaran danu jalasoca.

 

11. ring danu ratu mabersih, masadana toya siram, wewehin puja mantrané, apsu déwa pawitranam, lingga gangga danu stawa, wus punika wau adyus, maka panglaradan mala.

 

12. toyan danuné siratin, rauhang taler nebénang, lukat sadasa malané, sapta timira galangang, sad ripuné kaebohang, sarwa marana kapupug, sarwa geringé kalebar.

 

13. samapta ratu masuci, ratu patut ngetut yasa, taler manyaga danuné, mawit nindihin bisama, sad kértiné pang kértiang, ujar lawan tingkah padu, idep lawan tingkah nunggal.

 

14. misanggup sang apsujati, ring sawarah nabén ida, jenang kaojah dutané, sane maraga wiagra, sapuputing pawacana, i mong ilang buka ukud, saksana dadi pangrupak.

 

15. pangrupak raris kaambil, dé apsujati pragata, seselet lamun idepé, tan aswé nangkilin nata, matur ring sri danaraja, aptiné pacang lumaku, lunga matirta gamana.

 

16. uduh sang catraning bumi, bapa pacang ngajabaang, mayasa nuju gunungé, delod dauh mahamerta, amerih tirta pawitra, saking pituduh sinuun, bapa lakar ngetut yasa.

 

17. sumahur sang danapati, kudang sué bapa lunga, tan pabapa gelah gonjéng, sang dwija raris masabda, enem pasah ento minab, ulah ulihé ka danu, ratu sampunang sangsaya.

 

18. pamargan bapané mangkin, nuju tungleh nemu pasah, kasinengguh pasah gedé, apan arepé malasang, saabot-aboting mala, di awak begeh masebun, mangentas manah kasmala.

 

19. naradipa mojar manis, gelah arep ngiring bapa, sareng manunas tirtané, tulus bapa nganugrahang, nanakmu sareng linukat, mangda swasti ring nagantun, ring tebén nyraya ka luan.

 

20. lédang arsa ida resi, danaraja kasarengang, ten baosang salanturé, mangkin sampun bangbang wétan, kembang satamanné mekar, bramara paksi mangidung, ngastungkara sang alunga.

 

21. pamarginé kakawitin, sang ratu nyandingin dwija, yén nirgamayang polahé, kadi rama wiswamitra, taler kairingin bala, akéhnya papat kén pitu, sareng patih indryatama.

 

22. sampun puput pitung wengi, lampah idané ngutara, marerepan ring alasé, marayunan sarwa pala, sayan dina kacihnaang, molihing genah katuju, sayan nampek sayan galang.

 

23. kalpataruné madamping, sakadi nyayubang arsa, yukti ening ring toyané, genah déwane mameka, mahias kumuda kembang, ri luhurné swaran rempuh, saking i paksi ngelincak.

 

24. danaraja gaok ngaksi, danuné sakadi kéndran, sayukti tan pacédané, dyapi tan kahias ratna, ten magopura kencana, wibawan danu kaajum, ngasorang kadaton ida.

 

25. mangkin sira apsujati, malinggih mapranayama, mamuja déwan danuné, malarapan puja mantra, japa yantra muah mudra, sang resi nguncar malajur, ngetis arsa sang mangrenga.

 

26. saputusing sarwa bakti, sang resi turun ka toya, nungadah tangan idané, nyaup toya kategehang, jantos ring lawangan siwa, toyané raris karaup, kaulang rauh ping tiga.

 

27. sri danaraja mangiring, ring tepi ngraup wedana, tan sah wedanan idané, kadi matéja karasa, pramangkin ida ngatengah, magirasan ida madyus, marasa lara kalarad.

 

28. sang prabu umatur aris, tabé ratu mahadwija, nirmala pisan toyané, ingan rasa awak gelah, kadi waneh tan paneda, suka tan pawali sungsut, to ya mirib rasan moksa.

 

29. angucap sri apsujati, patut kadi atur déwa, kotamanné nénten wanéh, ajiné pinih utama, manunggal jati ring toya, sastrané taler ngerangsuk, mamurti sindu rahasya.

 

30. teteken lantur kaambil, olih ida sang bhagawan, katancebang ka parangé, gelis toyané mamarga, maembah rauh nebénang, kawitanné saking danu, umili manados luah.

 

31. malih mojar ida resi, danaraja mamirengang, toya ring jalasocané, sampun membah jani déwa, membahé ka lemah banda, anados tukad mangalur, ngamertanin sarwa praja,

 

32. ten ucapan nika malih, ten panjangang jwa ring marga, gegancangan pamargané, pangiringé kantun satya, mangiringin sasuunan, wus ring karaton mawangsul, kasambut gita ring purwa.

 

1. winarna ring lemah banda, sayan landuh ring nagari, santukan natakin tirta, dyapi sugih dyapi lacur, pada amolih amerta, tan pamilih, mapan asihé kalintang.

 

2. wau atangi hyang arka, sang nata ayat masuci, tumedun sira ka taman, alungguh ida ring batu, naneng ngraga tan pasabda, jroning hati, malawat ka jalasoca.

 

3. lulut ida ring kalangwan, janten iku tan patanding, taman sudhira ten pada, umpama kandik lan jaum, yén banding ring jalasoca, sang bhupati, makayun dados utama.

 

4. gelis ida manitahang, patihé pang ngemaranin, dané patih indrayatama, dateng parek ring sang ratu, umojar anunas titah, prabu sakti, wénten napi ne mabuat.

 

5. danaraja nyilur ucap, duh patih pakandel mami, gelah mangedotang pisan, toyan danu kadi dangu, anggon adyus tur keramas, paman jani, apang ngalihang maréka.

 

6. dané patih nyaur sadya, anyembah raris mamargi, raris kanikain roang, kalih diri ya kautus, apang nuju jalasoca, laut ngambil, toyané bakta ka taman.

 

7. ten satwayang tengah alas, molas dina ngutsahanin, i roang tan parérénan, mulihé ngaturang bumbung, kéwala tuah dadua, danapati, sigra ngambil gegisonan.

 

8. sang prabu raris masiram, makeramas macemani, toyané telas apisan, kocapan kurangan liu, danaraja raris nitah, paman patih, alihang apang liunan.

 

9. roangé dasa katitah, soang-soang apang mulih, ngaba bumbung pada dua, molas dina ya mawantun, toyané raris katurang, ka prejani, toyané telas apisan.

 

10. danaraja mangkin duka, socan ida barak ngendih, anguman ida ring roang, kuda cai ngaba bumbung, gelah ngepah mangantiang, sing maarti, ngaba mabedik-bedikan.

 

11. dané patih matur iwang, réh kabaos toya kedik, mangkin dané manunasang, napi sandikan i ratu, parekan lakar ngiringang, mangda polih, sakadi arsan sang nata.

 

12. danaraja mangucapang, ketogang bala aketi, bilang dina apang ada, toya dasa tali bumbung, briokang laut ka taman, apang ening, sakadi ring jalasoca.

 

13. apsujati ngamirengang, karyané pacang karincik, tan dwa ida mapawarah, uduh sri sang nararatu, singsal rencanan i déwa, nénten becik, patut apang ginantiang.

 

1. toya rauh saking danu, patut tunas sakabedik, boya ja keruk telasang, boya anggén niri-niri, pateh kadi marikosa, yén punika kaumpami.

 

2. sampunang ratu amurug, bhisama sang nabé lingsir, mangda nénten polih rusak, saking sapané nyeburin, indayang nika kayunang, tur mayasa nandur malih.

 

 

1.     danaraja, tan angrenga ujar pandya, angkarané kaulurin, bingkih nguber liang, bisama nora ginega, sangkan kama ngelimutin, lelampah singsal, sengguha ulah becik.

 

2.     nyabran dina, roangé ngaturang toya, nénten kirang dasa tali, kadi warah nata, kapulang sami ring taman, ledang manah danapati, mabukti toya, saking luanan ening.

 

3.     pitung dina, toyan danu kasaludang, nanging ala kapraciri, i roang nguningang, indik ring taman sudhira, bengu mlekag kaungasin, tunjungé rusak, toyané masilur warni.

 

4.    nétra mabang , danaraja kabramantyan, tanda mantri sama nangkil, ten wani lumihat, sang kadi kala bérawa, ngerangsuk awak bhupati, umojar pregas, ring pakandelan patih.

 

5.     indryatama, nguda taman gelah rusak, becatang pang cai menin, tur alih i dusta, ejuk tigtig tur basta ya, tur tibakang werat pati, gedé dosanya, ngaénang taman rigrig.

 

6.     patih nimbal, matur indik saprakara, nora wénten jadma ugig, sangkan taman rusak, mulané usak ring toya, kaambil ring danu nguni, yéning minabang, ada wisya nyarinin.

 

7.     manut tityang, wirangang ring jalasoca, ngiring merika selehin, danu jalasoca, ratu patut ngematutang, pan ratu amawa bumi, tebén tur luan, ri astan ratu nunggil.

 

8.     wus sadaya, cumpu mawirang ka luan, ten sareng sang apsujati, warah tan ginega, ngawé ida ten ngerungwang, netep kadi polah riin, nyurya séwana, ri endag prabapati.

 

9.     wénten cihna, duk ida nyurya séwana, kalané kari amusti, alaku paganggan, tan dumadé ring siwamba, tirtané asat pramangkin, norana bedah, tengeran ala iki.

 

10.  gegisonan, ida resi ngruruh nata, nanging sampun ten ring puri, duké ngedas lemah, balané sampun umangkat, ka jalasoca angungsi, ida pandita, manahé ngemaranin.

 

11.  ten ucapang, sang apsujati kasasar, sang ratu dumunan prapti, raris ngambil toya, kainum apan kasatan, arsa sapisan mintonin, kahanan toya, asapunapi jati.

 

12.  wus punika, watuk ida nararaja, menggahé munggah ring ati, sigra ida nitah, uduh bala raréncangan, kemu danuné urugin, macampur wisya, toyané sayuwakti.

 

13.  para réncang, masaur manuk sadaya, manggalané dané patih, malih ngonkon gelar, adasa tali tambahang, apang kakaryanné gelis, ngurug toya, genah baya makawit.

 

14.  kenyel ngawag, mangurug boya ja sida, réh danuné jimbar gati, telung wengi lintang, tuara bisa kapragatang, olih dukané sang patih, sarwaning punyan, makejang kapungkatin.

 

15.  bingin rebah, papayonan sami ilang, tunjung-tunjung kauyakin, maubek ring toya, danu jalasoca benyah, sakeneh-keneh mawarih, ngamuncal sepah, danuné penuh bacin.

 

16.  wus magébras, makasami mantuk budal, sampun waneh ngusak-asik, ring tengahing marga, bala asibak bah pejah, sasésané kari urip, mangungsi umah, nylepeték nyelé ati.

 

17.  danaraja, taler patih indryatama, kamemegan twara uning, sukil kahanannya, sigra nangkil ring sang dwija, sué sang dwija pinerih, noranéng griya, dadya sumingkin kali.

 

18.  ring adina, panegara kebus kangkang, surya angentak ten rari, margan luah singsal, toyane mili ka luan, tegal panangsar umpami, jagat kalarwan, panesé nénten kadi.

 

19.  tengah alas, apsujati kari nyasar, nénten molihin pamargi, dyapi marga budal, utawi ka jalasoca, makakalih ten kapanggih, sungsut arsanya, naneng matungtung tangis.

 

20.  gegelisan, sabenyahé jalasoca, i naga mara matangi, kesyab naga gombang, nepukin danuné rusak, kadugdugin déning bacin, ngrodok basangnya, lwir toyané punpunin.

 

21.  naga gombang, nyimbuhang geni prodbhuta, geniné nglayang nyanderin, anugtug ring tawang, geniné ageng makebyar, katodya saking nagari, mabiayuhan, geniné katon ilis.

 

22.  indryatama, raris matur ring sang raja, singgih sang adué gumi, wénten baya gata, ring luan geni makebyar, minab kawité ring giri, nika pastika, ngawi panes ring gumi.

 

23.  blabar kroda, danaraja nitah akas, jalan magebug mawali, sangkepang sanjata, majurit matalang jiwa, lemah banda pang tindihin, satruné lawan, yadin wisésa nésti.

 

24.  nyinganada, balané sami nindihang, sapatindak sri bupati, pramangkin linampah, ten panjangang maring marga, ring danuné sampun prapti, i naga galak, gerem-gerem mlinderin,

 

25.  naga gombang, laut umojar prakasa, apa alih cai mai, cai duratmaka, teka mananggar sanjata, pedas cihnané ci runtik, mai édéngang, kawisésan pang nadi.

 

26.  sri sang nata, rumasa jengah katangtang, bas wanén iba nantangin, iba buron nista, ban ngidemin dogén kalah, tan paidep mulan cai, ngaé bancana, matagen iba mati.

 

27.  ci sing nawang, nira ené danaraja, sang prabu anyakrawarti, satangkebing tawang, nyembah ring sang danaraja, nang jani malu tatasin, adu wisésa, sikep manglawan pitik.

 

28.  suryak-suryak, balané ngrejek i naga, i bala telah kapantig, olih buntut naga, ané asibak kacakcak, wénten kategor kagutil, bangké kasampar, lan kauyeng kasitsit.

 

29.  sang anata, kandugi kasimbuh naga, raris awak ida basmi, patih indryatama, séda kakeni sepungan, pejah  balané iriki, kamangsa naga, telas kumambang mangkin.

 

1. maring danu, bangké sigaré menuhin, ring toyané kambang, toyané barak mawarni, saking getih mabrécétan.

 

2. sengu-sengu, i naga setset manangis, mrasa déwék léngah, tekén warah anak lingsir, sanggupé tuah wacana.

 

3. dumun ipun, sampun syaga manyanggupin, anggén nyudamala, saking pastu kapanggihin, ruwatnya nyaga bisama.

 

4. nénten urung, déwékné nora kapurni, danu sampun benyah, pamurna tuah asiki, sinah naraka wekasan.

 

5. raris rauh, ida wiku apsujati, kanggek ida nyingak, jalasoca rusak latig, buka siyat kuruwangsa.

 

6. ida runtuh, matimpuh ring danu latig, braja tan paujan, keni nika yan umpami, anggan ida tan paatma.

 

7. naga tutul, ngemaranin ida resi, masadu wadana, nunasang indik pamargi, nyupat danu jalasoca.

 

8. wau lingu, wénten pawarah nak lingsir, sastra anggén nyupat, raris matembang sang resi, sinom kaanggén muputang.

 

1. ri puput ida magita, seselet masawang putih, tur malesat tengah toya, toya muncrat kadi riris, maring dasar katon ngendih, tulya wénten geni murub, durung apakpakan sedah, medal jalasoca sakti, saking danu, ida mawahana macan.

 

2. apsujati raris nyembah, angusut bukpadan resi, naga gombang taler nyembah, saha magagulung tangis, tenggek anguntul prajani, lek rinasa awak ipun, wiréh samayané kandas, mapala rusak kapanggih, warah wiku, sané enem kaléngahang.

 

3. jalasoca mojar drawa, uduh kita nanak mami, adi danuné karusak, nanak dini tuna kérti, ngelén ulat kalu murti, toyané loba kakeruk, tusing éling ngupapira, marikosa déning lalis, sapuniku, narakané danaraja.

 

4. ring luan taler kasingsal, toyané bes kadepinin, mayasa nora tuptupang, ten awas sirep kakalin, teka baya ten matangi, amerta nénten karungu, antyan benyah kapuara, tur kasépan yéning benin, sapuniku, narakané naga gombang.

 

5. jani bapa nganugrahang, ring nanak tuah asiki, apa ané kaedotang, pinehang to malu cening, bapa lakar nganagingin, élingang besik puniku, ané besik apang ngalah, naga gombang manguningin, manah tuhu, asrin danuné waliang.

 

6. apsujati malianan, manahé nanak sang resi, apang né pejah purnayang, sakatahé pang kaurip, i naga gombang masengit, dados ratu nunas iku, nguda i dusta idupang, apsujati ngucap raris, baang idup, to srana ngasriang toya.

 

7. depang ia ngetut yasa, ngupapira dén abecik, idepang paguruyagan, katur ring ibu pertiwi, satapak suku ten lali, makérti ring jagat guru, ditu nunas paplajahan, maring danu jimbar rasmi, raos lemud, sang apsujati nlatarang.

 

8. naga gombang cumpu manah, né pejah sami kaurip, olih empu jalasoca, masarana aji sandi, sasiraté toya jati, sané kaambil ring danu, kotaman sindu rahasya, ngaénang prasama urip, kadi dangu, danaraja malih swasta.

 

9. né urip sami manyembah, masulsul nunasang sisip, gelis ngucapang semaya, malaku yasa nityasi, nyaga danu urip pati, bisama lakar kasungsung, saking mangkin tur ring dlaha, ten wénten nénten sutindih, semu madu, moksa pawayangan ida.

 

10. makasami raris nunggal, wawidangan kakedasin, tumuli katandur punyan, lewih asri saking riin, réh akoti mangedasin, duk suryané nunggang gunung, pakaryan sami wus pascat, sarwa camah kakaadin, téjan danu, mawali ngasorang surya.

 

11. naga gombang winursita, manyaga toya tan mari, mangijengin jalasoca, kadi pawarah sang resi, roras tiban kalangkarin, wanengé manyaga danu, wau i naga kapurna, antasapa kapikolih, mala tebus, mangungsi wisnu bhawana.

 

12. tutug bulan pitung dina, danaraja rauh nangkil, ka danu makta salaran, tumpeng jangkep suci saji, tuak muah sajeng sari, sesayut mungguh ring lutuk, malih jerimpen tegenan, manca kelud pipis tapis, gayah utuh, bebangkit sadudonannya.

 

13. balaganjur mangiringang, rejang péndét saha baris, caluk arug lan bandrangan, pacanangan nénten lali, swaran bajrané mangiring, pangawin lan payung pagut, kukus menyan ring pasepan, rantasan aputih kuning, umbul-umbul, marérod ka jalasoca.

 

14. bendu piduka adulang, maréntét panyegjeg gumi, mangadegang sanggar tawang, ring ayun marérét dangsil, cau mumbul cau petik, majéjér mungguh ring tawur, pakelem sampun tragia, bébék ayam malih kambing, to madulur, sorohan suci apasang.

 

15. pamahayu wus kapuja, toyané mawali suci, medal sang adué toya, prabawati naténg rasmi, kenyung manis naut hati, mapica panugran danu, maresep maring hredaya, sindu rahasia murti, sampun nyampuh, ring sang méling nyuksma toya.

 

16. toyané kapendak budal, majempana emas manik, kairing ka lemah banda, balané saling timbalin, arep mundut toya jati, ten unepan swaran tabuh, balaganjur muah genta, ten pegat salantang margi, jantos rauh, di tepining wates kaja.

 

17. daha sutriné mamendak, maméndét makamben putih, sang pamangku taler nyanggra, manyolahang sajeng sari, genep pamendak cumawis, pakraik wongé magelur, ngayah manadi daratan, newek déwék déning keris, juru tabuh, ngeredeg sumingkin ramya.

 

18. gelisang puput mapendak, jempana raris mamargi, ring soang lebuh pomahan, bala matimpuh subakti, bhatara tirta siniwi, sané rauh saking danu, prayané nunas kasirat, dyapi kidik ten kenapi, segan agung, tur ajuman rarapannya.

 

19. yan pira lawang kalintang, maring catuspata prapti, tirta kasambut gendongan, madengen swaranya nitir, tur malih katuran saji, wus mapendak kaya dangu, mangraris nuju ka taman, angambil rurung ka kangin, tabuh kidung, ngiring tirta ring jempana.

 

20. maring kaja kangin tatas, sampun angadeg palinggih, méru mas matumpang solas, dasarnyané karang asti, ri luhur parba inukir, mapinda sang déwi ayu, raris tirta kaunggahang, ring jeron gedong mas manik, parab iku, kahyangan pangulun tirta.

 

21. munggwing bala lemah banda, aneren ngaturang bakti, swasti samasta nagara, sasukat tirta kasiwi, sarwa tahun pasti nadi, sangkan paican ring danu, maraga hulu amerta, yan pira sué antaji, danaprabu, nyalin aran danuraksa.

 

22. puputang satwa punika, damuh nuhun pangaksami, tuah ja satwa ngerawang, bas ngalintang kemu mai, krunané paksa celepin, mamaksa mungguh ring pupuh, adoh ring basa basita, belog pangkahé ten kadi, tityang puyung, wiréh lekad mara puan.

 

23. inggian satua samapta, puput ring pondok kagurit, bayabyaning pamasaran, sanding jurang tepi siring, wawengkon pandé puniki, pradésaning katurikup, tityang damuh muda bega, sangkaning paswécan widi, ngurit pupuh, pascat ring subha diwasa.

 

24. gurupati was majaya, tanggal sia kresnapaksi, manampih kadasa wayah, catur ranu sang-anunggil, nepet nemu pujawali, anggarkasih julungarum, watu klotoké kaodal, lingga hyanging ranu kérti, yéning manut, kuttara kanda purana.