Kakawin Sāgara Maṇika
Pupuh X
1.
Glis sang wipra masung pangandika ri Rāganātha piněněd
Hoh Sang Kumbha nanakku yan kita marěp wěruh duga-duga
Ring socap mangaran kajātyan-ikanang Raden Hayu měne
Len mālih ri těgěs nikang jaladhi mottameng sabhuwana
2.
Ndah mangke tumurun pwa sang ratu maring tělěng jala magŏng
Yan wus mangka těmunta guhya nikanang payonidhi nika
Tlas yeka pwa ucap sirang mpu ri Narendra Kumbha sapadang
Sang Rāgendra měněng ri wus rumungu śabda sang jara wiku
3.
Mūrchā hyunnira sang janeswara těkap ujar dwijawara
Kantun sang ratu baribin ri pahidhěp mapan katakutan
Yan lampus prihawaknya reh malabuheng mahārnawa měne
Wus sowe laju Rāganātha malabuh ri sāgara lěbā
4.
Yekāpan sira lāgyawas ri těpi ning pasir rinabhasan
Dening solahireng dangū hika cělor maring jalanidhi
Nāhan hetu narendra arṣa maněbus kasingsalanira
Olih sādhana panghělěb niku śarīra sang ratu dhawak
5.
Tan kocap ri duwěg narendra tumurun ri ratnadukara
Kering de Tuwalen Mrědah makatigāgělis masilurup
Mangkin sowya sayan dhalěm paranireng dhasar jalanidhi
Wungkal śela mapuy huwus linalu tan kawighna ta sira
6.
Ton tang mīna malit-alit maměnuhing dhasar jala lěbā
Sŏk makweh watěking iwak kadi mangun gělar dudu-dudū
Wwantěn mīna sělěh malih těri běkěm sahā si lěmuru
Len cotek lamadan grago lada malih ungang mawurahan
7.
Mwang dorang lěmujung girang ya masiwo-siwo mapuliran
Ring sor woya śilā karang inumahan tripang mawěki sŏk
Tur buntěk angěpěp malih gurita aṣṭapāda mangěpil
Tan doh woya wudang barong lumaku ring duhur watu karang
8.
Glis sang trīni matūt karang watu dawā linampaha rika
Lor wetan palakunya cět maněmu tang gěnah katara lŏng
Wwantěn śela dawāngadhěg sakadi lingga Sang Paśupati
Ndan sang nātha mangarcaneng harěpi lingga Kāmadahana
9.
Ong sěmbah ninganātha tinghalana de bhaṭāra kasuhun
Twanku Hyang Śiwa Buddha dadya paměkas japārcana mami
Ingkene stuti ring Bhaṭāra Barunāghni bhaktyana měne
Gambhīrālaya kādbhuta twan amiśeṣa tan hana karo
10.
Antyan kweh watěking iwak těka mangaksi sang janapati
Mīnāgŏng harimīna len makara gora lěmbwara juga
Sret sret saksana sarpamīna mamarěk tajem wajanira
Ring pungkur těka kūrma rāja sapagŏngnya tulya banawa
11.
Tangheh yan ucapěn watěk iwak agŏng rawuh mara rika
Nanghing tan hana rodra ring ratu samūha somya mararěm
Sarwa prāṇi haneng samudra matěduh těkap stutinira
Kañcit cañcala ring karang hika watěk iwak lalu lari
12.
Ndan wwantěn pwa ya nāgamīna mětu ri sělā watu karang
Rangkěp bhūṣana sang mahoraga dahat marukmi apadang
Dangṣṭrā tīkṣna tajěmnya tulya taji len hilatnya madawā
Wākyekang bhujaga pralāpita matakwaneng narapati
13.
Hoh sangkeng ndi paranta mānuṣa haneng dhasar jalanidhi
Lah kāthakna maring nghulun sawisayanta lungha mariki
Kāwas denku sayuktya śakti kita tur dudū jana cabar
Nojar kundhalinī něhěr sinahuran těkap narapati
14.
Ngwang Rāganṛěpa ngūni ngong lumaku yajña ring pasisi lod
Ngwang mārěp ri kapangguheng rara suraśmi sangka ri tasik
Ngwang ring ngūni mapas duhur salu suwarna duk malayaran
Ngwang wus mangruruheng samañca nagare dharat těka ni lod
15.
Nā Dewī Sakěcap ngaran rara maṇik ri ratnadukara
Nanghing niṣphala sarwa kārya mami duk harěp mrihi sira
Nāśa mwang atiduhkhiteng hati nimitta sun hana riki
Nāhan tujwani sang nghulun mangarěping sira ng rara maṇi
16.
Mwang sañcurna nikang pasir sami waluy kayeng kuna juga
Nocap sang ratu lūd wileśaya mucap ri sang janakatong
Ah ngwang wruh ri Raden Maṇik sira měne alěk prakupita
De ning ko parabhangga manghala-hala ng kahaywani tasik
17.
Ndan mojar jananātha heh syapa ta ko purun apawarah
Ndan sang wyāla mucap awaknira hulun Bhaṭāra Baruna
Tan ko wring ryaku sang tangan suku Bhaṭāra Sāgarapati
Yan ngwang tan lěga tan prasiddha katěmu pwa ko ri kinarěp
18.
Syūh hyun pāduka rāja wus marungu socapan si bhujaga
Hoh indah ta kitoraga prawara wehi sang aku dalan
Saprāyangku amogha siddha ya matěmwi sang rara maṇik
Tan wun āsya si nāga wus marungu socapan narahaji
19.
Sis kantun pwa kitākěděh mrihi Raden Maṇik ri saměne
Ah nirdon palakunyu lah lihati wadwa ring těpi kidul
Bhraṣṭeng tīra saling tumang kadi śawādryawūk sumarasah
Manglah tan paśirah malih dhadha tumus těkap śarawara
20.
Sanghāra pwa ya sangka ning kita kěděh ri rāgawisaya
Tasmād śīrna sawanwa ring panagaranta de jalanidhi
De ning krūra dahat lahut ri duwěging kinarkaśa jana
Osah sang nrěpa wus samangka laju Rāganātha masahur
21.
Singgih ngwang anunas sisip sapuraněn satingkahi mami
Yan mabwat pwa salahku tan kawěnangan těkapku maněbus
Ambil kewala jīwa ning aku Si Rāganātha sawiji
Ndan wehěn sabalanku ring nagara nirbhaya pratidina
Komentar
Posting Komentar