Kakawin Sāgara Maṇika
Pupuh IX
1.
Nā sojarnira Rāganātha sinahur pwa wacananira de Raden Maṇik
Sangkeng sāgara sabda sang rara riněngwa ri pasisi nanging kayeng langit
Hah ingwang padha śakti ring kita yathāywa ta kita pati bangga poraka
Yan duśśīla manahku tan dwa binubur pwa sanagara těkap tarěngga lot
2.
Mangkin krodha sirang narendra laju mojara ri para baleng pasir hiku
Ndah ambil śara cakra len krětala patra suligi guṇa ring pangan měne
Sambat pweka maring tasik lěsatakěn prasama ri tělěng-ing samudra tah
Yeko koliha denta reh masa wadhū kaya kita maduwe pasañjata
3.
Merdah mwang Si Malen matanghi manutur ri narapati mapan liwat sěngit
Aptyānrěptya manah narendra ya tathāpi sawacana si karwa sor malih
Sang Rāgendra kukuh maring hidhěpira praya mamalěsi Sang Maṇik Kěcap
Ring glis sarwa warāyudha gya liněpas kadi mangudani sāgareng kidul
4.
Sar cěb āyudha ning baleka tumibeng jaladhi makěṭi koṭi binyuhan
Śrī Rāgendra lumūd manangtangi Raden Dhara saha mangagěm kěrisnira
Tan sah sakṣaṇa sarwa sañjata tibeng udhadi mawalikan maring dharat
Mangrampak ya mawanti-wanti manujah para bala tinuwěk bapuhnira
5.
Tan wring de sawatěk baleka těkaping wiwidha śara dhatěng kayeng jawuh
Makweh bhraṣta pěgat gulūnya sinuduk jajanira siněsěb těkap panah
Kweh wangkay tiba manglumah masusunan kadi kuṇapa wukir tasik marus
Sāk sangkīrṇa basang-basang linalěran pasisi kapěnuhan watang mala
6.
Bhūpāleswara śoka ring hati ri wus kadulu balanipun tělas pějah
Mābang toya ri sāgareka kawulat těkapira dinudū sakeng gětih
Mwang ambŏnira wūk masowya lagi warna jaladhi mahirěng dahat dědět
Kālih bahni mijil sakeng těngah-ikang udadhi sinarěngan kukus cěměng
7.
Cět durmanggala yeki cihna nika tan sapira ta parimāṇa ning hala
Yan solah krama tan sayogya dumunung mara ri kanarakeng salokika
Lwir solah prabhu mangkyanyūh jaladhi tan hana maphala mapan liwat lañcang
Ndan wruhakna ya nirguṇa pwa kita sang prabhu mañawurakěn wuyah ri lod
8.
Hetunyan rika wus pěpěk těkap-i bhojana wara maṇi mūlya len dhana
Sang katwang alaris liwat mangulurīndriya rumasa dhawakta śaktiman
Yan kadyāpa kaśaktya ning jana makarṣa mamalu mangasorakěn tasik
Tan wun niṣphala teka nocapira sang prajuru panakawan ngaran Twalen
9.
Rěmpuh twasnira sang narendra ri puput hamirungu pangucap Twalen hiku
Ndan meling pwa Narendra Kumbha ri kasingsalanira magawe rusak tasik
Lūd mangke manunas sisip malaku sampura saka ri salah angěnnira
Mwang wuh sabda nikang tangisnya kadi kokila manangisi śītaraśmi ya
10.
Tan sowe tumuluy dhatěng pwa sira sthāpaka saka ri tělěng tasik kidul
Manglīlā pwa dalan jara wiku mangambaha sira duhuring tasik gěni
Ābhā ning tanu sang munīndra kadi teja rawi wahu bangun sakeng timur
Mwang rūm ning sěmu sang yatīndra kadi warsa sinaji lumaběh śaśih kapat
11.
Ndātītan sira sang mahāmuni těhěr malaku mara ri sang narādhipa
Sang katwang agělis marěk gya mangusap caraṇa rěṇu mahā bhujangga lěs
Singgih sang guru siddha yogi paramārtha guṇa kasihaněn pwa sang hulun
Yan ring lokika buddharūpa kita tan hana padha magawe kaśāntikan
Teks pupuh lainnya dari Kakawin Sagara Manika dapat diakses di sini: Ikhtisar Cerita
Komentar
Posting Komentar