Geguritan Kandara Bang : Adimantri Merak Duka ring Sang Ratu Wangsana

 

           Palet III : Adimantri Merak Duka ring Sang Ratu Wangsana

         Pupuh Ginada 

 

    23.      Natha meneng sakamantyan / tan weruh pacang anyawis / raris medal pawacana / eda paman ngebug kemu / sang roro norana dosa / kaping mami / ditu tusing tuna satya //
 
24.      Napi malih Sang Sardula / malimpad-limpad ya sakti / makwéh bala ring segara / ratu pradnyan jagat wibhuh / kéto né bakat karenga / Lembu Angin / kari anggon ingsun paman //
 
25.      Sang Merak mripatné abang / mangrengo sahur bhupati / laju nguman ring paséban / mageleng manah ring prabhu / kabaos prabhuné céda / adimantri / ngucap kadi liman édan //
 
26.      Natha tuhu natan wirang / sinengguhta ipun sakti / nguni-nguni ngaku sanak / yén wimbayang solah ratu / lwir kadi ngubuh lintah / ngamah getih / né ngubuh masih késepan //
 
27.      Ratu tuhu tuca kaya / musuh winuwusan siddhi / inget-ingeten prayatna / pira kwéhning bala lampus / dadi caru di ranangga / nanging mangkin / ratu nyumbungang né singsal //
 
28.      Sinah kaon tinemunta / bala nora mantuk swargin / sinah naraka sang atma / bala sané sampun mantuk / maplisahan kasangsaran / yéning uning / ratuné tusing madanta //
 
29.      Wéntennyané Sang Sardula / ripu né kabaos kanti / nganti-nganti linggih natha / kéto masih Lembu Bayu / buka cangak nginté iwak / nyilib-nyilib / nyilur gelung karatuan //
 
30.      Sang Pamayun kamemegan / kaliput byamoha gati / wusan ngrenga ujar Merak / tibéng braja tan pajawuh / mangkana yan inumpama / Ratu Alit / nénten wénten manémbangang //