Palet XII
Surat Tan Pasastra
1. Ndan dhaténg subha diwasa / utusan Meraké
prapti / nyobyahang séwalapatra / majeng ring Sardula Prabhu / mangda tulus ya
mangandap / pasir wukir / raja branané serahang //
2. Aturang ring Sri Wangsana / maka cihna dreda
bakti / ngulati jagat raharja / Samong Prabhu mangkin bendu / ri wus ngwacén
swalapatra / barak ngendih / paliatné sada galak //
3. Sigra winalésan ika / katur maring Wuluh
Adi / winacénan ikang kretas / dé Sang Merak semu guyu / ica ngakak ring pasébhan
/ para mantri / wismaya sira sadaya //
4. Katontonang krétas ika / maring para
mantri sami / sinah sami padha kagyat / tan patulis surat iku / tuwah kretas
malembaran / adimantri / laju umojar pradata //
5. Aywa mapanjang-panjangan / Prabhu Samong
ya durbakti / ingsun makon sira ngalah / nanging surat tan kasawur /arep alaga
pwa sira / lawan mami / sahur suraté ring laga //
6. Ketogang bala manira / ané domas tali
yukti / jalan maboros ngelodang / ngalih Macan anggon caru / lambéné pacang
nyahutang / surat mami / né kawangsul tan pasastra //
Komentar
Posting Komentar