Palet XVI
Siat ring Kandara Bang
1. Panumaya perang prapta / rinawos ring
Macan Gading / sampun tegep mangkat yuddha / para wadwané majibun / tan lali
mukyaning bala / sampun apik / mabhusana sarwa muntab //
2. Ring hayun Rakta Sardula / sinanding Sang
Yuyu Putih / malih Sang Samong Kirana / Makara Wungu tan luput / Mantri Kancil
Sugih Liyang / sareng sami / ngadeg ring areping gelar //
3. Bhusananyané sindura / mabang kawacané
sami / sajawaning Sugih Liyang / kawacané putih mulus / sanjatané kepet baka / ilih-ilih
/ buka ngorta jak anila //
4. Ikang tiyos ngagem kadga / katon ya tiksna
malungid / ikang utama Ki Mangap / katon guna pangan iku / ikang tomara ya juga
/ katon ingid / ikang sadaya tiksna ya //
5. Sadaya manjaya-jaya / umojar masanti-santi
/ mangamé-amé sang natha / masuryak-suryak matambun / malagas-lagas mawirang / jati-jati
/ nelas-nelasang musuhnya //
6. Titanen ring Abing Barak / pratatané nénten
pahi / kalané niténin gelar / bala mantri ya masépuk / anganti titah manggala /
sénapati / sané anyar kamanggehang //
7. Nanging né anyar tan lagas / kala
kasangkul ring tasik / was-was bayunyané nyap-nyap / nekekang bala bas agung / saking
pasung Mantri Merak / budang-bading / nyelehang sing pragat-pragat //
8. Samong Katong mangkin kocap / madawuhang
titah raris / makon bala sigra mangkat / maring Kandara mangempung / lamakané
tan kasépan / Macan Gading / pascat ngérihinin perang //
9. Langit galang surya ngentak / duk kapal
luas manasik / warihing arnawa jimbar / yan ring doh ciningak pelung / baled
siniwaking kapal / kadi ngiring / bala luas nantang rana //
10. Wadwa maring Kandara Bang / juga arabda ya
nganti / nging tan cacep manggalanya / mawasana tan malaku / kadi panudaning
pahat / nyantos wangsit / kagetok dé manggalanya //
11. Macan Gading ngamaranin / Wangsana kari anengil
/ dyapi mantri masliweran / tan hana manaya tuhu / iku raris kapirenga / adimantri
/ langsung nitahang maperang //
12. Raris dané Sugih Liyang / wisésané
katontonin / malarapan guhya japa / saksat nguningang ring Bayu / Bayu rasa
mangidepang / sihin Widdhi / pramangké bayu kauwah //
13. Nguni kalér kauh dateng / baret dateng
upin-upin / sagét dateng manah embang / kelod kangin dateng nglinus / datengé
tan parimita / dateng angin / dateng ka kalér pascima //
Komentar
Posting Komentar