PALET II : Sang Adimantri Nunas Ayat Nelasang Satru
15. Hana ta sarining katha / bala wadwa domas tali / nanging tulus kakasorang / winaya anggén mangukuh / maperang di Abing Abang / enam laksi / kantiné ento ngalahang //
16. Hana wak kapurwan katha / maring bancingah Pring Adi / sang prabhu ring singgasana / mantri wadwané maturut / ngélingang genah sowangan / mapan bakti / ring sang prabhu mangawula //
17. Mayun Anom bhisékanya / sang prabhu nyenéng ingkana / mapan muda kwéh tan tatas / nglampahang aji kaprabhun / to mawanan sering bimbang / kari alit / minab nem belas yusanya //
18. Sapatindak dé sang natha / miturutin adimantri / kari kaangkenang paman / Sang Merak aran puniku / manggala sakti ring wira / indik niti / lwir lindung belig manaya //
19. Titanen mangkin irika / raris prapta adimantri / lumaku ati garwita / reprep meneng sami nungkul / tan hana wani lumihat / adimantri / manganjali saha sembah //
20. Singgih tabé naranatha / paman pukulun anangkil / ri jeng Sri Wangsana Natha / sumahur dé Prabhu Mayun / mapan paman atangkila / maring mami / bagya mami yan samangka //
21. Apa hyuning inganika? / duga-duga warah kaki / ingsun nora wani singsal / Merak Mangélo masahur / sajnya ratu Wangsanatha / arsan kami / ngarejek ka gumi wétan //
22. Nelasang Lemah Pawaka / tur ngasorang Lembu Angin / taler ring Jagat Sardula / manah tityang mrika ngempung / manelasang sang durjana / mangda yukti / tan goncah wibhawan natha //
Komentar
Posting Komentar