PALET XV
Pangawit Yuddha ring Tasik
1. Sayuwakti cai corah / munyi twara bisa
gisi / nguni ngucapang lascarya / ngaturang déwék manungkul / tuah satya tekén
bena / kanti mati / masemaya ban likita //
2. Nanging jani suba tatas / cai méla Macan
Gading / réh kemu nyuwangang panah / mula cai nyaru-nyaru / uling gigir cai
nyula / werat pati / suba sing ada pilihan //
3. Manengkluk sang kalih rowang / ngaku sadu
untag-antig / marasa ya kapisuna / nanging Merak tan ngarungu / raris sang karo
kapunggal / wiréh brangti / engsap tekén pangréncana //
4. Yan suba sang karo pejah / sira manggeh sénapati?
/ kala maperang ring toya / wantah ipun sané weruh / indik kapal lan rancana / ipun
mati / rancanané pacang bencar //
5. Kéto sanaké ngingetang / mara méling
adimantri / nanging lacur ban minehang / kretasé ba dadi abu / abu sing kal
dadi kretas / sangkan brangti / pamineh tusing majalan //
6. Kocapan Samong Kirana / sampun dané polih
wreti / kapal sampun tinekekang / saling sambung kasinambung / apang malayar
tan goncah / besi-besi / nyambung kapal padha kapal //
7. Né ngundukang suba pejah / Kura Jata Kura
Jati / kasengguh ngaturang panah / wiréh mamanah lelakut / ka prahu somi
kocapan / Merak brangti / Kura rwa kocap capala //
8. Hana malih ikang wreta / dauh papat pacang
ngawit / saking Kandara matulak / raris lakar ngebug kidul / kapalé
kasiyagayang / misi api / to anggén manunjel lawan //
9. Réh angin ling bayabiya / majalan ka kelod
kangin / yéku anggén ipun srana / kapal lawan mangda puhun / ritatkala
mapapasan / wiréh api / lakar mandilat ka lawan //
10. Kebo Nala mojar pregas / depang tiang né
ngarepin / musuh ané lakar teka / tiang né pacang mamagut / sampunang
sumanangsaya / nglawan api /tiang sampun kapragolan //
11. Yuyu Petak raris mojar / nira nénten
ngalugrain / wadwan paman nénten katah / nisphala karya siréku / pateh tekén ngejot
prana / rengen mami / paman da ampah lumampah //
12. Raris matur Sugih Liyang / lawan bareng
antuk api / anggén ngeseng kapal lawan / kapalé reko masambung / sinah mabading
sing nyidang / napi malih / mundur twara lakar bisa //
13. Ring celuk kapal magenah / tusing bisa ban
makelid / yén raga ngebug malunan / jalan manunas ring bayu / mangda ida ka
bayabya / mangda yukti / Merak nunjel déwék didyan //
14. Yuyu Petak manakénang / kénkén anginné
mabading? / saja paman kal madingang? / Sugih Liyang ya masemu / tiang suba ngelah
daya / Déwan Angin / wantah kanténan titiyang //
15. Yuyu Petak mangarsénang / Sugih Liyangé
kapuji / mapan wiwékané pradnyan / lakon Kebo Nala ngamuk / manguman ring paguneman
/ sekel hati / raos pragat tan karenga //
16. Rasa tiang sing maguna / kéné iwang kéto pelih
/ ento salah ené singsal / abedik twara karungu / stata iya Sugih Liyang / né
kapuji / si mantri kecag-kecagan //
17. Yuyu Petak mojar galak / kocapan Kebo
amiwal / raris karuntuhang danda / dané kadanda ban pecut / kapecut slaé pang
dua / telah bisbis / dané matilar ngajanang //
18. Bala tumut tengan ceban / mangiringin Kebo
Geni / nyadpada ka Mantri Merak / wiréh dané sampun weruh / Kebo Nala murug
natha / awak bisbis / makada dané percaya //
19. Balanyané Kebo Nala / matunggal ka Pering
Adi / makada Sang Merak bangga / makin rered wadwan musuh / yéku kang sampun
tinarka / dané mantri / rasa andel pacang menang //
20. Dané tusing byakta nawang / sampun keni
indrawarih / Kebo Nala né maserah / sayuwakti bobab iku / mula sampun karencana
/ apang siddhi / mangusakang umah lawan //
21. Mula twara ada nawang / wantah né nawang
kakalih / Yuyu Petak Kebo Nala / ané mapitungan iku / dadosné sami percaya / Kebo
Geni / sami nyengguh dané piwal //
22. Luasé mangaba kapal / kapal penuh misi lengis
/ meryam tur sarwa sanjata / kaimbuh kapuk lan muluk / srana iku kal enjuta / ring
madyami / genah musuhé punika //
Komentar
Posting Komentar