PALET I : PAMAHBAH
Pupuh Ginada
1. Tabé sredah hyang déwata / lédang ugi manyuryanin / I
Damuh tambet kasmala / pangkah manglekasang pupuh / Ginada anggén nuturang / ada
jani / satwa melah uling Cina //
2. Samkok ngaran babon ika / duk masan tiga nagari / tuturé
nguni ring Cina / nanging mangloka kasumbung / perang natha lawan natha / manindihin
/ tatujon saka sowangan //
3. Saraswati hyang sinumbah / rumaga Hyang Wagiswari / maka
saktin Sang Hyang Brahma / saksat ratu kadi suluh/ ngulah peteng Sasih Magha / nénten
lali / sembahé salantang prana //
4. Ratu aksamayang tityang / nguah uuh tata titi / kandané
sang sampun lepas / mogi tan kakeni pastu/ kadohang pangupadrawa / mangda yukti
/ rahayu sakula gotra //
5. Ulyan Damuh tuna sastra / tembangé ginawé sisip / ngaé
ngrimuk karnasula / sang alimpad ndatan ngugu / pakaryan tembang ngarawang / napi
malih / basan Damuh kantun matah //
6. Matambah tambet kalintang / tangkep Cina tan uningin /
uningé wantah mangayal / mangayalang satwa pangus / pangus alah déning alpa / alpa
jati / jati tityang mula ngawag //
7. Wiréh méweh ngucap aran / bhiséka sami kaganti / nganggé
aran sarwa satwa / satwa ngaran subha laku / subha laku dalan dharma / para
gusti / sané mangkin katlatarang.
8. Cao Cao to Sang Merak / Liu Bé Sang Lembu Angin / Sun
Kuwan Rakta Sardula / sinah nika sang tri prabhu / sama ngamong swanagara / para
mantri / sané mangkin apang tatas //
9. Mantrining Rakta Sardula / Sawo Yu Rakata Putih / Lu
Su ngaran Kancil Werda / Gan Ning ya Makara Wungu / Huwang Gé Sang Kebo Nala /
Macan Gading / iku jagat Wu kocapan //
10. Wénten taler anten wadwan / Sun Sang Syang dané anami
/ rara ayu wibhuh jnana / Samong Kirana umungguh / munggwing katha kapradata / tuah
kédik / akéhan tan kapradata //
11. Sané mangkin inucapang / mantriné Sang Lembu Angin / ngaran
ika Samong Manca / Badak Wesi to Sang Gwan Yu / Saho Yun Kidang Kancana / lan
Sang Péhi / dané ngaran Singa Édan //
12. Badak Wesi Singa Édan / Lembu Angin nganggén rai / wantah
masanak di dharma / wénten malih né kasumbung / twara tios Sugih Liyang / pradnyéng
niti / bétél maring sarwa naya //
13. Nagara Lemah Pawaka / nagara alit acuplik / Nagara Su
ngaran ika / nagara ida Sang Lembu / nagara satriya pradnyan / nagaréki / nagara
hana ring wétan //
14. Nagara agung kocapan / Nagara Han né kapuji / Pering Adi driki munggah / Wangsana talér kasumbung / idép to Medang Kamulan / sané driki / linggih sang raja di raja //
Komentar
Posting Komentar