Palet VII : Nareswari Mantuk ring Marga.
54. Mangkin kocap né makutang / naréswari sareng kalih / kari amurang ring lampah / inuber-uber malayu / sarwi ngamong raja putra / tinut buri / déning satru duratmaka //
55. Sarwa musuh berangsongan / ada mananggar gagitik / muwah tombak malih pedang / arsa mejah rajasunu / narapatni né mangraksa / tur sarati / ngangsehang ngaba keréta //
56. Kapiambeng ratha nika / macelos ring tengah margi / sang roro laut mablesat / sarwi nyangkol putran prabhu / nylisib maring tengah padang / rajapatni / mangké sampun kinepungan //
57. Lampus patni né madénan / déning wadwa Pering Adi / tinumbak tanpa kasihan / wedi patni sané duhur / rasa idup mati asah / nénten mari / anambat Widhi Bhatara //
58. Kancit dateng Kidang Emas / améla sang narapatni / musuhé sami kapapas / kalilihan sarwa satru / dinedel Kidang Kancana / dahat sakti / mula twara patandingan //
59. Gelar siki lawan solas / Kidang Kancana asiki / Pering Adiné asolas / nanging Kidang nénten mundur / sambil ngandong raja putra / dané mangkin / angrejek sumingkin galak //
60. Arépot Kidang Kancana / réh aperang ngamong istri / tur angamong rajasuta / kéto né kacingak tuhu / déning sang raja dayita / sané mangkin / sang narapatni umojar //
61. Paman ingsun Kidang Héma / tuhu baktinta ring gusti / kemiten sira kéwala / aturaken ring sang prabhu / ingsun mangké pamantuka / mangda tusing / paman arépot maperang //
62. Durung kasahuran ika / lumompat sang narapatni / maring sumur sira tiba / raris antaka tan urung / katon iku dé Sang Kidang / sayan sengit / dané umagut angrejah //
63. Socanira abang ngekak / kroddhané luwir jaladi / musuh kadedel karancab / tan hana liwat kapupuh / telas musuhé pralaya / dané nangis / méling ring sang prami natha //
64. Umarek sira ingkana / katon layon praméswari / ring dasar sumur agenah / raris kaurug kang sumur / déning prigi né irika / apang ilid / pang ten wénten né mangaksi //
Komentar
Posting Komentar