Palet VI : Jagat Wetan Ngelidin Satru
Pupuh Ginada
46. Durung telas satrun ida / méh-méh balané kalilih / musuhé teka manyambang / kadi ombak magagulung / suryak-suryak sami wérang / Badak Wesi / matakon ring Sugih Liyang //
47. Kudyang jani ento paman / masepuk musuhé prapti / bala wadwa kalilihan / sinah kasikep sang prabhu / réh né ngungsi kari jambat / kénkén jani / pamineh apang madaya //
48. Makenyem I Sugih Liyang / saha saur ujar manis / da to sangetanga paman / nira suba ngelah unduk / twah tamyang anggon sarana / tur makanti / ring Ida Sang Hyang Baskara //
49. Ené madan surya kanta / anggén ngampel musuh sami / mangawé ulaping tingal / pang nyidang wadwa malayu / mapan musuh tan pramana / kéto jani / da ulah-ulah mamaksa //
50. Meseh sampun ngamaekang / taragya sinareng sami / tamyang ika kabadingang / sunaran suryané metu / mangulapin sang maningal / maka sami / mesehé buta makebyah //
51. Rauh kuda sama édan / gréhgéhan ebah pagrikgik / nora kawasa lumampah / saksana padha amundur / kena ulap surya kanta / wadwa tani / makelid sami ngababang //
52. Mapan sampun wénten galah / sami bonglot tur makirig / sasingid ring sunya désa / maring gunungé akuwu / ditu tuhu ngekes atma / wadwa tani / lumaku pasilih dandan //
53. Sami maéncol-éncolan / sang prabhu tumut mangungsi / réh tusing nyandang amagpag / perangé kakwéhan satru / yén mamaksa di ranangga / suba pasti / kalahé damping madandan //
Komentar
Posting Komentar