Palet XIII
Bala Wadwa Gempung Gering
1. Mapan sampun masengitan / siyat tan siddha
tinangkis / maka rwa kahyun akas / perang muka tan kawurung / gelaré sampun
sayaga / béla pati / manindihin swanagara //
2. Kocapan ring Abing Barak / para wadwa gempung
gering / busung gondong mwang kacacar / antyan makwéh sané lampus / madidih berek
durganda / tabib sami / matur ring Sang Mantri Merak //
3. Singgih gusti sang manggala / wadwané
sinambut gering / sinah geringé manglalah / yéning watang tan ingabu / basmi
sami maring brahma / sané gering / da campura ring sang waras //
4. Metu winaya Sang Merak / watangé aja
bhinasmi / anyud dogén mangelodang / unggahang watang ring prahu / dagingin
saraja mirah / sarwa manik / kawaca sanjata perang //
5. Depang geringé manglalah / ditu ring selating
pasih / apang rered bala rika / gering ika anggon ngempung / depang iya manampedang
/ suba pasti / musuhé lakar pralaya //
6. Tuhu kadi warahnira / wangkéné linarung
sami / ring perahu nutut toya / kampih ring kikisik kidul / kakantenang bala
rika / ring kikisik / tan weruhing bhaya gata //
7. Ramya bala ngamaranin / ngambil kawaca mas
manik / malih sanjata ring watang / sami becik kasinengguh / karenga dé Sugih
Liyang / telik sandi / ngucap to winaya corah //
8. Sugih Liyang ya kasépan / mara manuju
kakisik / wadwa suba numplek drika / isin prahuné kaedum / sambil ngrépé-ngrépé
watang / wiréh misi / pipis makacak-kacakan //
9. Sedih hati Sugih Liyang / tan aswé wadwané gering / mranén ikang indrajala / gering lumra ring nagantun / kapati-pati mar tur bah / nuju énjing / masata-sata ya kena //
10. Balané sampun matunggal / sareng bala lemah geni / to mawanan wénten juga / wadwanira kena rimpung / ngandika Sang Lembu Natha / jaga mamwit / réh wadwané tan sapira //
11. Wadwa ning kami matulak / wiréh bedik
garang gering / bénjang wekas yéning
waras / ingsun mawali ka hayun / mangkin nunasang sampura / ingsun amwit / wekasan malih matunggal //
12. Brangti temen Sang Sardula / tinilara déning kanti / nguni ngajakin maperang
/ mangkin maperang ya durung / nanging malalis tan satya / gelah jani / payu majujuk
didian //
13. Sugih Liyang né kocapan / nénten sareng
dané amwit / kari makantén irika / apan dané sané dumun / purun nunas ka Sardula
/ rika ngawit / puput masih pang irika //
14. Mangkin ngucap Sugih Liyang / ngiring
wangkéné bhinasmi / mangda geringé tan anjrah / sané gering mangda kumpul / aja
gabung ring né waras / ring kikisik / dunungang dumun irika //
15. Mojar dané Kebo Nala / godot-godot
iris-iris / raris anggo pakan mina / apan ika wangké musuh / nguda kéh bakat
sangetang? / Nala Geni / ngucap kéto wiréh jengah //
16. Wacanan Sardula Rakta / Sugih Liyang
katurutin / wangké musuh ginosongan / binekelan damar kurung / raris jagaté
kasuddha / nganggén aji / ambalik sarwa marana //
17. Mahireng dhuma ning laywan / sabrang dwipa
katon ilis / tusta dahat Mantri Merak / sinengguh akéh né lampus / kaweweh mirengang
warta / Lemah Geni / sampun umunduréng laga //
Komentar
Posting Komentar