Palet V : Adimantri Ngelurug Jagat
37. Hénéngakna pwékang katha / bala perang Pering Adi / sampun ngebug dasa désa / bhasmi bhuta dadi abu / bala taniné amapag / tan satanding / satru tan kena winilang //
38. Sikepé tan papramana / sinah kalah désa tani / wangké masusun-susunan / ngawetwang saraning marus / kunapa kadi parwata / saling tindih / liu né mapukang-pukang //
39. Pangamuk tusing rérénan / matanguran ban gong béri / satriya nunggang turangga / genep saha para juru / juru panah juru tumbak / adimantri / alunggwéng ratha kancana //
40. Adegé ngulapin tingal / kadi mretyu mubar bumi / tedung kuning makembaran / maruntutan payung pagut / ento ngabih sang manggala / tan kasaih / busanané abra muntab //
41. Gong bendé mwang kendang gubar / awurahan ya mamunyi / swarané ati gurnita / langité sakadi runtuh / miragiang suryak perang / napi malih / tangisé idepang tembang //
42. Tangisé ngempengang karna / para wadon untag-antig / tininggal swaminé lina / sésan péjah magerudug / sami meneng masingidan / ratu tani / sami mlaibang angkihan //
43. Sang Prabhu Lemah Pawaka / ring gunung ida asingid / wira susaktyéng nagara / ané mapag para satru / Manca Samongé inucap / limang diri / satya nindihin nagara //
44. Manggalané Sugih Liyang / majaga ring tepi siring / Badak Wesi Singa Édan / Kidang Kancana magabung / Kukur Poléng Asu Munggah / makasami / amagut musuhé prapta //
45. Badak Wesi wirang manah / satruné sami kagatik / tan rarian Singa Édan / satruné sami kapupug / Kidang Kancana masiat / satru sami / sambrag ulung pakelétak //
Komentar
Posting Komentar